Myanmar Revolutionary Tales (တော်လှန်ခြင်းများနှင့်ခေတ်သစ်မြန်မာပြည်)

မျိုးစေ့ပညာကို တစိုက်မတ်မတ် လေ့လာခုံမင်တတ်သော သူမ။ ပြည်သူ့အစိုးရလက်ထက်တွင် မိမိကျွမ်းကျင်ရာဖြင့် နိုင်ငံ့၀န်ထမ်းအဖြစ် တာ၀န်ယူခဲ့သည်။ သူမသတိမထားမိခဲ့သည်ကား မျိုးစေ့နှင့်ပတ်သတ်လျှင် ချဉ်ပေါင် ကန်စွန်းလောက် ဗဟုသုတဖြင့် ပညာရှင်များကို အမိန့်ပေးမည့် မိုးကျရွှေကိုယ် တဖြစ်လဲ စစ်အရာရှိဟောင်း အထက်လူကြီးများကိုပင် ဖြစ်သည်။ ကဏ္ဍပေါင်းစုံကို အုပ်ချုပ်နိုင်သည်ဟူသော ကလေးအတွေးဖြင့် နေရာယူခဲ့ကြသည့် စစ်တန်းလျားပြန်များကြောင့် ကဏ္ဍပေါင်းစုံများစွာ ဆုတ်ယုတ်ခဲ့ရသည်။ နိုင်ငံအ‌တော်များများကို စိုက်ပျိုးရေးကဏ္ဍဖြင့် လေ့လာဆည်းပူးခဲ့သော သူမသည် မြန်မာနိုင်ငံ၏ စိုက်ပျိုးရေးကဏ္ဍအတွက် အခွင့်အလမ်းများစွာကို ဖန်တီးချင်ခဲ့သည်။ သို့သော် သူမအတွက် အခက်အခဲများစွာက ဆီးကြိုနေခဲ့သည်။ စပါးဈေးကွက်၊ တောင်သူကြီးများ၏ အခက်အခဲ၊ လုပ်စားခံရသော နိုင်ငံပိုင် မျိုးစေ့မြေနေရာများ၊ သုံးစားမရသော ဆည်မြောင်းတာတမံစနစ်များနှင့် အနာဂါတ်စီမံချက်များကို သူမ ပြည့်ပြည့်စုံစုံရှင်းပြရင်း CDM လုပ်ရခြင်းရည်ရွယ်ချက်များကို မျှဝေခဲ့သည်။ ဆုံးရှုံးမှုကြီးသော သူမ၏ တော်လှန်ရေးခရီးရှည်နှင့် မိခင်တဦး၏ သောက၊ အတ္တနှင့် ဓမ္မ လွန်ဆွဲပွဲ စသည်တို့ကို စုံစုံလင်လင် ဖော်ပြထားသော ဆရာမမီးမီး၏ "စိုက်ပျိုးတော်လှန် စစ်ကျွန်မခံ" Podcast ကို နားဆင်နိုင်ပြီဖြစ်ပါသည်။

သူမကို ခင်မင်သူတွေက မသော် ဟု ခေါ်ကြသည်။ သူမ၏ဘ၀သည် အာဏာမသိမ်းခင်က ရိုးရှင်းသည်။ ဘာသာပြန်၊ အင်္ဂလိပ်စာဆရာမအဖြစ် Professional ကျကျ လုပ်ကိုင်သူ၊ သူမ၏ကလေးတွေအတွက် မအားမလပ်သည့်ကြားက အချိန်ပေးတတ်သူ၊ ဘ၀ကို ခေတ်မီမီ ဖြတ်သန်းနေသော မိခင်ကောင်း၊ အမျိုးသမီးကောင်း တစ်ဦးဖြစ်သော သူမ။ စစ်အာဏာသိမ်းမှု စတင်ချိန်တွင် သူမ၏ဘ၀တွေ ဇောက်ထိုးမိုးမျှော် ဖြစ်တော့သည်။ စစ်အာဏာသိမ်းမှု၏ နောက်ဆက်တွဲပြဿနာများကို သူမ ကောင်းကောင်းနားလည်ထားသည်။ ထို့ကြောင့် ဆန္ဒပြပွဲများကို အားသွန်ခွန်စိုက်ပါ၀င်ရင်း သူမ ရှာဖွေစုဆောင်းထားသမျှကို နွေဦး တော်လှန်ရေးအတွက် ပုံအောခဲ့တော့သည်။ ဆရာမသော်ဟာ လက်ရှိအချိန်အထိ နွေဦးတော်လှန်ရေးကို အားသွန်ခွန်စိုက် ပါ၀င်နေသော၊ လေးစားထိုက်သော သူတစ်ဦးဖြစ်သည့်အပြင် သာမန်အမျိုးသမီးတစ်ဦးအတွက် မတွေးဖူးမကြုံဖူးလောက်တဲ့ အခက်အခဲမျိုးစုံကို ကျော်ဖြတ်ရင်း တော်လှန်ရေးခရီးကို ရှေ့ဆက်နေသော သူမရဲ့ ခိုင်မာတဲ့ ခံယူချက် အတွေ့အကြုံတွေဟာ ကျတော်တို့ကိုတောင် ပါးစပ်အဟောင်းသား ဖြစ်စေရပါတယ်။ ဆရာမသော်ဟာ သူမရဲ့မျိုးဆက်တခုစာ တာ၀န်ပျက်ကွက်မှုကြောင့် လက်ရှိလူငယ်တွေ အသက်တွေရင်းနေရတယ်လို့ ခံယူထားသူတစ်ဦးဖြစ်ပြီး သူမအသက်ရှင်နေသမျှကာလပတ်လုံး တော်လှန်ရေးအပေါ် အကောင်းဆုံး ကြိုးစားကူညီနေသော အမျိုးသမီးတစ်ဦးလည်းဖြစ်ပါတယ်။ကင်ဆာရောဂါခံစားနေရသော သားငယ်အတွက် အချိန်ပေးဖို့ရာ တော်လှန်ရေးကို သွေဖယ်ရမှာ ကြောက်မိတဲ့သူမဟာ နောက်ဆုံးမှာ တော်လှန်ရေးကိုပဲ ရွေးချယ်ခဲ့တဲ့ သူမ။ ဒေါ်အောင်ဆန်းစုကြည်ကို လေးစားအားကျသည့်အပြင် အမေစုကဲ့သို့ စွန့်လွတ်ခြင်းမျိုးကို ရွေးချယ်ခဲ့တဲ့ သူမအကြောင်း၊ တော်လှန်ရေးအပြီးသတ်မနိုင်ခင် တက်မထောင်ဘဲ နိုင်ရာတာ၀န်ကို ဝိုင်းထမ်းကြဖို့ မျက်ရည်တွေကြားကနေ ပြောပြခဲ့တဲ့ သူမအကြောင်းကို တော်လှန်ခြင်းများနှင့်ခေတ်သစ်မြန်မာပြည် podcast မှာ နားဆင်နိုင်ပြီဖြစ်ပါသည်။

