Mathiơ 22:23-33 

 “Ning-mônh đĭ-đăng kon bơngai gô iung arih đơ̆ng lôch, đe ưh pă đei tơiŏk băl klo kăn dơ̆ng ôh, lu sư thoi lu linh jang ‘lơ̆ng tơ plĕnh ti.” (Mathiơ 22:30 )

Nơ̆r jet tơchĕng pơwao:

–               Lu bơngai Sađusê ‘noh bu?

–               Lu sư đei jet Kră Yang gah tơdrong kiơ? Kră Yang đei tơl tơwih kơ lu sư thoi yơ?

–               Yua kơ kiơ lu bơ̆n kăl kơ pơnam kơ pơhrăm nơ̆r Kră Yang?

Khul Sađusê jơ̆ lu bơngai adrĕch pơm tih păng mơdrŏng. Lu sư lui đĭ đăng dôm Sơ̆p Hla bơar ‘Bok Kei-Dei Pah so, mălei lu sư drơ̆ng iŏk tơdrong lui lăm pơđăm Sơ̆p Môis chih đĕch khan khŏm pơm kiơ̆ ưh kơ gơh lê̆ ôh. Lu sư ưh kơ drơ̆ng khan đei tơdrong iung arih dơ̆ng đei linh jang ‘lơ̆ng, đei tơdrong rơngei, đei bơhngol păng arih đei yua tơpă yua kơ lu sư lui tơdrong arih lăm minh chăl đĕch. Khul Sađusê năm jet Kră Yang Yêsu, lu sư roi tơlĕch minh tơdrong phara ‘biơ̆ wă pơsĭt khan ưh kơ đei chăl arih đơ̆ng rŏng. kiơ̆ kơ tơdrong juăt đei chih ată khan, “dah ‘nhŏng bu lôch, mi sư adro ưh kơ đei kon, oh sư ‘noh athei iŏk mi sư pơm akăn na pơjing kon kơ ‘nhŏng sư” (trong 24). Đei minh pôm hnam dơnŏ tơpơh ‘nu ‘nhŏng oh păng tơpơh ‘nu ‘nhŏng oh sư noh kư̆m iŏk minh ‘nu akăn na lôch ngăl kư̆m ưh kơ đei kon ngăl mơ̆n. Akăn nhŏng sư iŏk tơpơh ‘nu ‘nhŏng oh sư kiơ̆ tơdrong juăt đei chih ată mălei kư̆m ưh kơ đei bu pơjing kon. Lu sư roi tơdrong lu sư jet, “Na Ih khan  kon bơngai gô iung arih, na mưh lu sư iung arih đơ̆ng lôch ning mônh akăn lu sư noh jing akăn bu kơ lu sư mă tơpă, yua kơ tơpơh ‘nu drŏnglo iŏk minh ‘nu akăn” (trong 2). Kră Yang Yêsu đei tơl tơwih: “Iĕm ưh kơ hlôh tơdrong noh yua kơ iĕm ưh kơ pơwao Sơ̆p Hla bơar ‘Bok Kei-Dei, na iĕm ưh kơ băt sư gơh pơm tôm tơdrong” (trong 29). Kră Yang ăn kơ lu bơngai Sađusê băt lu sư ưh kơ hlôh nơ̆r Kră Yang tôm mah tơpă, ưh kơ hlôh păng tơchĕng ưh kơ ngeh kơ Kră Yang ‘Bok Kei-Dei gơh pơm tôm tơdrong. Lu sư tơchĕng kơ tơdrong juăt mălei tŭk lê̆ tơdrong Kră Yang gơh pơm. Tơdrong âu tơ’bôh ăn lu sư ưh kơ lui kơ tơdrong ‘mêm, tơdrong mơnat ăn, kư̆m thoi tơdrong mơsêh mơyang Kră Yang.

Nơ̆r tơl Kră Yang Yêsu pơih dôm tơdrong bơngai arih lăm pơlei ‘lơ̆ng. Mă mônh,  dôm tơdrong jang lăm pơlei ‘lơ̆ng ưh kơ lei lăi hăm tơdrong jang lăm teh đak âu thoi sa, nhă, klo kăn v.v… Mă ‘bar, tơdrong arih lăm pơlei ‘lơ̆ng jơ̆ ‘lơ̆ng tôm, wă khan ưh kơ đei pơgŏ ưh kơ đei tơchĕng tơdrong kiơ nai dơ̆ng, thoi lăm teh đak âu. Mă pêng, bơngai arih lăm pơlei ‘lơ̆ng jơ̆ arih lăm tơdrong ‘lơ̆ng rŏ thoi linh jang ‘lơ̆ng.

Kră Yang Yêsu tơ’blŏk ăn kơ lu bơngai Sađusê ‘blŏk. Lĕch đơ̆ng Êyiptơ 3:6, nơ̆r Kră Yang khan: “Inh bơih Kră Yang ‘Bok Kei-Dei Abraham, Kră Yang ‘Bok Kei-Dei Ysăk, Kră Yang ‘Bok Kei-Dei Jakôp” Kră Yang ‘Bok Kei-Dei bơih Tơ’ngla arih ling lang na Anăn krao “Inh bơih” lăm dang ei. Hrei âu pêng ‘nu ‘bok kơdră noh đĭ lôch đơ̆ng sơ̆ bơih mălei Sư jơ̆ oei Kră Yang ‘Bok Kei-Dei lu sư. Păng Kră Yang khan, “Kră Yang ‘Bok Kei-Dei ưh kơ sĭ Sư Kră Yang wei lăng gah tơdrong lôch ôh, mălei Sư Kră Yang wei lăng gah tơdrong arih”. Thoi noh hơđăl rơđah hla bơar Pah so đei bơtho gah tơdrong iung arih dơ̆ng đơ̆ng lôch.

Dang ei, bơ̆n kăl kơ ‘măn jơ mă lơ pơhrăm nơ̆r Kră Yang wă kơ rim năr hlôh băt kơ Kră Yang rai hloh, đơ̆ng noh bơ̆n gơh pơjăng pơjăr hăm dôm tơdrong lui ưh kơ trŏ păng dôm tơdrong lui chroih tơ nai wă pơrăm bơ̆n. Mưh đei nơ̆r Kră Yang, bơ̆n ưh kơ sĭ arih đei yua kơ Kră Yang lăm chăl dang ei đĕch ôh, mălei kư̆m hơmet bơ̆n ten tơnen wă kơ ling lang rơhing gơh arih lăm pơlei ‘lơ̆ng ‘Bok Kei-Dei ‘lơ̆ng rŏ.

Ơ Kră Yang, apinh Ih tơgŭm inh ling lang đŏk păng pơhrăm nơ̆r Kră Yang wă kơ inh gơh kơjăp lăm đon lui mă đơ̆ng tơdrong lui ưh kơ trŏ păng tơdrong lui jrok wă pơrăm inh, krao khan yua anăn Kră Yang Yêsu Krist, Amen.

Bơ̆n pơm liơ wă kơ wơ̆ kơjăp lăm tơdrong Kră Yang mơnat păng lăm tơdrong hlôh wao kơ Kră Yang rim năr?

Đŏk Sơ̆p Hla bơar ‘Bok Kei-Dei lăm pêng sơnăm: Giê-rê-mi 36

Kênh Youtube BHKTHN:

https://www.youtube.com/c/bhkthn

The post Tơdrong Arih Chăl Đơ̆ng Rŏng – 17/11/2025 appeared first on Hội Thánh Tin Lành Việt Nam.