Klei Aê Diê Blŭ: II Klei Yăl Dliê 34:3-7

Êlan kliăng: “Kyuanăn yơh, Ơ phung kâo khăp, đuĕ bĕ mơ̆ng klei kkuh rup yang” (I Kôrantô 10:14 )

Klei êmuh ksiêm mĭn: Thŭn tal pluh dua kiă kriê, ya klei Mtao Jôsia kčưm dơ̆ng ngă? Si ñu ngă leh klei anăn? Hruê anei, ya rup yang brei drei lui?

Leh “kčưm dơ̆ng duah Aê Diê” mâo pă thŭn, truh hlăk truh dua pluh thŭn, Mtao Jôsia “bi doh čar Yuđa leh anăn ƀuôn Yêrusalem”. Mtao bi doh jih rup yang, anôk kkuh mpŭ leh anăn kdrăp mnơ̆ng kkuh kơ rup yang msĕ si Asêra, Baal…(êlan 3-4), phung rup yang mơ̆ng ƀuôn sang Sidôn, Čhêmôs, Môap, Milkôm (II Bruă Mtao 23:13 ). Mtao bi rai jih rup yang hŏng kyâo leh anăn ruh krah, ñu bi mčah đơ điêt phung rup yang Asêra, rup kač, leh anăn rup tuh tia; ñu bi ƀhĭ rup anăn leh anăn pruê bruih anăn ti dlông msat phung ngă yang. Mtao čuh klang phung khua ngă yang tue ti dlông knưl diñu, bi klưh hĕ knưl, bi ƀhĭ phung rup yang, rup krah, druôm hĕ jih jang knưl čuh mnơ̆ng ƀâo mngưi. Mtao ăt suôt hĕ jih jang phung mjâo leh anăn phung mdian leh anăn jih jang mnơ̆ng Yêhôwa bi êmut mâo hlăm čar Yuđa leh anăn hlăm ƀuôn Yêrusalem (II Bruă Mtao 23:24 ).

Mtao lŏ nao hlăm “krĭng Manasê, Êphraim, Simêôn, truh ti krĭng Naptali”, jing dŭm ƀuôn ti kwar dưr čiăng bi mdoh, leh anăn lŏ wĭt ti Yêrusalem. Kyua Israel ti kwar dưr mâo Asiri plah miă leh, phung ƀuôn sang arăng mă jing hlŭn leh. Hlăm ênuk anăn, Ala mtao Asiri êdu awăt leh kyua anăn Mtao Jôsia dưi bi rai jih rup yang ti dŭm krĭng anei.

Klei Mtao Jôsia tui duah Aê Diê amâo djŏ knŏng hlăm ai tiê ôh ƀiădah lŏ bi êdah hlăm bruă ngă lăm lui klei kkuh kơ rup yang čiăng ba phung ƀuôn sang lŏ wĭt kkuh kơ Aê Diê. Klei hdĭp phung đăo kơ Krist ăt brei jing klei hdĭp tui duah Aê Diê, amâo djŏ knŏng hlăm klei mĭn, ai tiê ôh ƀiădah wăt hŏng bruă ngă lăm lui djăp rup yang hlăm klei hdĭp. Hŏng phung đăo kơ Krist, rup yang jing djăp mta mnơ̆ng drei knang hrô kơ knang kơ Aê Diê. Tơdah hlăm ênuk Mtao Jôsia, ênoh rup yang, knưl ngă yang leh anăn klei kkuh kơ rup yang lui mơ̆ng dŭm ênuk mtao êlâo jing lu snăk, snăn hruê anei ênoh mnuih leh anăn klei kkuh kơ rup yang ăt lu mơh. Rup yang ênuk mrâo mrang mâo klei bi êdah mrâo. Anăn năng ai jing klei đăo soh čhuai, prăk mah, anôk bruă, klei tŭ jing, klei siam, ya klei drei đăo srăng ba klei jăk mơak leh anăn klei mơak hrăp hrô kơ knang kơ Aê Diê. Anăn năng ai jing đĭng blŭ, phim rup, ya mta drei khăp leh anăn pioh lu mmông hĭn kơ Aê Diê…Brei drei răng kyua rup yang hlăm djăp ênuk ăt mâo lu snăk leh anăn lu rup mdê mdê, čiăng mplư drei amâo kkuh mpŭ kơ Aê Diê hŏng klei djŏ klă.

Akâo kơ Khua Yang brei drei knang kơ Aê Diê čiăng gĭr lăm lui jih djăp rup yang hlăm klei hdĭp. Brei gĭr lăm lui, bi rai, bi klưh, bi lik ƀhĭ rup yang hlăm ai tiê čiăng kơ diñu lă lar amâo lŏ dôk ôh leh anăn mpŭ hlăm klei hdĭp drei ôh.

Drei ƀuh pô dôk mâo ya rup yang brei lăm lui?

Wah lač: Ơ Khua Yang, akâo kơ Ih brei kâo thâo kral ya klei jing leh rup yang hlăm ai tiê leh anăn klei hdĭp kâo, akâo kơ Ih pap brei, leh anăn akâo kơ Khua Yang đru kâo djăp ai ktang čiăng lăm lui ñu lă lar. Kâo ƀuăn knŏng kkuh mpŭ kơ Aê Diê leh anăn khăp kơ Ih hĭn kơ jih jang mnơ̆ng. Kâo wah lač hlăm Anăn Khua Yang Yêsu Krist, Amen.

Dlăng Klei Aê Diê Blŭ hlăm tlâo thŭn: Y-Yêrêmi 43

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Kênh Youtube BHKTHN:

https://www.youtube.com/c/bhkthn

The post Lui Klei Kkuh Kơ Rup Yang – 24/11/2025 appeared first on Hội Thánh Tin Lành Việt Nam.