လူငယ်လုပ်ငန်းရှင်တစ်ယောက် ဖြစ်လာဖို့ စိတ်အားထက်သန်သူ၊ အင်ဂျင်နီယာတစ်ယောက်အနေနဲ့ အသက်မွေးရင်း မြို့နယ်တိုင်းမှာ အားကစားရုံဖွင့်ချင်သူတစ်ယောက်၊ အိပ်မက်တွေကို အကောင်အထည်ဖေါ်ရင်း စစ်အုပ်စု၏ မတော်လောဘကြောင့် အကုန်ပျက်စီးသွားရသော ပြည်သူထဲက လူငယ်တစ်ဦး။ သူ့အိပ်မက်တွေအကောင်အထည်ဖော်နေသော်လည်း အာဏာသိမ်းမှုဖြစ်လာသည့်အချိန်တွင် တုံ့ဆိုင်းမနေ။ ရသည့်နည်းဖြင့် ဆန္ဒပြသည်။ သို့သော် စစ်ကောင်စီက အလွတ်မပေး၊ အင်းစိန်ထောင်နန်း စံရတော့သည်။ ထောင်တွင်းနေ့ရက်တွေကို စိတ်အားမငယ်၊ ပညာပင် ရသေးသည်ဟု သူဆိုသည်။ ငါးလကြာ၊ ပြန်လွတ်လာပြီး ထောင်တွင်း နိုင်ငံရေးအကျဉ်းသားတွေအတွက် စာအုပ်၊ရိက္ခာ၊ လိုအပ်ရာရာတွေ သူပို့သည်။ ရည်ရှည်ရပ်တည်နိုင်ရန် အလုပ်ပြန်လုပ်သည်။ သို့သော် သူ့အတွက်သေချာသည်ကား စစ်ကောင်စီလက်အောက်တွင် ဘယ်အရာမှ မရှင်နိုင်သည်ကို သူသိထားသည်။ ထောင်မှ လွတ်ပေးသော်လည်း တိတ်တဆိတ် နောက်ယောင်ခံမှုများနှင့် မရေရာသော အာမခံချက်တွေကို ကျောခိုင်းပြီး တတိယနိုင်ငံသို့ ရှောင်ထွက်ခဲ့သည်။ ရရာအလုပ် လုပ်ရင်း ရေကြည်ရာ မြက်နု ရှာတော့မည်ဟု သူဆိုသည်။ တော်လှန်ရေး အစိုးရအပေါ် လျော့တိလျော့ရဲဖြစ်နေသည်ဟုသာ သူထင်သည်။ ပြည်သူ့အစိုးရဖြစ်လင့်ကစား ပြည်သူ့ရင်ခွင်နှင့် ဝေးနေသောကြောင့် ဆိုးနေသော သားတွေ ရှိနေသည်ဟု သူပြောသည်။ ပုံမှန်အခြေအနေမှာ လက်ခံနိုင်စရာရှိသော်လည်း လက်ရှိအချိန်အတွက် တာ၀န်နှင့် အခွင့်အရေးကို နားလည်သင့်ပြီဟု သူမျှဝေခဲ့သည်။ ထိုသူသည် အင်ဂျင်နီယာ Gym နည်းပြ ကိုမင်းသန့်ပင် ဖြစ်ပါသည်။ သူ၏ဘ၀အကြောင်း တစေ့တစောင်းကို တော်လှန်ခြင်းများနှင့် ခေတ်သစ်မြန်မာပြည်တွင် လေ့လာနားဆင်နိုင်ပြီဖြစ်ပါသည်။

LGBT အခွင့်အရေးအတွက် တက်ကြွလှုပ်ရှားသူ။ သူမ ပေးတဲ့ သင်တန်းတွေကနေ တဆင့် မိမိကိုယ်မိမိ လက်ခံသွားနိုင်တဲ့သူတွေ၊ ကိုယ့်ဘ၀ကိုယ် ယုံကြည်တတ်သွားသူတွေ မနည်း။ သူ့အမည်ကား ပိုင်။ အမျိုးသမီးချင်း စိတ်၀င်စားသူတစ်ယောက်အဖြစ် မိမိကိုယ် မိမိ လက်ခံခဲ့သူ၊ ခန္ဓာကိုယ်အောက်ပိုင်း ဆုံးရှုံးလုနီးပါးအထိ ဆန္ဒပြခဲ့သူ၊ ပုံမှန်လမ်းပြန်လျှောက်ဖို့ တစ်နှစ်ကျော်ကြာ ကြိုးစားခဲ့ရသူ အခက်အခဲများစွာကို မေတ္တာဖြင့် ကျော်ဖြတ်ခဲ့သူတစ်ယောက်၏ ဘ၀အကြောင်း။တော်လှန်ရေးအပေါ် မျှော်လင့်ချက်ကြီးသော လူငယ်တစ်ယောက်ဖြစ်သည့်အပြင် ပြည်သူ တစ်ယောက်ချင်းစီတိုင်းကို ရသင့်ရထိုက်သော အခွင့်အရေးတိုင်း ရစေချင်သော သူမ။ ဘ၀ရည်မှန်းချက်ကို နည်းပြကောင်းတစ်ယောက်ဖြစ်လာဖို့ သက်မှတ်ထားသူ၊ တော်လှန်ရေး၏ နိုင်ခြင်း ရှုံးခြင်း၏ အရေးပါမှုကို ရိုးရိုးရှင်းရှင်း မြင်သာလာအောင် ပြောပြနိုင်သော သူမ၏ စကားများကို တော်လှန်ခြင်းများနှင့် ခေတ်သစ်မြန်မာပြည်မှာ နားဆင်နိုင်ပြီဖြစ်ပါတယ်။

၂၀၀၇ ဩဂုတ်၊ စက်တင်ဘာ လများတွင် ဖြစ်ပွားခဲ့သော ရွှေဝါရောင်တော်လှန်ရေး၏ ခေါင်းဆောင်တစ်ဦးဖြစ်ခဲ့သော ဥူးဂမ်ဘီရ။ ငယ်ရွယ်စဉ်ကတည်းက စစ်အာဏာရှင်၏ ဆ်ိုးသွမ်းရက်စက်မှုကို စာအုပ်စာပေမှတဆင့် ကိုယ်တွေ့ကြုံရပြီး ရဟန်းဘ၀မှစ၍ စစ်အာဏာရှင်ဆန့်ကျင်ရေး မြေအောက်တော်လှန်ရေးကို ဦးဆောင်ခဲ့သူ။ ဘာသာ သာသနာကို ခုတုံးလုပ်တတ်သော စစ်အာဏာရှင်၏ ကြောင်သူတော်မျက်နှာဖုံးကို ခွါချပေးနိုင်ခဲ့သောသူ။ပြည်သူလူထု၏ အခက်အခဲနှင့် ဆင်းရဲမွဲတေမှု မြစ်ဖျားခံရာသည် စစ်အာဏာရှင်စနစ်ဖြစ်သည်ကို ပိုမိုထင်ရှားအောင် ထောက်ပြပေးနိုင်ခဲ့သော ရွှေဝါရောင် အရေးအခင်း၏ ဦးဆောင်သူ ဥူးဂမ်ဘီရ။လက်ရှိ နွေဦးတော်လှန်ရေးအပေါ် နိုင်သမျှ ၀န်ထမ်းရင်း သူ၏အတွေ့အကြုံ၊ သုံးသပ်ချက်၊ ဘ၀ဖြတ်သန်းမှုများကို တော်လှန်ခြင်းများနှင့်ခေတ်သစ်မြန်မာပြည်မှ ဆက်သွယ်မေးမြန်းထားသည်ကို အပိုင်း ၃၁ တွင် နားဆင်နိုင်ပြီဖြစ်ပါသည်။

