Klei Aê Diê Blŭ: I Y-Timôthê 1:18-20

Êlan kliăng: “Ơ Y-Timôthê, anak kâo, klei mtă anăn kâo jao kơ ih, tui si klei hưn êlâo djŏ kơ ih hlăk anăn, čiăng kơ hŏng klei bi mđĭ ai mơ̆ng klei hưn êlâo anăn ih dưi bi blah jăk, êjai djă pioh klei đăo leh anăn ai tiê kpă jăk” (I Y-Timôthê 1:18-19a)

Klei êmuh ksiêm mĭn: Ya ngă Khua ƀĭng kna Y-Pôl mtô Y-Timôthê brei bi blah bi jăk? Si khua ƀĭng kna bi mguôp klei đăo hŏng ai tiê kpă jăk? Si boh jhat dua čô Y-Himênê leh anăn Y-Aleksanđơr klam bi mdih leh drei?

Leh bi mni kơ Aê Diê, Khua ƀĭng kna Y-Pôl lŏ wĭt hŏng akŏ hră ñu čih leh hlăm

I Y-Timôthê 1:3-11: Bi kdơ̆ng hŏng klei mtô mơ̆ng klei đăo mkăn. Ñu kčưm dơ̆ng hŏng êlan “Ơ Y-Timôthê, anak kâo” čiăng kơ khua pô mtô mda asei, ăt jing anak ñu hlăm klei đăo, thâo săng kơ klei dơ̆ng dlăng jing yuôm bhăn snăk. Mơ̆ng êlan 18 truh 20, khua ƀĭng kna mơĭt klei mtă yuôm bhăn snăk kơ pô mă bruă mbĭt hŏng pô: Brei “bi blah jăk” (êlan 18), jing brei jhŏng bi blah. Hlăm hră anei, dua blư̆ Khua ƀĭng kna Y-Pôl mtô pô mă bruă mda asei mbĭt hŏng pô snăn (I Y-Timôthê 1:18 , 6:12 ). Leh anăn hlăm hră êdei, Khua ƀĭng kna Y-Pôl lač hŏng hjăn pô snei “Kâo bi blah leh klei bi blah jăk, anôk kâo êran tuč leh, kâo djă pioh leh klei đăo” (II Y-Timôthê 4:7). Hŏng Khua ƀĭng kna Y-Pôl, klei hdĭp phung đăo Krist jing sa klei bi blah hlăm mngăt sui snăk hŏng lăn ala, kđeh asăr leh anăn yang jhat tơl drei dưi wĭt hŏng Aê Diê. Yang jhat amâo mdei bi rai, ngă kơ drei lui mang klei đăo, tơl amâo dưi dưn ôh kluôm ênŭm klei hdĭp jăk mơak, êbeh dlai hlăm Khua Yang.

Mơ̆ng klei Khua ƀĭng kna Y-Pôl mtô hlăm êlan êlan 19 leh anăn 20, ñu čiăng kơ anak ñu hlăm klei đăo ƀuh klei bi mklăk plah wah dua êpul mnuih hlăm klei bi blah hlăm klei hdĭp myang. Bi ala kơ êpul tal sa jing Y-Timôthê, brei “bi blah jăk, êjai djă pioh klei đăo leh anăn ai tiê kpă jăk” (êlan 18-19). Bi ala kơ êpul mnuih tal dua jing dua čô Y-Himênê leh anăn Y-Aleksanđơr, kyua “hngah leh ai tiê kpă anăn” kyua anăn “bi kngăm leh klei diñu đăo” (êlan 19-20). Khua ƀĭng kna Y-Pôl mkŏ kjăp klei đăo hŏng ai tiê kpă jăk, doh mngač. Tơdah sa čô mnuih hngah nanao kơ klei blŭ mơ̆ng ai tiê kpă jăk, klei ƀuah mkra, mđĭ ai leh anăn mtrang mngač mơ̆ng Yang Mngăt Jăk hlăm ai tiê, snăn klei đăo pô anăn ăt srăng kngăm mơh. Hlăk anăn, pô anăn “jao leh phung anăn kơ Satan”, dưi thâo săng jing mjưh klei bi mguôp sĭt suôr. Êlan êdei anăn, “čiăng kơ diñu hriăm amâo blŭ mgao hŏng Aê Diê ôh” brei ƀuh klei kñăm mjưh mdei klei ƀơ̆ng mnăm sĭt suôr mơ̆ng Phung Sang Aê Diê amâo knŏng jing klei kpĭ mjuăt ôh, ƀiădah lŏ đru kơ phung tŭ klei kpĭ mjuăt thâo săng êlan pô soh čhuai leh anăn kmhal lŏ wĭt kơ Khua Yang leh anăn hŏng Phung Sang Aê Diê.

Boh jhat dua čô Y-Himênê leh anăn Y-Aleksanđơr tŭ, bi mdih drei brei krơ̆ng kjăp klei đăo hlăm Khua Yang Yêsu Pô Bi Mtlaih, leh anăn kriê pioh ai tiê kpă jăk doh mngač čiăng hơĭt ai tiê dưi bi blah jăk hlăm klei bi blah klei hdĭp mngăt, knang kơ Klei Aê Diê Blŭ dưi tơl truh hruê bi tuôm hŏng Khua Yang.

Mâo mơ̆ klei soh Yang Mngăt Jăk ƀuah mkra hlăm ai tiê drei ƀiădah drei dôk hngah?

Wah lač: Ơ Khua Yang, akâo kơ Ih đru kâo pral thâo hŏng klei blŭ hlăm ai tiê, čiăng kơ kâo kjăp klei đăo leh anăn dôk hlăm Khua Yang dưn klei hdĭp jăk mơak Ih brei. Kâo wah lač hlăm Anăn Khua Yang Yêsu Krist, Amen.

Dlăng Klei Aê Diê Blŭ hlăm tlâo thŭn: Y-Yêrêmi 40

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Kênh Youtube BHKTHN:

https://www.youtube.com/c/bhkthn

The post Klei Đăo Leh Anăn Ai Tiê Kpă Jăk – 21/11/2025 appeared first on Hội Thánh Tin Lành Việt Nam.