Phau Ntawv Nkauj 116:3-11

Nqe cim:

“Tus TSWV tiv thaiv tus uas tas kev cia siab; thaum kuv raug kev txomnyem, nws cawm kuv dim” (Phau Ntawv Nkauj 116:6)

Lus nug rau sawvdaws xav:  

–       Tus sau tabtom poob rau txoj kev txomnyem twg?

–       Tus Tswv tau ua dabtsi rau nws thaum raug txomnyem li ntawd?

–       Vajtswv tau ua dabtsi rau peb thiab peb yuav tau muaj tus cwjpwm twg thaum paub qhov no?

Tus sau hais tias tus Tswv “tig ntsej mloog” nws “tej lus thov” (Ntawv Nkauj 116:1-2), cov nqe Vajlugkub hnub no ua tim khawv hais tias tus Tswv paub tus sau tej kev txomnyem tiag tiag thiab pab cawm nws dim.

Kx Charles Spurgeon hais tias nqe 3 kos tawm daim duab ntawm cov neeg caum kauv hnub thaud, tus kws caum nqaij nrog rau pab dev vij txhua fab thiab tav tus kauv mus rau kev tws. Tus sau kuj tabtom raug vij ib yam li ntawd ntawm txoj kev mob nkeeg (nqe 3), kev qaug zog ntawm sab ntsujplig (nqe 8), thiab kev dag ntxias ntawm cov neeg nyob ib puag ncig nws (nqe 11). Hauv kev txomnyem uas tas kev cia siab no, tus sau ntseeg ruaj hais tias “Tus TSWV tiv thaiv tus uas tas kev cia siab” (nqe 6).

Ntawm sab ntsuj plig, Vajtswv tau cawm peb dim ntawm lub hwjchim tsaus ntuj dhau los ua Nws menyuam. Txoj kev cawmdim uas peb tau txais tsis yog los ntawm peb txoj kev coj ncaj ncees ua zoo lossis peb txoj kev txawj ntse, tiamsis yog los ntawm Vajtswv kev hlub pub dawb xwb (Efexus 2:4-9). Txoj kev cawmdim yog txoj koob hmoov uas zoo kawg nkaus, yog txujci tseemceeb, yog yam uas muab zais cia lawd ntawm Vajtswv los.

Ntawm sab nqaij tawv, Vajtswv tau cawm peb dim ntawm kev mob nkeeg, kev tu ncua nyiaj txiag, thiab tej kev dag ntxias ntawm lwm tus. Muaj ib qho tshwjxeeb yog lo lus “cawm” hauv tshooj Ntawv Nkauj no yog hais txog cawm lub sijhawm yav dhau los (nqe 8) thiab kuj yog cawm lub sijhawm tamsim no (nqe 6). Ntawd yog qhov vimchiv uas tus sau cia siab rau Vajtswv kev pab cawm rau lub neej yav tom ntej.

Tsis tas li ntawd xwb, tus sau qhia paub hais tias Vajtswv tseem “ua zoo” rau tus uas hwm Nws (nqe 7). “Ua zoo” txhais hais tias ua zoo txaus nkaus thiab ua zoo kawg nkaus. Vajtswv tsis tsuas yog hnov ​​peb tej lus thov thiab cawm peb xwb, tiamsis tseem coj peb mus rau lub neej puv npo thiab npluamias koob hmoov. Vajtswv “ua zoo” tsis tau txhais hais tias Nws tshem peb tej kev sim siab, txomnyem pov tseg, tiamsis yog Nws ua rau peb “tau so” hauv Nws, nyob kaj siab lug hauv txhua lub sijhawm uas muaj kev nyuaj siab (nqe 7; Filipis 4:6-7). Vajtswv kuj “ua zoo” rau peb yog thaum Nws pab peb “txhais kotaw dim qhov uas dawm” hauv tej kev txomnyem sim siab (nqe 8; 1 Kauleethaus 10:13 ) dhau los qhov ntawd kom peb zeem pom hais tias peb me npaum li cas, Vajtswv kev ncaj ncees, kev hlub, thiab muaj hwjchim npaum li cas, kom peb zoo ib yam li timthawj Petus, Tswv Yexus tseem tabtom thov Vajtswv pab peb “kom koj muab siab rau ntseeg. Thiab thaum koj los cuag kuv, koj yuav tsum txhawb koj cov kwvtij zog” (Lukas 22:32 ).

Thov Vajtswv,

Tus Tswv, nyuam yaus ua Koj tsaug rau Koj txoj kev hlub tshua uas loj kawg nkaus pub rau nyuam yaus. Thov Koj qhia thiab pab nyuam yaus loj hlob hauv kev paub Koj kom nyuam yaus kovyeej tej kev mob nkeeg, kev sim siab thiab kev dag ntxias thiab thov pub nyuam yaus muaj sijhawm tau pehawm thiab ua Koj tes haujlwm. Nyuam yaus tuav Tswv Yexus Khetos lub npe thov, Amees. 

Ib tsoom mloog uas hmov tsua,

Peb puas tau saj Vajtswv txoj kev pab cawm hauv kev ua neej?

Nyeem Vajluskub hauv peb lub xyoo: Yelemis 23

Kênh Youtube BHKTHN:

https://www.youtube.com/c/bhkthn

The post Ua Tus Tswv Tsaug Vim Kev Pab Cawm – 4/11/2025 appeared first on Hội Thánh Tin Lành Việt Nam.