ကိုဗစ်တာ၊ LGBT ဆရာ၀န်တ‌စ်ယောက်၊ နွေဦးတော်လှန်ရေးကို ဘ၀နဲ့ရင်း ခေါင်းတိုး၀င်ခဲ့သူ။ နိုင်ရာ၀န်ထမ်းရုံသာမက မနိုင်၀န်ကိုပါ တော်လှန်ရေးအတွက် ထမ်းပေးသူ။ မိဘပတ်၀န်းကျင်ရဲ့ ဖိနိုပ်ရှုတ်ချမှုတွေကြားက ဘ၀ရပ်တည်ချက်ကို ရဲရဲရင့်ရင့် ဖွင့်ဟ၍ ရှေ့ဆက်ရဲသူ။ တော်လှန်ရေးဆိုသည်မှာ ကိုဗစ်တာနဲ့ မစိမ်း။ ငယ်ငယ်ကတည်းက တော်လှန်ခြင်းနှင့် ရင်းနီးခဲ့ရပြီး ရပ်တည်ချက်ခိုင်မာသူ။ ထိုသို့သော ဆရာ၀န်တစ်ယောက်၏ တော်လှန်ရေးခရီးကြမ်းကား မချော။ ဆေးရုံက လှည့်မကြည့်၊ Blacklist အသွင်းခံရသော်လည်း သူမမှု။ ရသမျှအားနှင့် ရှေ့ဆက်သည်။ သူ့ပါတနာနှင့်အတူ ကယား(ကရင်နီ) ဖက်ကို တော်လှန်ရေး ခရီးရှည် ဆက်ခဲ့ရသည်။ သူ၏ တောတွင်းအတွေ့အကြုံများကား အိမ်မက်ဆန်ဆန်ပင်။ ငယ်ငယ်က လက်ပြဖူးသော လေယာဉ်သံကြားလျှင် ပြားနေအောင်၀ပ်ရာမှနောက်ပိုင်း ထမင်းစားပင်မပြတ်တော့။ ရေမရ၍ အရေပြားရောဂါပေါင်းစုံကို ဂရုစိုက်ပေးရသည်။ COVID အတွက်လည်း ရှိတာသုံး၍ အဆင်ပြေအောင် ကျော်လွှားခဲ့ရပုံတွေ၊ ဗိုက်ပွင့်လူနာကို အသက်ကယ်ခဲ့ရပုံတွေကို ဘယ်တော့မှ မေ့တော့မည်မဟုတ်ဟု သူဆိုသည်။ ကိုဗစ်တာရဲ့ စိတ်လှုပ်ရှားစရာ အားတက်စရာ အံအားသင့်စရာ များစွာကို ယခု podcast တွင် နားဆင်နိုင်မှာ ဖြစ်ပါတယ်။

ကိုကျော်၊ အင်ဂျင်နီယာ၊ သိပ်သဘောကောင်း၊ လူချစ်လူခင်ပေါတဲ့သူ။ အာဏာစသိမ်းပါပြီဆိုကတည်းက ဆန္ဒပြသူ။ အစောဆုံးစစ်သင်တန်းတက်သူ။ နွေဦးတော်လှန်ရေးကို ကျရာနေရာကနေ သူထမ်းသည်။ ကျတော် မထင်ထားသည်ကိုပင် သူလုပ်သည်။ နောက်ဆုံး အဆင်မပြေဖြစ်သည့်ကြားမှ ရသမျှရှေ့ဆက်ရင်း နောက်ဆုံး လက်နက်ကိုင်လမ်းစဉ်ကို စွန့်လွတ်ရသည်။ သို့သော် သူရသမျှ အိမ်နှင့်အတိုက်အခံလုပ်ကာ ရှေ့သို့ပို့သည်။ ရှာသမျှ မလောက်၊ စိတ်၀င်တစား မေးမိသည်။ သူ့အဖြေကား မိမိအနာဂါတ်အပါအ၀င် အနာဂါတ်ပေါင်း များစွာအတွက် ရင်းနှီးမြုပ်နှံမှုလုပ်သည်ဟု ဆိုသည်။ ဆီရဆီ၊ဆန်ရဆန်၊ ရသမျှ အကုန်ပို့ပေးသည်။ လက်တွဲဖော်ကောင်းနှင့်လည်း ဆုံ၍ စိတ်တူကိုယ်တူ အပြိုင်အဆိုင် ပံ့ပိုးကူညီကြသည်။ သူထင်မထားတာ တခုရှိသည်ဟု ၀န်ခံသည်။ ဘ၀ရင်း အသက်ရင်းသော သူတွေများခဲ့သလောက် ကျောင်းတွေ တက္ကသိုလ်တွေ အလုအယက် တက်ကြသူတွေလည်း များသည်။ လူငယ်တွေ အဲ့လောက် နှလုံးသားနှင့် ဦးနှောက် သိမ်ဖျင်းမည်ဟု သူမထင်ခဲ့ဟု ဆိုသည်။ ဘာတွေဘယ်လိုပင် ဖြစ်ပါစေ အားနဲ့မာန်နဲ့ ရှေ့ဆက်နေကြသော ကိုကျော်လို အဖိုးတန်ပြည်သူများက နွေဦးတော်လှန်ရေးကို ဖော်ဆောင်နေကြောင်း ယခု podcast မှာ နားဆင်နိုင်ပြီဖြစ်ပါတယ်။

ဆရာဇင်ဇေလွင်၏ ကြယ်ငါးကောက်သူနှင့်ကြယ်ကြွေနိုင်ငံ ပထမပိုင်းကို နားဆင်ပြီး ဒုတိယပိုင်းအတွက် စောင့်မျှော်နေမည်ကို ယုံကြည်ပါတယ်။ Podcast ရဲ့ အနှစ်သာရဖြစ်တဲ့ နားဆင်ရင်း တွေးခေါ်နိုင်မယ့် အကြောင်းအရာတော်တော်များများကို ဆွေးနွေးပြောပြသွားတဲ့ podcast တစ်ခုလည်း ဖြစ်တာကြောင့် ပေါ့ပေါ့ပါးပါးနားဆင်ရင်း လေးလေးနက်နက်တွေးစရာတွေ လုပ်စရာတွေ မြင်လာမယ်လို့ ယုံကြည်ပါတယ်။ ကျတော်တို့နိုင်ငံမှာ ဆရာဇင်ဇေလွင်လို ကြယ်ငါးကောက်သူတွေ ရှိခဲ့ပါတယ်။ ယခုကာလမှာဆိုရင် ပိုလို့တောင် များပါသေးတယ်။ အဲ့လို လူတွေဟာ အခုဆို ကောင်းကင်မှာ တရှိန်ထိုးတောက်ပနေတဲ့ ကြယ်တွေ မကြွေစေဖို့အရေး နိုင်ရာတာ၀န်ကို မျှထမ်းနေကြပါတယ်။ ရှိသမျှ ရှာထားသမျှတွေကို ချရင်းပြီး လောင်းကြေးထပ်ခဲ့တဲ့ ဆရာဇင်ဇေလွင်ရဲ့ တော်လှန်ရေးခရီး ဒုတိယပိုင်း ကြယ်ငါးကောက်သူနှင့် ကြယ်ကြွေနိုင်ငံကို ကြိုးစားဖန်တီးပေးလိုက်ပါတယ်။ နားဆင်ရင်း နွေဦးတော်လှန်ရေးအတွက် တွေးနိုင် ကြံနိုင် အားဖြည့်နိုင်ကြပါစေခင်ဗျာ။

