Da num e da pum

La poetessa Jessica Zuan da Segl è intgantada dal num da la val laterala «Chamuera» che maina da Chamues-ch vers sid. Quai èn dus dals nums che sa refereschan a noss chamutschs che passentan in grev temp uss lenviern. En l'entir artg alpin deriva il pled per quel animal pli probabel d'in pled preroman. Tgi enconuscha dentant l'expressiun «purter sülla chamutschigna» che sa referescha als chatschaders? Perquai che dunna Jessica abitescha a Barcelona dain nus era anc in sguard a l'architect da la «Sagrada Familia» e guardain co che ses num stat en relaziun cul num da schlattaina Gaudenz. Ulteriurs temas: Val Chamuera

Blers discurran da la Svizra rumantscha, nus vulain dar oz in'egliada a la Svizra cun sias vischnancas e citads da tschellas trais linguas, ma cun ina vista rumantscha. Donat Caduff ha creà per incumbensa dal chantun Grischun ina charta geografica da la Svizra, nua che tut ils lieus abitads han in num transponì en rumantsch. Quest'ovra d'art sa chatta en la Chasa dals chantuns a Berna, ma il favrer vegn stampada ina versiun pitschna per il diever public. Lura pudain nus sa laschar surprender dals nums nunspetgads sco Vinnavil-Praplaniv, Vedervitg e Maileras – u sa dumandar nua che sa chattan Babigna e Pacugn, Trantermunts e Basmundinga-Schlattinga. Ulteriurs temas: La Svizra en rumantsch

Ils chalenders inditgeschan per oz il num tudestg Erhard u la furma rumantscha Sarard. Oriundamain era il num rumantsch Arard, che signifitga nà dal tudestg ina persuna che mira ferm sin sia onur. Dapi 1490 datti dentant a Zernez la schlattaina Serrardi u Sararart. En il cudesch retic dals nums da famiglia pudain nus leger che quels ch'eran derschaders u notars vegnivan numnads cun in Ser u Sar, che deriva dal talian messere cun suenter il prenum. Quai è damai il cas era cun las famiglias Saratz, Sarott, Sartea e Serion. Ma pertge è Nicolin Sererhard impurtant per il Grischun? Ulteriurs temas: Sarard

Oz giavischain nus in cordial «Bun di, bun onn» a tuttas audituras ed a tuts auditurs, forsa ch'intginas retschaivan schizunt er in regalin sco che quai era usità pli baud. Quel numnav'ins regal da Bumaun e quai signifitgava ch'il regal era in dun dad in bun maun. Il di sez ha survegnì il medem num. En Surselva ed en il Grischun central vegn il di d'oz era numnà Daniev, sche intgin raquinta en Engiadina ina novitad sche è quai era ina «danöv». En mintga cas creschan ils dis puspè, ma per il mument anc uschè pauc sco che las giaglinas dovran per far in ov! Ulteriurs temas: Daniev

Johann Coaz è stà ina persunalitad excepziunala dal 19avel tschientaner. Suenter in studi dad economia forestala elavura el sco topograf da muntogna la basa per plirs fegls da la charta geografica da Dufour. En quest connex fa Coaz la primascensiun da blers pizs grischuns, tranter quels era dal Piz Bernina. El vegn a dar quest num al pli aut piz dal Grischun tenor il num dal pass. En lexposiziun al museum retic deditgada a Coaz ed a ses merits vegnin nus a savair chel ha dà il num anc ad auters pizs cheran fin lura senza denominaziun, dal Piz Quattervals al Piz dal Diavel. Ulteriurs temas: Las muntognas da Coaz

Il Vorarlberg cunfina cun il Partenz, ma paucs Grischuns enconuschan quella part da l'Austria che fascheva ina giada part dal territori rumantsch. Manfred Beck, ch'abitescha a Brand en il Brandnertal nua ch'ils Gualsers han remplazzà il rumantsch cun il tudestg, s'interessa fitg per ils toponims che mussan anc oz lur derivanza rumantscha. Il Gafalljoch vegniva surmuntà da pli baud cun chavals, la Palüdalpe è anc oz palidusa. Ma tge signifitgeschan ils nums Gafedura u Valscherina? Ulteriurs temas: Brandnertal

Gia l'emna passada avain nus tadlà, co che Durich Chiampell empruvava da declerar la derivanza dals nums en nossas valladas en sia descripziun geografica dal territori da la Republica da las Trais Lias, cumparida avant pauc temp. Cun quai ch'el era persvas che noss perdavants eran fugids dals Romans, metta el blers nums en connex cun lur anteriura patria en l'Italia Centrala. Zernez deriva per el da «Cernetum», Zuoz da «Tutium» ed Ilanz/Glion da «Antium» – tuttas trais citads en la regiun dal Lazio. E la Val Trupchun avess tenor el da renviar ad in monument da victoria. Ma i para che l'origin è in lieu per dismetter las cogas. Ulteriurs temas: Chiampell sco toponomast

