Міністэрства ўнутраных спраў Расеі працягвае папаўняць базу вышуку беларусамі. За апошнія паўгода ў спіс былі дададзеныя больш за тысячу грамадзян і выхадцаў з Беларусі. Сярод іх — журналіст Радыё Рацыя Андрэй Мялешка, супраць якога ў на радзіме распачалі тры крымінальныя справы. Ці было чакана для Андрэя, што яго абвесцяць у вышук? Якія наступствы і нязручнасці ўзніклі пасля таго, як яго імя апынулася ў расейскай базе вышуку? На гэтыя і іншыя пытанні адказвае Андрэй Мялешка ў гутарцы з Юліяй Сівец.

<figure class="wp-block-image size-large"></figure>

РР: Андрэй, ты нядаўна трапіў у базу вышуку Расейскай Федэрацыі. Ці чакана было, што ты патрапіш у гэтую базу?

Андрэй Мялешка: Апошнім часам, калі пачаліся ператрусы ў бацькоў і было заведзена, па маіх звестках, тры крымінальныя справы, ужо было чакана. Але калі мы кажам пра тое, што ці хацеў бы я апынуцца ў гэтай базе, то я не хацеў бы ў ёй апынуцца, бо мая жонка і дзеці знаходзяцца ў Грузіі, і цяпер дарога ў Грузію мне зачынена, і я не магу цяпер туды паехаць. Мы ўжо думалі, у якой краіне, калі што, сустрэцца. Цяпер яшчэ і Турцыя зачынена, атрымліваецца, і іншыя некаторыя краіны. Можа быць Арменія, але Арменія такая шэрая зона, мы можа і ў Арменіі нават не будзем сустракацца.

РР: Якія нязручнасці ад таго, што патрапіў у базу вышуку РФ?

Андрэй Мялешка: Патрапіць у гэтую базу – гэта значыць, што закрываецца дзясятак краін, у якія можна было патрапіць. Зачыняецца амаль увесь Каўказ, зачыняецца Турцыя, зачыняецца нават, па маіх звестках, Егіпет. Толькі калі дзе сустракацца, то ў якіх-небудзь еўрапейскіх краінах. Як мне ўчора праваабаронцы сказалі, твае межы, куды можна ездзіць, гэта краіны ЕЗ – больш нікуды лепш не ездзіць.

РР: І ЗША, напэўна?

Андрэй Мялешка: У ЗША трэба ж яшчэ візу атрымаць. Так у прынцыпе я нікуды не выязджаю і не збіраўся бліжэйшым часам. Бо чакаю на побыт, і я нават не ведаю, што з гэтым будзе, бо мяне нават на адбіткі пальцаў не выклікалі.

РР: Апошнім часам гэтая база вышуку РФ досыць часта згадваецца, таму што вельмі шмат беларусаў апошнім часам туды сталі трапляць. Як увогуле да гэтага ставіцца, што сотні беларусаў у гэтай базе?

Андрэй Мялешка: Учора мы з Вольгай Класкоўскай размаўлялі на гэту тэму. Яна мне сказала, давай на гэта проста не будзем звяртаць увагі. А з другога боку, не звяртаць увагі я таксама не хачу, так да сябе ставіцца і да сям’і. Я заўважыў у гэтым спісе вельмі шмат людзей, якіх ведаю вельмі даўно і гэта не толькі журналісты, а і грамадскія дзеячы. І заўважыў там свайго сябра з Гародні, у якога нічога невядома па яго крымінальных справах, ніякіх ператрусаў у яго не было, але ён ёсць у гэтым спісе.

РР: Як ты думаеш, на якой падставе туды людзі трапляюць?

Андрэй Мялешка: Хутчэй за ўсё гэта беларусаў “здалі” што называецца. Проста перакінулі спісы людзей, якіх падазраюць у нейкіх крымінальных справах. А па некаторых мяне здзіўляе, напрыклад,  я ўчора прайшоўся па спісе знаёмых журналістаў, адны ёсць, іншых няма. Нават тыя, якія па тэлевізары “тварам гандлююць”, іх няма. І думаеш, нейкія рандомныя рэчы. Можа пасля доўгай “чэкісцкай” працы туды людзей заносяць? Я не ведаю, чаму так.

Цалкам гутарка:

<figure class="wp-block-audio"></figure>

Беларускае Радыё Рацыя

The post Журналіст Андрэй Мялешка трапіў у базу вышуку МУС Расеі appeared first on Рацыя.