II Hơ’mon 34:14-21

“Sơ̆p hla bơar khôi juăt âu ‘nĕ kơ ataih đơ̆ng ‘bơ̆r ih, athei tơchĕng măng năr, lei athei pơ’lơ̆ng pơm kiơ̆ kơ nơ̆r đei chih lăm noh, thoi noh na lăm trong ih năm gô đei tơdrong pŭn hiôk.” (Jôsuê 1:8)

Nơ̆r jet tơchĕng pơwao:

–               Hilkia ‘bok soi tơm đei ‘bôh kiơ lăm hnam akŭm?

–               Jơhngơ̆m pơtao Jôsia thoi yơ kơplah kơtơ̆ng blŭng a đŏk Khôi juăt?

–               Lu bơ̆n yua iŏk thoi yơ kơplah nơ̆r Kră Yang đei bơtho chrih gah tơdrong yoch bơ̆n?

Hil kia ‘bok soi tơm đei ‘bôh hla bơar khôi juăt lăm hnam Kră Yang đêl hiong đơ̆ng sơ̆ bơih, sư ăn Sơ̆p hla bơar Khôi juăt noh kơ Saphan, Saphan đŏk hloi ‘bơ̆t anăp pơtao, ‘nâu bơih blŭng a pơtao Jôsia đei tơ’bưh nơ̆r Kră Yang. Wă pơtao kơtơ̆ng nơ̆r đơ̆ng lăm Sơ̆p hla bơar Khôi juăt noh sư hek hloi ao sư, tơ’bôh sư ơh tơpă. Pơtao hli tơrơ băt kơnăl “yua kơ lu ‘bok bơ̆n sơ̆ ưh kơ wă mơ̆ng păng ưh kơ chu kiơ̆ nơ̆r Kră Yang kư̆m kuă kơ pơm kiơ̆ nơ̆r mă đei chih lăm Sơ̆p hla bơar ‘nâu”. Na pơtao wơh minh grŭp pơđăm ‘nu krao apinh Kră Yang ‘Bok Kei-Dei gah lu nơ̆r đei pơma lăm Sơ̆p hla bơar Khôi juăt wă kơ băt lơ tơdrong gah Kră Yang wă kơ pơtao păng kon pơlei Kră Yang (trong 21).

Tơdrong đe ‘bôh Sơ̆p hla bơar khôi juăt noh ưh kơ đei pơrơ̆ng ‘bôh ôh, mălei đơ̆ng Kră Yang tơ’bôh ăn. Kră Yang wă kơ pơtao păng kon pơlei Sư mơ̆ng nơ̆r Kră Yang bơtho tơ’bôh ăn đơ̆ng lăm khôi juăt Kră Yang. Yua kơ lu ‘bok sư sơ̆ păng kon pơlei, ưh kơ “wei răk, pơm kiơ̆ lu khôi juăt” (II Hơ’mon 33:8). Lu sư ưh kơ hiơ̆k bơngơ̆t wei răk khôi juăt Kră Yang na tơhiong lê̆ Sơ̆p hla bơar khôi juăt noh. Đơ̆ng tơdrong noh na lu sư jing kơkuh kơ rup yang. “Lu sư pơm yoch kơnê̆ hloh kơ lu bơngai adrĕch mă Kră Yang pơrăm pơlôch đĭ ‘bơ̆t anăp lu bơngai Isơrael”. (II Hơ’mon 33:9), lăm dêh noh đei lơ anih  kơkuh kơ lu rup yang, yua kơ đơ̆ng kơtơ̆ng đŏk khôi juăt Kră Yang, păng yua kơ đơ̆ng pơtao đei jơhngơ̆m ‘maih wă băt pơnhen dôm tơdrong kiơ sư kơtơ̆ng na pơtao Jôsia băt mơ̆n lu ‘bok sư sơ̆ pơm glăi tơpă na đơ̆ng noh đei pŭ iŏk tơdrong răm truh.

Dang ei, dah ưh kơ đei nơ̆r Kră Yang lei lơ bơngai ưh kơ băt kơnăl kơdih akâu bơngai yoch kăl kơ đei tơdrong dŏng pơklaih đơ̆ng ‘Bok Krist, kơplah bơngai lui đŏk nơ̆r Kră Yang gô đei tơdrong bơtho tơ’bôh, bơtho pơjĭ wă kơ lu bơ̆n gơh pơm ‘lơ̆ng tơpăt (II Timôthê 3:16 ). Dah ưh kơ đŏk păng pơhrăm nơ̆r Kră Yang lei ưh kơ wei rong gah bơhngol, ưh kơ ‘bôh bơ̆n glăi kiơ, ưh kơ hlôi đơ̆ng tơdrong pơhlŭ păng kĕ jei đơ̆ng tơdrong yoch, kon pơlei Kră Yang dang ei, đei lơ trong wă năm jê̆ nơ̆r Kră Yang lăm sơ̆p hla bơar ‘Bok Kei-Dei tơlĕch đơ̆ng kơmăy in, đơ̆ng lăm mang Internet, đơ̆ng noh lăm Điên thoăi… apinh ‘nĕ kơ đei bu tơhiong Sơ̆p hla bơar nơ̆r Kră Yang đơ̆ng lăm hnam dơnŏ bơ̆n kơdih! Kră Yang wă kơ lu bơ̆n đŏk, pơhrăm, tơchĕng nơ̆r Kră Yang măng năr (Jôsuê 1:8) păng wă kơ Kră Yang lăp đon thoi pơtao Jôsia adrol sơ̆. Dah ưh kơ đŏk păng pơhrăm nơ̆r Kră Yang lei na pơm thoi yơ wă kơ lu bơ̆n sơng iŏk păng chu kiơ̆ nơ̆r Kră Yang bơtho!

Ơ Kră Yang, inh apinh Ih mơnat kơ inh oei rơdu, alah kơ đŏk nơ̆r Ih phŏ kư̆m đei đŏk mơ̆n mă đŏk ưh tam đĭ jơhngơ̆m, đŏk pơtrŏ đĕch. Apinh Ih tơgŭm inh tơnăp đŏk păng pơhrăm nơ̆r Ih păng pơm kiơ̆ nơ̆r Ih bơtho wă kơ chăl arih inh đei pŭn đơ̆ng Ih ăn. Krao khan yua anăn Kră Yang Yêsu Krist, Amen.

Lu bơ̆n hăm achăng hŭt pơhrăm nơ̆r Kră Yang păng đŏk pơtrŏ đĕch dah ưh? Athei tơbral na wih đŏk hŏk pơhrăm dơ̆ng nơ̆r Kră Yang mă trŏ.

Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 45-46

Kênh Youtube BHKTHN:

https://www.youtube.com/c/bhkthn

The post Chă ‘Bôh Dơ̆ng Hla Bơar Khôi Juăt – 26/11/2025 appeared first on Hội Thánh Tin Lành Việt Nam.