I Timautes 1:12-17

Nqe cim:

“…tiamsis Vajtswv tseem hlub kuv. Qhov uas Vajtswv hlub kuv li ntawd, twb yog Vajtswv qhia rau sawvdaws paub hais tias txawm yog kuv muaj txim loj dua sawvdaws los Yexus Khetos tseem ua siab ntev rau kuv thiab. Yexus Khetos ua li ntawd yog nws ua yamntxwv qhia rau cov neeg uas yav tom ntej yuav los ntseeg nws thiab yuav tau txojsia ntev mus ibtxhis kom lawv paub hais tias Yexus tseem ua siab ntev rau lawv ib yam li Yexus ua rau kuv lawm.” (I Timautes 1:16 )

Lus nug rau sawvdaws xav:

–       Timthawj Paulus ua Vajtswv tsaug txog tej yam dabtsi?

–       Nyob hauv lo lus ua Vajtswv tsaug ntawd, nws hais dabtsi txog Vajtswv thiab hais dabtsi txog nws tus kheej?

–       Peb yuav qhia dabtsi los ua pov thawj rau Txojmoo Zoo uas ci ntsa iab?

Tom qab hais txog tej teebmeem uas xibhwb Timautes yuav ntsib thaum ua Vajtswv haujlwm hauv Pawg Ntseeg Efexus, uas yog teebmeem nrog cov neeg “qhia tej zaj uas tsis tseeb” thiab “ua txhua yam tsis raws li Vajtswv Txojlus qhia”, Timthawj Paulus tau tawm lus ua Vajtswv tsaug. Dhau tej lus ntawd, nws qhia rau peb pom hais tias tus neeg uas muaj “txoj xov zoo tsim txiaj uas hais txog Vajtswv uas tsim nyog qhuas” yuav zoo li cas (I Timautes 1:3-11 HMOWSV).

Timthawj Paulus hais tawm ob qhov laj thawj uas nws ua Vajtswv tsaug. Nws hais tias: “Kuv ua nws tsaug, rau qhov nws suav hais tias tsimnyog kuv ua nws tes haujlwm, nws thiaj tsa kuv ua” (nqe 12). Tom qab ntawd, txij nqe 13-16, Timthawj Paulus hais txog qhov sib txawv ntawm nws lub neej ua ntej thiab tom qab uas ntseeg tus Tswv: Thaum ub, nws “thuam – tsimtxom – ua saib tsis taus” Vajtswv; tiamsis hnub no, nws tau txais Vajtswv txoj koob hmoov cawm dim lawm. Qhov no qhia rau peb pom hais tias ob qhov laj thawj uas nws ua Vajtswv tsaug hais saud yim huab tshwjxeeb, tus neeg muaj txim loj dua cov neeg uas muaj txim huv tibsi tsis yog tsuas tau cawmdim xwb, tiamsis nws tseem tau Vajtswv siv los “ua yamntxwv qhia rau cov neeg uas yav tom ntej yuav los ntseeg nws thiab yuav tau txojsia ntev mus ibtxhis” (nqe 16).

Muaj peb yam uas peb kawm tau dhau ntawm Timthawj Paulus lo lus ua Vajtswv tsaug. Qhov ib, nws tsis hais tias: “Kuv ua Vajtswv tsaug vim kuv yog tus ncaj ncees” lossis “vim kuv yog tus uas ua Vajtswv tes haujlwm.” Tiamsis Timthawj Paulus hais tias: “Kuv ua nws tsaug”, vim “Nws suav hais tias tsimnyog kuv ua nws tes haujlwm, nws thiaj tsa kuv ua”, vim “Vajtswv tseem hlub kuv” (nqe 13, 16), thiab vim “Yexus Khetos ua li ntawd yog nws ua yamntxwv qhia rau cov neeg uas yav tom ntej yuav los ntseeg nws thiab yuav tau txojsia ntev mus ibtxhis kom lawv paub hais tias Yexus tseem ua siab ntev rau lawv ib yam li Yexus ua rau kuv lawm” (nqe 16). Hais raws lwm seem, mas Timthawj Paulus zeem paub tseeb nws lub meejmom, nws tes haujlwm, thiab nws lub siab npuab Vajtswv puavleej yog vamkhom Vajtswv txoj kev hlub xwb. Thaum peb nyeem lo lus ua Vajtswv tsaug ntawd, peb pom tias Vajtswv thiaj tau koob meej xwb, tsis yog nws. Qhov ob, Timthawj Paulus saib qhov kev pauv hloov ntawm nws tus kheej yog ib qho timkhawv ciaj sia rau Txojmoo Zoo uas ci ntsa iab. Qhov peb, Timthawj Paulus tsis yog tsuas qhia Timautes txog tej lo lus “tsis txhob” thiab “yuav tsum” lossis tej haujlwm xwb, tiamsis nws tseem qhia rau tus koom nrog nws ua haujlwm ntawd zaj timkhawv hais txog txiaj ntsig ntawm Txojmoo Zoo rau nws lub neej thiab nws txoj haujlwm.

Lub neej nrog tus Tswv mus ntawm txhua tus ntseeg yuav tsum yog ib zaj timkhawv ciaj sia qhia txog Txojmoo Zoo uas ci ntsa iab. Los ntawm nplooj siab nco Vajtswv txiajntsig, peb txhua tus yuav tsum npaj txhij qhia tej ntawd rau peb cov kwvtij uas koom tib txoj kev ntseeg thiab koom tes ua Vajtswv haujlwm. Peb tej lus ua Vajtswv tsaug thiab paub nco Vajtswv txiajntsig yuav txhawb kom peb koom siab qhuas Vajtswv lub koob meej mus ibtxhis li.

Thov Vajtswv,

Tus Tswv, thov pab kom nyuam yaus to taub tob txog Koj txojkev cawmdim, kom txojkev cawmdim ntawd niaj hnub ua laj thawj rau nyuam yaus ua tsaug thiab ua Koj tes haujlwm. Thov kom nyuam yaus kuj qhia txog Koj txoj koob hmoov ntawd los txhawb kom sawvdaws koom siab qhuas Koj. Nyuam yaus tuav Yexus Khetos lub npe thov, Amees.

Puas muaj zaum twg uas peb tej lus ua tsaug ho muaj tej lus qhuas peb tus kheej nkaum

Nyeem Vajluskub hauv peb lub xyoos: Yelemis 13

Kênh Youtube BHKTHN:

https://www.youtube.com/c/bhkthn

The post Timkhawv Ntawm Txoj Moo Zoo Lub Tshwjchim – 25/10/2025 appeared first on Hội Thánh Tin Lành Việt Nam.