ဆရာဇင်ဇေလွင်၊ မှန်တယ်ထင်ရင် လူတိုင်းကို သူတင်ကိုယ်တင် ပြောတတ်သူ၊ စာပေကို မြတ်နိုးပြီး မိမိကြိုးစားမှုဖြင့် မိမိဘ၀ကို ပြုပြင်ပြောင်းမနိုင်သည်ဟု ယုံကြည်တတ်သူ၊ ပညာကို လေးစားပြီး ပညာဖြင့် အသက်မွေး၀မ်းကြောင်းပြုရင်း နာမည်တစ်လုံးဖြင့် ရပ်တည်နိုင်သူတဦး။ ဆရာဇင်ဇေလွင်ဟာ တချိန်က စစ်ကောင်စီကို ဆွေးနွေးညှိုနှိုင်းပြီး တရားမ၀င် အာဏာသိမ်းမှုကို အဆုံးသတ်နိုင်သည်ဟု ယုံကြည်ဖူးသည်။ ကိုယ့်ဘ၀ကိုယ် ပြောင်းလဲနိုင်စွမ်းသည် အစိုးရတွင် မရှိဘဲ မိမိကိုယ်တိုင်တွင်သာ ရှိသည်ဟု လက်ခံပြီး ဘ၀ကို ရုန်းကန်တည်ဆောက်ခဲ့သူမို့ ကိုယ့်စိတ်ဖြင့် စစ်တပ်ကို နှိုင်းပေးခဲ့သည်။ သို့သော် သူမျှော်လင့်ထားသလောက် မြန်မာစစ်တပ်တွင် အတွေးအခေါ် အမျှော်အမြင်မရှိကား အစအနပင် မရှိပေ။ဆရာဇင်ဇေလွင်၏ ပြောင်းလဲပြုပြင်တတ်သည့်စိတ်ထားကို ကျတော်တို့‌ podcast တွင် လေးစားဖွယ်တွေ့ရသည်။ ယခု နွေဦးတော်လှန်ရေးတွင် ဆရာသည် ခံယူချက်အချို့ကို အတွေ့အကြုံနှင့် သုံးသပ်ချက်အပေါ်မူတည်ပြီး လက်ခံပြောင်းလဲတတ်သည်ကိုလည်း မြင်ရသည်။ တိုင်းရင်းသားပြည်သူများနှင့် လက်နက်ကိုင် းအဖွဲ့အစည်းများက ဗမာလူမျိုး၏ လူစွမ်းကောင်းဝါဒကို ကြောက်သည်။ ကောက်ရိုးမီးစိတ်ဓာတ်ကို ကြောက်သည်။ ထို့ကြောင့် ဗမာလူထုဟာ စစ်တပ်အမြစ်မပြတ်မချင်း ရှေ့ဆက်မည်လော ဟူသည့် အတွေးရှိသည်။ ထိုအတွေးအခေါ်ကို ချေဖျက်နိုင်သည်မှာ ပြည်သူလူထု၏ တော်လှန်ရေးအပေါ် တစိုက်မတ်မတ် အားစိုက်တတ်ခြင်းသည်သာလျှင်ရှိသည်ဟု ဆရာဇင်ဇေလွင် ပြောသည်။နွေဦးတော်လှန်ရေးအတွက် ဆရာဇင်‌ဇေလွင်ပြောပြသော အတွေ့အကြုံ အတွေးအခေါ်နှင့် အချက်အလက်များသည် အလွန်တန်ဖိုးရှိပြီး အထောက်အကူပြုသောကြောင့် ဆက်ဆက်နားဆင်ပေးရန် ကျတော်တို့ တော်လှန်ခြင်းများနှင့် ခေတ်သစ်မြန်မာပြည်မှ တိုက်တွန်းတင်ဆက်လိုက်ရပါတယ်။

သူအမည်ကား ကိုနစ်ကီ။ ဂီတကို မြတ်နိုးသူ၊ အင်ဂျင်နီယာတစ်ယောက်။ ဘ၀ကို ပျော်ပျော်ရွှင်ရွှင်ဖြတ်သန်းတတ်သူ။ သို့သော် သူဘ၀ကို အလှည့်အပြောင်းဖြစ်စေသည်ကား စစ်အာဏာသိမ်းမှုပင်။မကြုံဖူးတာတွေကြုံရ ကြားရသည့်အခါ သူအံ့ဩရသည်။ ဘ၀မှာ မကြုံဖူး မကြားဖူးသည်များကို မျက်ဝါးထင်ထင်တွေရချိန်တွင် အရင်ဆုံး ကိုယ်ချင်းစာမိသည်ကား တိုင်းရင်းသားများ။ဘ၀ကို ခပ်ပေါ့ပေါ့ဖြတ်သန်းခဲ့သည်မဟုတ်သော်လည်း ပေါ့ပေါ့ပါးပါးနေတတ်ခဲ့သော သူကိုယ်သူရှက်တတ်ပြီ။ ကိုနစ်ကီ စစ်သင်တန်းတက်သည်။ စစ်လက်နက်တပ်ဆင်ရေးလုပ်သည်။ နည်းပညာသမားပီပီ နည်းပညာအကူအညီပေးသည်။ လက်ရှိအချိန်တွင် နိုင်သမျှ အကုန် ကြုံးလုပ်ရင်း စစ်အာဏာရှင် အမြစ်ဖြတ်ပွဲကို ပါ၀င်နေသည်။ ရေပေါ်ဆီသူငယ်ချင်းတွေအတွက် စကားလက်ဆောင်အချို့လည်း ပါးလိုက်သေးသည်။ အနုပညာရှင်များ အချိန်မတန်ဘဲ ကြွေလွှင့်ရမှုအပေါ် သူကြေကွဲရသည်။ တမိသားစုလုံးပြေးနေရသော်လည်း ကိုနစ်ကီ စိတ်မပျက်၊ ရှေ့ဆက်ဆဲပင်ဖြစ်သည်။ သူလိုလူမျိုးများစွာ နွေဦးတော်လှန်ရေးတွင် ပါ၀င်နေကြသည်။ဆက်လက် ပါ၀င်နေကြလိမ့်အုံးမည်။

