D'engraziar sia vart sportiva ha Ursina Condrau a ses bab. Sco mattatscha ha ella cunzunt fatg passlung, era cursas. Dal sport ha ella emprendì da morder sin ils dents, da star vidlonder. E quai gida er en la vita professiunala sco tgirunza sin la staziun intensiva dal l'Ospital chantunal a Cuira.

Il cumbat cun auters dovra Ursina Condrau per surmuntar sasezza. Lura mordins anc bler pli fitg, di ella en il «Profil».

Ursina Condrau sa participescha cun ses partenari Sascha Deplazes al Swiss Epic. Quai è ina cursa da 5 dis, ch'è 341 kilometers lunga ed i va 11'400 meters ensi e 12'500 meters engiu. Tut quai sin il velo da muntogna, tranter La Punt, Tavau e Cuira.

Il Swiss Epic fa ella per il plaschair. Igl è il plaschair d'ir ora en la natira, da mudregiar il corp, da participar ad ina tala cursa. Quai dat bleras emoziuns ed è in bel sentiment, di Ursina Condrau.

La gronda sfida è, da betg s'exurir memia fitg il cumenzament da la cursa, da parter en l'energia. E lura er da baiver avunda e da mangiar per betg dar en ina rusna. Ed era l'ir engiu sa esser ina sfida, cunzunt sch'i avess da plover.

Igl è l'emprima giada che Ursina Condrau participescha ad ina tala cursa da 5 dis. Ella spera, ch'ella dumogna fin la fin e che tut va bain, ch'i dat nagins accidents e naginas pannas pli grondas.