Phau Ntawv Nkauj 1:1-6

Nqe cim:

“Tus Tswv saib xyuas cov neeg ncaj ncees thiab coj lawv txoj hauv kev, tiamsis cov neeg ua phem tabtom taug txojkev puastsuaj” (Phau Ntawv Nkauj 1:6)

Lus nug rau sawvdaws xav:

–       “Cov neeg ua phem” tau hais zoo li cas?

–       “Cov neeg phem txojkev” yog dabtsi?

–       Tus neeg phem tau muab piv zoo ib yam li npluag nplej muaj lub ntsiab li cas?

–       Peb ua neej li cas thaum muab tus Tswv ua thawj rau yus lub neej?

“Tus neeg phem” tau Phau Ntawv Nkauj 1:1-2 hais tias yog neeg siab phem, ua txhaum thiab tsis hwm Vajtswv. Cov neeg no tawmtsam Vajtswv hauv txojkev xav, kev hais lus thiab kev ua. Tus neeg phem kuj muaj lub ntsiab hais txog cov neeg uas tsis ua raws li Vajtswv tej lus qhia.

“Cov neeg phem txojkev” lossis “cov neeg txhaum txojkev” yog qhov kev ua neej ntawm tus neeg tsis ntseeg Vajtswv ua. Lawv saib tsis taus Vajtswv txoj Kevcai, khavtheeb, ua raws li lub siab qub qhia thiab ua raws li lub ntiajteb nyiam. Lawv ua rau Vajtswv chim los ntawm tej lus hais, pe mlom, coj raws li lwm haivneeg tej kevcai (II Xwmtxheej Vajntxwv 33:1-9). Lawv xaiv ua neej qia dub, ruam thiab tsis nyiam ua zoo. “Thaum kawg cov neeg ntawd yuav raug kev puastsuaj, lawv muab tej kev phem kev qias los saib hlob dua lwm yam huv tibsi. Yam uas twb tsimnyog lawv txajmuag los lawv tseem muab los khav, thiab lawv tsuas xav txog tej uas yog ntiajteb li xwb” (Filipis 3:19 ). Tus neeg phem tau muab piv zoo li tej npluag nplej lossis tej khoom liamsim tsis muaj nqis, raug cua ntsawj ya ri niab. Thaum kawg, lawv tsis tau nrog Vajtswv haivneeg nyob thiab yuav raug txim (nqe 5).

Cov neeg tawmtsam Vajtswv, nws tsis yog cov neeg phem zoo li neeg huab noj huab haus, tua neeg, dag ntxias xwb nws kuj yog cov neeg tswj kev ua zoo tiamsis tsis paub tias Vajtswv yog tus tsim txhua yam, Nws yog tus teeb txoj kevcai thiab yuav rau txim rau lub ntiajteb. Lawv tsis tso tej kev txhaum raws li tus Tswv qhia tiamsis lawv zais, ua tus tsis paub lossis ua zoo li tus neeg coj dawbhuv.

Tus cevlus Yaxayas tau hais tias, “Peb txhua tus puavleej tau ua txhaum huv tibsi; txawm yog tej haujlwm zoo uas peb ua los puavleej qias zoo ib yam li txoj phuam uas tsis tau muab ntxhua… (Yaxayas 64:6). Tsis muaj leejtwg tau suav tias dawbhuv los ntawm yus haivneeg, kev ntseeg lossis tej haujlwm zoo uas yus ua li. Tsuas yog Vajtswv txojkev hlub thiab kev dawbhuv ua rau cov neeg uas ntseeg Tswv Yexus, tus uas tuag txhiv neeg ntiajteb tej kev txhaum ua tau neeg ncaj ncees xwb. “Yexus teb Thaumas hais tias, Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau” (Yauhas 14:6). Qhov uas xyaum ua zoo, pab tibneeg kom tau kev cawm dim zoo yam li yog, tiamsis Vajtswv Txojlus hais tias, qhov ntawd cawm tsis tau sab ntsujplig. “Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag” (Pajlug 16:25 ).

Peb txhua tus cheemtsum ntsia pom yus. Thaum caw Tswv Yexus los ua yus tus Tswv, peb yuav tau muaj tej kev xav,  kev hais lus lossis kev ua tabtom tawmtsam Vajtswv tso tseg, muab tej kev khavtheeb nyob hauv yus kev xav, thiab tsis txhob hais tej lus tsis zoo tawm hauv peb lub qhov ncauj tuaj. Cia li taug txojkev ncaj ncees thiab qaij deb cov neeg phem txojkev.

Thov Vajtswv,

Tus Tswv! Nyuam yaus yog ib tug neeg txhaum tiamsis tau Koj hlub, Koj cawm thiab pub lub meejmom los ua Koj menyuam. Thov Koj pab kom nyuam yaus nyiam kawm Vajtswv Txojlus, mloog Koj hais, tshuaj kev ua neej, lees txim thiab khiav deb txojkev phem. Nyuam yaus tuav Tswv Yexus lub npe thov, Amees.

Ib tsoom mloog uas hmov thiab tshua,

Zaj kawm no pab rau peb hloov yam dabtsi hauv kev ua neej?

Nyeem Vajluskub hauv peb xyoo: Yelemis 39

Kênh Youtube BHKTHN:

https://www.youtube.com/c/bhkthn

The post Tus Neeg Phem Txojkev – 20/11/2025 appeared first on Hội Thánh Tin Lành Việt Nam.