ကိုထက်၊ စက်မှုအင်ဂျင်နီယာ ဘွဲ့ရတစ်ယောက်။ ထိုဘွဲ့ကို လွယ်လွယ်နဲ့ ရသည်မဟုတ်။ ကျန်းမာရေးမကောင်းတဲ့ အဖေ ကားထွက်ပြီး အမကြီး အလုပ်လုပ်၊ အမေက ချွေချွေတာတာဖြင့် ပံ့ပိုးပြီး သူရခဲ့သော အင်ဂျင်နီယာဘွဲ့။ နည်းပညာကို စိတ်၀င်စားပြီး စာဖတ်ခြင်းနဲ့ ဂီတကို ခုံမင်သော ကိုထက်။ ဦးသိန်းစိန်၊ အမေစု ဒီမိုကရေစီ အစိုးရလက်ထက်များတွင် ၀င်ရောက်လာသော နိုင်ငံခြား telecom company တခုတွင် မဆိုးလှသော လစာနှင့် လုပ်ငန်းအတွေ့အကြုံရသည်။ သို့သော် သူအိပ်မက်တွေ ကြာကြာမက်ခွင့်မရှိ။ COVID နှင့် အာဏာသိမ်းမှုက အကုန် ဖျက်ဆီးသွားသည်။ ကင်ဆာသည် မိခင်က မကောင်းတဲ့ခေတ်ကာလကို မရောက်ခင် အားလုံးကို နှုတ်ဆက်ထွက်ခွါသွားသည်။ ထို့နောက် စစ်အာဏာရှင်၏ အာဏာသိမ်းမှုကို တဖက်တလမ်းက ဆန့်ကျင် ဆန္ဒပြရင်း ကျန်းမာရေးချူချာသော ဖခင်ကို စောင့်ရှောက်ခဲ့သည်။ ထို့နောက် ဖခင်ဆုံးပါးပြီး ဆုံးဖြတ်ချက်တခုကို ခိုင်ခိုင်မာမာချလိုက်သည်။ မြန်မာနိုင်ငံတွင် ဆက်နေ၍ မဖြစ်တော့။ ကြိုးကြိုးစားစား ရထားသော ဘွဲ့နှင့် လုပ်သက် အတွေအကြုံများက စစ်အာဏာရှင်လက်အောက်တွင် ဘာတန်ဖိုးမှ မရှိ။ အင်ဂျင်တစ်ယောက်ကို လစာ ၁သိန်း ၈သောင်း( တလ $ ၅၀) ခန့်ဖြင့် သတင်းစာမှ တရား၀င် ခေါ်နေသော နိုင်ငံတွင် သူ့အတွက် နေရာ မရှိတော့။ တွယ်တာစရာ မိခင်ရော ဖခင်ပါမရှိ၊ အမနှင့် ညီငယ်ကလည်း တနေရာစီ။ သူ့အသက်မွေး၀မ်းကြောင်းနှင့် ဘာမှမဆိုင်သော အရာတခုကို မျက်စိမှိတ် ရွေးရင်း နိုင်ငံရပ်ခြားတွင် စာဖိုမှူးတစ်ယောက်ဖြစ်လာသော စက်မှုအင်ဂျင်နီယာဘွဲ့ရ ကိုထက်။ လောကကြီးကို ခက်ထေ့ထေ့ အမြဲပြုံး၍ကြည့်တတ်သောသူ၊ ထိုသူ၏ ဘ၀အချို့အကွေ့ကို တော်လှန်ခြင်းများနှင့် ခေတ်သစ်မြန်မာပြည်တွင် နားဆင်နိုင်ပါပြီ။

သူမအမည်ကား ငြိမ်း။ အမည်နာမက ငြိမ်းဆိုပေမယ့် သူမကား တဇွတ်ထိုးသမား။ ဖြစ်ချင်တာကို ဖြစ်အောင်လုပ်တတ်သူ၊ ရည်ရွယ်ချက်ကို လက်မလျော့တတ်သူ။ သူမ၏ စိတ်ပိုင်းဖြတ်မှုဖြင့် မိဘပြောသော ဆရာ၀န် အင်ဂျင်နီယာဆိုသော ဘ၀တွေကို မျက်ကွယ်ပြုပြီး photo Journalist ဘ၀ထဲကို ခုန်၀င်ခဲ့သည်။ သူမ ဘ၀ကို ပုံမှန်ဖြတ်သန်းနေရသော်လည်း သူမခုံမင်သည်။ မငြိမ်း မမြင်သည်ကား သူမကို စောင့်ကြိုနေသော ဘ၀လှည့်ကွက်များ သမိုင်းဓာတ်ပုံများ။ သူမပြောပြသည်ကား " ကျမကိုယ်ကျမ စစ်ထဲမှာ သတင်းယူရသလို ဓာတ်ပုံတွေရိုက်ရလိမ့်မယ်လို့ အိပ်မက်တောင် မမက်ဖူးပါဘူး၊ အခုက တကယ့် စစ်ပွဲထဲရောက်နေသလိုပဲ။ ပြဿနာက တဖက်က လက်နက်နဲ့၊တဖက်က လက်နက်မဲ့"။ အမှတ်တရမဖြစ်ချင်သော အမှတ်တရများထဲမှ လှိုင်သာယာအကြောင်းကို သူမ ပြည့်ပြည့်စုံစုံ ပြောပြသွားသည်။ စိတ်ရောကိုယ်ပါ ချုံးချုံးကျခဲ့ရသော သူမရဲ့ ဘ၀ကို ဘယ်၍ဘယ်ပုံ ပြန်လည်ပြုပြင်ခဲ့ရသည်ကို မျှဝေခဲ့သည်။ သူမ၏ သမိုင်းတမျက်နှာကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

ကိုဒေးဗစ်၏ မွေးရပ်မြေကား ချင်းပြည်နယ်။ အလွန်လှသော ပတ်၀န်းကျင်နှင့်အလွန်ရိုးသားကြိုးစားသော လူများရှိရာနေရာ။ စား၀တ်နေရေးအတွက် မွေးမြူရေး၊စိုက်ပျိုးရေးကို တစိုက်မတ်မတ် အားကြိုးမာန်တက် လုပ်ကိုင်ကြပြီး ပညာရေး၊ ကျန်းမာရေးကို ခက်ခက်ခဲခဲ ကြိုးစားကြရသော နေရာ။ စစ်အစိုးရအဆက်ဆက်ရဲ့ ဖိနိုပ်မှုကို ခါးစီးခံပြီး ဘ၀ကို ခက်ခက်ခဲခဲ အသက်မွေးရသော နေရာ။ ကိုဒေးဗစ်ဟာ သူ့ဘ၀ကို အရှုံးမပေး၊ ဆရာ၀န်တစ်ယောက်ဖြစ်လာသည်အထိ ရုံးကန်ခဲ့သည်။ ထို့နောက် မွေးရပ်မြေကို ပြန်ပြီးအလုပ်အကျွေးပြုသည်။ ကျန်းမာရေး ပညာရေး ချို့တဲ့သော သူ့လူမျိုးတိုးတက်ရေးအတွက် အလွန်ကြိုးပမ်းအားထုတ်နေသူလည်း ဖြစ်ပါတယ်။လက်ရှိတော်လှန်ရေးမှာ ချင်းတောင်တန်းဒေသဟာ စစ်အာဏာရှင်ကို ရွပ်ရွပ်ချွံချွံခုခံတိုက်ခိုက်နေသော နေရာတစ်ခုဖြစ်ပြီး အကျိုးဆက်အနေနဲ့ အစားအစာ ၊ဆေးဝါးနဲ့ ထောက်ပံ့ရေးပစ္စည်းမှန်သမျှကို ဖြတ်တောက်ခံနေရတဲ့နေရာလဲဖြစ်ပါတယ်။ ပါရာစီတမောလို အကိုက်အခဲပျောက်ဆေးပင်ရှာမရ၊ မရှိ၊ရှိတာသုံးပြီး ရှေ့ဆက်နေသော သူတို့ရဲ့ဘ၀၊ လွတ်လပ်ရေးရပြီးကတည်းက ဆုံးရှုံးလိုက်ရသော သူတို့ရဲ့ လွတ်လပ်ခွင့်တွေ၊ အခွင့်အရေးတွေအတွက် ပြန်လည် မျှော်လင့်ရနိုင်သော နွေဦးတော်လှန်ရေးအတွက် ချင်းတမျိုးသားလုံးဟာ ကြံ့ကြံ့ခံထားဆဲဖြစ်ပါတယ်။ သူတို့ရဲ့ ဘ၀တွေ၊မျှော်လင့်ချက်တွေနဲ့ ကြိုးစားအားထုတ်မှုတွေရဲ့ တစိတ်တပိုင်းကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