Nus savain che Durich Chiampell è stà in dals refurmaturs da l'Engiadina ed ha translatà il 1562 psalms en vallader. El aveva era scrit ina «Historia Raetica» e vegn numnà perquai «il bab da l'istorgia grischuna». L'autra gronda lavur è sia descripziun geografica dal territori da la Republica da las Trais Lias ch'è vegnida edida dacurt per l'emprima giada en translaziun cumpletta dal latin en tudestg. Per tuts che s'interessan per il Grischun è quai ina lectura indispensabla. Tar l'interpretaziun dals toponims va Chiampell però savens vias pulainas. Tge collia p. ex. la fracziun da Chaflur en Valsot cun ina flur? Ulteriurs temas: Chaflur e Piz Arpiglia

Maria Morell da Guarda ha scuvert en in cudesch, che la vischnanca da Vnà en Engiadina Bassa sa numnava pli baud Manas. Ella naveva mai udì quel num che tuna bunamain tudestg. Blers pensan che Manas saja la furma tudestga per Vnà – ma quel num è bler pli vegl. Gia en il 14avel tschientaner èn documentadas las furmas Manaw e Mnav. Prada planiva sut il vitg vegn anc oz numnada «Plan Mnà». Forsa che quel num deriva dal verb latin «minare», che signifitga chatschar u stuschar, che correspunda en franzos a «mener». Mnà u Vnà en «giud via», forsa che pervi da quai sa numna in prà allontanà en Val dUina «Vnà dadaint»? Ulteriurs temas: Manas (Vnà)

In auditur da la Val Müstair dumonda, sch'ils nums Ruinatsche e Runatscha sajan parentads e colliads cun la schlattaina Rufinatscha. Dal pled latin «ruina» datti en rumantsch bleras furmas tenor ils differents suffixs, quai èn desinenzas che midan in zichel la significaziun dal pled. Nus avain en la Rumantschia Ruinals, Ruineras, Ruinella, Ruinains, Ruinettas e bleras Ruinatschas da Sumvitg sur Breil, Domat, Clugin, Ftan fin eba Müstair. Il num da famiglia Ruinatscha datti er a Müstair gia dapi 1357, pli tard en la furma Ruvinatza, pia fitg sumegliant a Rufinatscha. Ulteriurs temas: Ruinatscha

Il november vegn era numnà il mais da Son Martin. Son Martin è in sontg fitg popular; ed ils 11-11 è il di da Son Martin, in di fitg impurtant. Il num Martin vegn dal dieu roman da la guerra: Mars. Son Martin era bain in schuldà roman, dentant in cun cor. El ha regalà la mesadad da ses mantè ad in pauper. E quest maletg cun Son Martin sin il chaval ha er chattà la via sin differentas vopnas. Ulteriurs temas: Son Martin

Oz è l'onomastic da Linard u Glienard u Leonhard, in num che bleras e blers enconuschan dal Piz Linard sur Lavin. Quel vegn dal tudestg e signifitgescha temerari e curaschus sco in liun. En la baselgia catolica datti il son Leonard ch'è il protectur dal muvel e surtut dals chavals. Quel ha vivì tranter il 5avel e 6avel tschientaner sco eremit senza acceptar da daventar uvestg. El ha fundà la claustra da Noblat en Frantscha sin il terren regalà dal retg ch'el aveva pudì circumdar sin in asen durant ina notg, suenter avair salvà la regina en speranza ch'aveva gì las deglias amez il guaud. Ulteriurs temas: Linard

Tgi che va tras Vuorz ch'ils Rumantschs numnan Uors e quels da lingua tudestga Waltensburg è adina puspè surprais quant lung che quel vitg lung la via è. Per ir sin il chastè Munt Sogn Gieri ston ins ir anc in toc, ma per scursanir pudain nus passar in clavà ch'è situà a Tavellas, en la pronunzia dals abitants Tavialas. Quest toponim è derasà er en autras vals e deriva dal latin «tabella». Ma tgi sa ch'il vegl num rumantsch dal Glaspass che colliescha la Val Stussavgia cun la Mantogna sa numnava pli baud era «Tavealas»? Ulteriurs temas: Tavialas

Oz è l'onomastic da Severin, almain per ils chalenders refurmads. Quai è in num che deriva dal latin. Ina famiglia ch'era vegnida da l'Africa en l'Imperi roman aveva questa schlattaina, ma Severus era ed è er in prenum. Nus badain spert, che quel correspunda al pled rumantsch «sever». Ma sever na sto betg manegiar quella qualitad che tscherts scolasts avevan, ins po er esser sever envers sasez cun esser conscienzius, damai cun suandar l'atgna conscienza. Sco quels da Lavin che din: «Chi ha sa conscienza netta zuond, nu temma nil diavel ni al muond». Ulteriurs temas: Severin

In mat a Ftan porta il bel num Jarno. Pli baud eri usit tar nus da dar als uffants prenums dals parents, magari da la nona u dal non. Oz tschernan blers geniturs nums ch'els han udì casualmain e che plaschan. Il bab aveva seguì in temp las cursas dad auto cun il pilot talian Jarno Trulli, da là enconuscheva el quest num finlandais che correspunda al num biblic dal profet Jeremia. La lingua suomi è dal tuttafatg autra che las linguas europeicas, ella è parentada be cun l'ungarais. Per Jeremia existan anc autras furmas sco Jarmo, Jarkko, Jere, u Jorma. Ulteriurs temas: Jarno