ပြည်သူ့၀န်ထမ်းဘ၀ကို နှစ်ချိုက်သူ၊ မြန်မာပြည်၏ ၀န်ထမ်းများ ပြုပြင်ပြောင်းလဲရေးကို တစိုက်မတ်မတ်ကြိုးပမ်းခဲ့သော သူမ၊ စစ်အာဏာသိမ်းမှုနှင့်အတူ မျှော်လင့်ချက်တွေ ရိုက်ချိုးခံရသော သူမ။ သူမအကြောင်းကို နားထောင်ရင်း အားလျော့ အားပျော့သံမကြားရ၊ တည်ငြိမ်ပြီး စိတ်အေးချမ်းမှုသာ ပေးသော သူမ။ မကြာဖြူဟူသော အမည်ဖြင့်လိုက်ဖက်အောင် ကြိုးစားရင်း CDM ၀န်ထမ်းဘ၀ကို ကျေကျေနပ်နပ်ခံယူထားရင်း တော်လှန်ရေးခရီးကို တရွေ့ရွေ့ဆက်နေသည်။ သူမပြောသည် " ထောင်ထဲမှာ မျှော်လင့်ချက် တပွေ့တပိုက်ဖြင့် ‌စောင့်နေသူတွေ လူမျိုးစုံ၊ ပြည်သူမျိုးစုံ။ ကျမတို့နိုင်မှ ဖြစ်မည်" ဟုဆိုသည်။ စစ်ကိုင်း၊ကရင်နီ၊ ချင်းတို့ဌာနီမှစလို့ အဝေးရောက် CDM များ ခံစားနေရမှုတို့ကို လျစ်လျူမရှုသင့်ဟု ထပ်လောင်းပြောပြသေးသည်။ မျက်ရည်တွင်တွင် ကျခဲ့ရသော ညများကို ဖြတ်ကျော်ရင်း စိတ်တည်ငြိမ်အောင် ကြိုးစားရင်း ရှေ့ဆက်နေသူ။ တော်လှန်ရေးအတွက် အပြောင်းအလဲဖြစ်မည့် ကာလအတွက် အားလျော့စရာတွေ ရှိသော်လည်း အားလျော့၍ မဖြစ်။ စစ်ကောင်စီ၏ တရားမ၀င်မှုကို အမြန်ဆုံးဖြုတ်ချဖို့ ပြည်သူများ မျှော်လင့်ရင်း ကြံ့ကြံ့ခံဖို့ ဘ၀တူများကို သူမ အားပေးလျက်ရှိသည်။ သူမ၏ အတွေ့အကြုံ၊ အမြင်နှင့် တော်လှန်ရေးအပေါ် သုံးသပ်ဆင်ချင်မှုတို့ကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်ပြီဖြစ်ပါသည်။

သူ့အမည်က Kenneth Wong။ မြန်မာစာ‌ပေ လေ့လာနေကြသော နိုင်ငံခြားသားများ ကျောင်းသားများအတွက် မစိမ်းသော အမည်ဖြစ်ပေမယ့် မြန်မာပြည်ထဲက မြန်မာပြည်သားများအတွက် စိမ်းနေသေးသည်။ ကျတော်တို့အများစုက စစ်အာဏာရှင်တော်လှန်ရေးကြောင့် စိတ်ပင်ပန်း လူပင်ပန်းဖြစ်ပြီး အထီးကျန်ဆန်သော ခံစားချက်ကို ခပ်စိတ်စိတ် တွေးမိ စဉ်းစားမိဖြစ်လာတတ်ပါတယ်။ ကိုယ်နဲ့အတူ စိတ်တူကိုယ်တူ ပြည်သူများစွာက အတွင်းရော အပြင်မှာပါ အရှိန်အဟုန်နဲ့ ရှေ့ဆက်နေတာကို သတိရဖို့အရေးကြီးပါတယ်။ ဆရာကန်နပ်ဝေါင်ဟာ မြန်မာစာပေ တိုးတက်တွင်ကျယ်ရေးအတွက် တဖက်တလမ်းကနေ ကြိုးစားနေတဲ့ ဘာကလေတက္ကသိုလ်က မြန်မာစာဆရာတစ်ယောက်ဖြစ်ပါတယ်။ ၈၈ ကာလမှာ မိသားစုနဲ့အတူ အမေရိကန်နိုင်ငံ၌ ခိုလှုံပြီး နိုင်ငံသားဖြစ်လာခဲ့တဲ့သူတစ်ယောက်ဖြစ်ပါတယ်။ စာပေနဲ့ယဉ်ကျေးမှုကို မြတ်နိုးတဲ့ Kenneth Wong အတွက် မြန်မာစာပေကို တွင်ကျယ်စေချင်သည်။ မြန်မာစာပေကို ကမ္ဘာ့နိုင်ငံတွေမှာ လူရိုသေ ရှင်ရိုသေ ဖြစ်လာစေဖို့ နိုင်ငံတည်ငြိမ်ဖို့လိုကြောင်း၊ သမိုင်းကြောင်းအစဉ်အလာရှိသောနိုင်ငံအတွက် လေ့လာချင်သူတွေများကြောင်း၊ စစ်အာဏာရှင်မရှိသောဖဒရယ်နိုင်ငံသစ်ဆိုလျှင် စာပေယဉ်ကျေးမှု လွန်စွာတိုးတက်ဖို့ အလားအလာရှိကြောင်း ပြောပြဆွေး‌နွေးခဲ့ပါတယ်။ တိုင်းရင်းသားစကားတွေကိုလည်း ထိန်းသိမ်းစောင့်ရှောက်ဖို့နဲ့ ပြန့်ပွားဖို့ကြိုးစားသင့်ကြောင်း၊ လူများစုဖိနိုပ်မှုဆိုတာ နိုင်ငံအလိုက်ဖြစ်နေတာ ဖြစ်တဲ့အတွက် ဥပဒေ၊ ယဉ်ကျေးမှု၊ စာပေနဲ့သာ ထိန်းကွပ်နိုင်ကြောင်း စတဲ့ စိတ်၀င်စားဖွယ်အကြောင်းအရာတွေကို တော်လှန်ခြင်းများနှင့်ခေတ်သစ်မြန်မာပြည် podcast မှာ နားဆင်နိုင်ပါပြီ။

Episode #20: ကရင်တိုင်းရင်းသူ အမိုးဖေါ။ သူမကား ပညာတတ်တစ်ယောက်။ ၈၈ မတိုင်ခင်က ပညာတတ်ရှားသည်။ တော်ရုံသူ ဆယ်တန်းမအောင်။ သို့သော် သူမ မိဘကံကောင်းသည်။ ငယ်စဉ်ကပင် ရန်ကုန်ရောက်ပြီး ပညာရေးကို ကြိုးစားခဲ့သည်။ ဆယ်တန်းအောင် ဘွဲ့ရပြီး သာယာသော မိသားစုနှင့်သူမ။ မင်းအောင်လှိုင် အာဏာမသိမ်းခင်အထိ အကုန် အဆင်ပြေသည်။ သို့သော် စစ်အာဏာရှင်၏ စနက်ကို မည်မှ ပြေးမလွတ်၊ အကုန် ခါးစည်းခံကြရသည်။ သူမ၏ သားတစ်ယောက် သမီးနှစ်ယောက် သုံးယောက်လုံး ဆန္ဒပြပွဲတွင် ရှေ့ဆုံးက ပါသည်။ သမီးကြီးက ပိုဆိုးသည်။ သမဂ္ဂဥက္ကဌဖြစ်သင့်အပြင် စစ်သင်တန်းပါ သွားတက်သေးသည်။ ဤသို့ဖြင့် အိမ်၊ကား၊နေရာ အကုန်စွန့်ပြေးရတော့သည်။ သားသမီးများအတွက် အကုန် ပြင်ဆင်ပေးထားသမျှ သဲထဲရေသွန်ဖြစ်ကာ ခင်ပွန်းသည်ကလည်း ကျန်းမာရေးမကောင်းပေ။ ထို့အပြင် အခြားနိုင်ငံသို့ ခိုး၀င်အဖြစ် တိမ်းရှောင်ရပြန်သည်။ ပြေးရသူတို့၏ အိပ်မက် တတိယနိုင်ငံအိပ်မက်ကို မိသားစုနှင့် အမိုး မက်သည်။သို့သော် ရွှေပြည်တော်ကား မျှော်တိုင်း ဝေးနေသေးသည်။ အမိုး၏ အိပ်မက်များ အမြန်ဆုံးအကောင်အထည်ပေါ်စေရန် #တော်လှန်ခြင်းများနှင့်ခေတ်သစ်မြန်မာပြည် မှ ဆုတောင်းပေးရင်း အားပေးရပ်တည်လျက်။

ကိုတေဇာဆန်းဟု ဆိုလျှင် တန်းမြင်ရမည်ကား သူ့အပြုံး။ အမြဲ တက်ကြွလန်းဆန်းနေပြီး အရာရာကို နှိုင်းယှဉ်သုံးသပ်တတ်သူ။ အမှန်တရားအတွက်နှင့် အများအကျိုးရှိမည်ဆိုလျှင် သူ့ပညာရေး စီးပွားရေးက ဒုတိယ။ ထို့သို့သော စိတ်စေတနာတွေကြောင့် စစ်ကောင်စီ၏ ပိုက်စိပ်တိုက် ရှာဖွေဖမ်းဆီးခြင်းမှ ခဏခဏ လွတ်သူ။ မြန်မာပြည်အနှံ ခြေဆန့်ပြီး ဘ၀များစွာနဲ့ ထိတွေ့နေသူ။ သူ၏ ခံယူချက်၊ အတွေးအမြင်များနှင့် လုပ်ဆောင်ချက်များက လေးစားစရာကောင်းသည်။ ပိုမိုလေးစားရသည့်အကြောင်းကား သူ၏ နိမ့်ချတတ်မှု။ စကားပြောယဉ်ကျေးသည်။ ပွင့်လင်းသည်။ သူ့၏စိတ်ဓာတ်ကို စကားပြောကြည့်လျှင် သိနိုင်သည်။ ပြည်သူအများ စိတ်၀င်စားလျက်ရှိသော NUCC ၏လုပ်ဆောင်ချက်များကို တစေ့တစောင်း ပြောပြသွားသည်။ နိုင်ငံ၏ ယေဘုယျအခြေအနေနှင့် အဖြစ်အပျက်များကို အကြမ်းဖျင်းပြောပြသွားသည်။ ပြည်သူတွေရဲ့ ခံစားချက်ကို သူပြန်ပြောင်းပြောပြသည်မှာ ၀မ်းသာ၀မ်းနည်းပင်။ အိမ်မီးရှို့ခံရသူ ပြည်သူတွေရဲ့ စကားတိုင်းမှာ နောက်တွန့်ခြင်း ကြောက်ရွံခြင်း အလျင်းမရှိ၊ တော်လှန်ရေး အောင်မြင်ဖို့ရာ တထောင့်တနေရာမှ ပေးဆပ်လိုက်သည်ဟူသာ ခံယူထားကြသည်ဟု ဆိုသည်။ အခက်အခဲ ဒုက္ခမျိုးစုံနှင့်နပန်းလုံးနေသောပြည်သူ‌များ၏ မာကျောသောစိတ်ဓာတ်၊ ပြင်းပြသော စိတ်ဓာတ်တွေကြောင့် တော်လှန်ရေးက အောင်ကိုအောင်မည်ဟု ကိုတေဇာဆန်းယုံကြည်လျက်ရှိသည်။ ကျတော်တို့ တော်လှန်ခြင်းများနှင့်ခေတ်သစ်မြန်မာပြည်မှလည်း ယုံကြည်ဆန္ဒပြုရင်း ကိုတေဇာဆန်း၏ podcast ကို နားဆင်နိုင်ပြီဖြစ်ပါသည်။

ကိုပုလေးက လူငယ်တက်ကြွသူတစ်ယောက်။ သူ၏အမြင် အတွေးကား ရိုးရှင်းသည်။ သူယုံကြည်ရာကို သူလုပ်သည်။ ရပ်ရွာအကျိုးလည်း လက်မနှေး။မိသားစုကို သိတတ်သောသူ ဖခင်တစ်ယောက်လည်း ဖြစ်သည်။ တနေ့ သူမမျှော်လင့်ထားသည့်အခြေအနနှင့် နဖူးတွေ့ဒူးတွေ့ တွေ့ရတော့သည်။ အာဏာသိမ်းပြီး သူသေချာတွေးမိသည်။ သူအနေနဲ့ အဆင်ပြေနိုင်သေးသော်လည်း သူ့သူငယ်ချင်းတွေ အလုပ်ပြုတ်ကြသည်။ ထမင်းငတ်ကြသည်။ သူ့အလုပ်သမားအချို့ ဖြုတ်ရတော့သည်။ ထို့နောက် သူမိသားစုနှင့် တိုင်ပင်၍ သားငယ်ကို နမ်းကာ အာဏာရှင်တို့ခင်းသော ဆူးလမ်းကို အမှန်တရားအတွက် လျှောက်တော့သည်။ နိုင်တာအကုန်လုပ်သည်။ ဆန္ဒပြသည်။ စစ်သင်တန်းတက်သည်။ လိုအပ်သူတွေကို ကြည့်သည်။ သို့သော် စစ်တပ်က သူ့ကိုအလွတ်မပေး။ စစ်ခွေးဆ်ုသည့်အတိုင်းအနံ့ရသည့်နေရာ အကုန်လိုက်သည်။ သူကံကောင်းသည်။ မိတ်ဆွေကောင်းတွေကြောင့် လွတ်ရာသို့ အပြေးလှမ်းနိုင်ခဲ့သည်။ တော်လှန်ရေးကား အားလုံးသိသည့်အတိုင်း အရင်းအနှီးကြီးသည်။ ထိုအရင်းအနှီးများကို သူ မြုပ်နှံပြီးဖြစ်သည်။ တော်လှန်ရေးအတွက် သူနောက်မဆုတ်။ ရှေ့သို့သာ တလှမ်းချင်းတိုး၍တိုး၍သွားသည်။ သူ့ဘ၀နှင့် စူ့ခံယူချက်ကို တော်လှန်ခြင်းများနှင့် ခေတ်သစ်မြန်မာပြည် podcast တွင် တွေ့နိုင်ပါသည်။

မဝေဟာ ခေတ်စနစ်ရဲ့ သားကောင်တစ်ယောက်ဖြစ်ခဲ့ရသူပါ။ ၁၃နှစ်သမီးအရွယ်မှာ မိသားစုအရေးအတွက် အထည်ချုပ်စက်ရုံလုပ်ကိုင်ခဲ့ရပြီး အတန်းပညာနဲ့အလှမ်းဝေးခဲ့ရပါတယ်။ လုပ်ငန်းခွင် ဖိနိုပ်မှုတွေကို အရွယ်နဲ့မလိုက်အောင် ကြုံတွေ့ခဲ့ရပြီး သူမရဲ့ အတိတ်ဆိုးတွေကို အခုထိ မှတ်မိနေဆဲလို့ ဆိုပါတယ်။ အရွယ်နဲ့မလိုက် ဆဲဆိုကြိမ်းမောင်းခံရတာတွေ၊ မနိုင်၀န်ထမ်းရတာတွေဟာ သူမအတွက် ပုံမှန်လိုပင် ဖြစ်ခဲ့ရသည်။ သို့သော် သူမစိတ်ပျက်မသွား၊ သူမကြောင့်အဆင်ပြေနေသော မိသားစုကို ငဲ့ကြည့်ရင်း သူမအမြဲ အားတင်းထားခဲ့သည်။ ထို့နောက် ဒီမိုကရေစီအစိုးရလက်ထက်သို့ရောက်လာပြီး အလုပ်သမားအဖွဲ့အစည်းများ ဖွဲ့ခွင့်ရလာသည်။ ထို့ပြင်အသက်မပြည့်သေးသောသူများကို လုပ်ငန်းခွင်ဖိနိုပ်မှုများ အတင်းအဓ္ဓမ ခိုင်းစေခြင်းများမှ အထိုက်အလျောက် ကာကွယ်လာနိုင်ကြသည်။ ထိုအခွင့်အရေးကို သူမလက်လွတ်မခံ၊ အလုပ်သမားအဖွဲ့အစည်းထဲ ခြေစုံပစ်၀င်ရင်း သူမကဲ့သို့ အခြားသက်ငယ်အလုပ်သမားများ မကြုံတွေ့စေရန် ကြိုးစားခဲ့သည်။ အလုပ်သမားအရေးဆိုသည်မှာ နိုင်ငံ၏အရေးပင်ဖြစ်သည်ဟု သူမဆိုသည်။ အလုပ်သမားဟူသော အခြေခံလူတန်းစားအဆင်ပြေပါမှ နိုင်ငံအေးချမ်းပြီး အလျှင်အမြန်တိုးတက်နိုင်သည်။ မဟုတ်လျှင် တိုင်းပြည်ဆူပူပြီး မအေးချမ်းနိုင်ဟု ဆိုသည်။ လက်ရှိစစ်ကောင်စီသည် အများဆန္ဒကိုမလေးစား၊ သူ၏လက်တဆုပ်စာ အသိုင်းအဝိုင်းကိုသာ အလေးထားသောကြောင့် အကျိုးဆက်ကို အများပြည်သူခံနေရသည်ဟု သူမဖွင့်ဟသည်။ တချိန်က အနာဂါတ်ကိုတွေး၍ ၀မ်းသာခဲ့ရသော်လည်း ယခုချိန်တွင် အလုပ်သမားများ တကျော့ပြန်ဖိနိုပ်ခံရတော့မည်ကို သဘောပေါက်မိသော သူမအတွက် လက်ရှိအလုပ်သမားအဖွဲ့အစည်းဖြင့် အလုပ်သမားရေးကိုနိုင်ရာထမ်းနေသည့်သူ။ ထိုသို့ လောကဓံကို အရှုံးမပေးဘဲ လူပီသအောင်နေ,နေသော သူမရဲ့ဘ၀ဇာတ်လမ်းနဲ့ အလုပ်သမားအရေးကို ကျတော်တို့ တော်လှန်ခြင်းများနဲ့ ခေတ်သစ်မြန်မာပြည် podcast မှာ ၀င်ရောက်နားဆင်နိုင်ပြီ ဖြစ်ပါတယ်။

ဆရာ‌တော်၏ ဘွဲ့ကား အများသူငှာနှင့် မစိမ်း၊ အရှင်မင်းသုည ဗုဒ္ဓတက္ကသိုလ် ပင်။ ဆရာတော်သည် ဗုဒ္ဓဘာသာဘုန်းတော်ကြီးပင် ဖြစ်လင့်ကစား ခေတ်ဆန်သည်။ လူငယ်တွေ၏ သဘောသဘာ၀ကို နားလည်သည်။ ဘာသာရေးအပေါ် ခုတုံးလုပ်သော သံဃာတော်များကိုလည်း ပြင်းပြင်းထန်ထန်ဝေဖန်တတ်သူလည်း ဖြစ်သည်။ လက်ရှိနိုင်ငံရေးနှင့် သံဃာများ နိုင်ငံရေးမလုပ်ရဟူသော စည်းမျဉ်းကား ဘုရားဝိနည်းမဟုတ်၊ စစ်အာဏာရှင်၏ ဂျင်းဟု မိန့်သည်။ နိုင်ငံအရေးသည် အများသူငှာ အေးချမ်းရေးဖြစ်သည်၊ မြတ်စွာဘုရားသည်ပင်လျှင် အများသူငှာ ချမ်းသာစေရေးကိုသာ ရှေးရှုပြီး အမြဲဆုံးမ သွန်သင်တတ်သူဖြစ်ကြောင်း ဆရာတော်က မိန့်သည်။ ဆရာတော်သည် လက်ရှိ မြန်မာနိုင်ငံတွင်ဖြစ်ပေါ်နေသော ကိစ္စများနှင့် ပတ်သတ်၍ အကောင်းဆုံးရှင်းပြဆုံးမသွားခဲ့သည်။ ဆရာတော်၏ ဆောင်ပုဒ်ကား ဘာသာမဲ့ချင်မဲ့ပါ၊ တရားဓမ္မ မမဲ့ပါနဲ့ ဟူ၏။ အရာရာကို ၀ဠ်ကြွေး ၊ ဆုတ်ကပ် ဖြစ်နေကြသော အမှောင်ဖုံးသူတော်ကောင်းများကိုလည်း ပြောကြားသွားသည်မှာ ထုံးကို နှိုက်၍ ဖြူပြီး မီးသွေးနှိုက်၍ မဲရသည်မှာ ကံမဟုတ်ဘဲ မိမိပြုသော အမှုသာဖြစ်ကြောင်း၊ စစ်အာဏာရှင်ကို ကြောက်ရွံ့စိတ်နှင့်မိမိအသိဉာဏ်နည်းပါးမှုတို့ကို လျစ်လျူရှု၍ ကံကိုချည်း အပြစ်ဖို့မနေသင့်ကြောင်း စုံစုံလင်လင် ပြောပြသွားခဲ့သည်။ ငရဲဖြင့်ခြောက် နတ်ပြည်ဖြင့် မြောက်တတ်သော သူများ၏ ဂျင်းများမှ လွတ်ကင်း၍ စစ်မှန်သော တရားဓမ္မကို နားလည်သဘောပေါက်ဖို့ ပိုမိုအားထုတ်သင့်ကြောင်း သေသေချာချာရှင်းပြခဲ့သည်။ ထို့သို့သော ဘုရားသားတော်တပါး၏ ဒီမိုကရေစီ ဆန်သော ဆွေးနွေးချက်များကို တော်လှန်ခြင်းများနှင့် ခေတ်သစ်မြန်မာပြည် podcast တွင် နားဆင်နိုင်မည်ဖြစ်ပါသည်။