Klei Aê Diê Blŭ: II Klei Yăl Dliê 34:8-13

Êlan kliăng: “Phung anăn mă bruă sĭt suôr” (II Klei Yăl Dliê 34:12 a)

Klei êmuh ksiêm mĭn: Leh bi doh rup yang hlăm krĭng, ya klei Mtao Jôsia lŏ dơ̆ng ngă? Mơ̆ng ya klei ba klei tŭ dưn kơ bruă mkra mđĭ Sang yang Yêhôwa? Si klei hriăm anei mđĭ ai drei hlăm ai tiê mă bruă kơ Aê Diê?

Leh kčưm dơ̆ng duah Aê Diê hlăk pluh năm thŭn, truh dua pluh thŭn, Mtao Jôsia hiu bi doh rup yang kluôm čar Yuđa leh anăn Israel. Amâo ƀuh ôh pô ngă ênŭm leh kơ Khua Yang, leh mâo dua pluh năm thŭn, mtao ngă klei mkra mđĭ sang yang Yêrusalem. Tơdah ƀuh sang yang mdơ̆ng leh mơ̆ng sui hŏng anei tlâo êtuh thŭn jhat rai, lui ruh hlăm lu thŭn, boh nik hlăk ênuk Mtao ama Manase kiă kriê, kyua anăn Mtao Jôsia gĭr lŏ mkra wĭt čiăng kơ phung ƀuôn sang lŏ wĭt kkuh mpŭ kơ Aê Diê hŏng klei djŏ klă (II Klei Yăl Dliê 34:1-7), snăn anôk kkuh mpŭ ăt jăk siam mơh, bi guh kơang Anăn Aê Diê. Mnuih ƀuôn sang hlăm krĭng myơr leh ai tiê leh anăn prăk mah. Amâo djŏ knŏng mnuih Yuđa ti kwar dhŭng myơr ôh ƀiădah wăt phung ti kwar dưr adôk, arăng amâo mă jing mnă leh ƀuôn Samari dlưh rai, ăt myơr mơh. Kyua klei Mtao Jôsia bi doh rup yang mnuih ƀuôn sang hlăm kluôm ala čar sa ai tiê myơr čiăng lŏ mkra Sang Aê Diê. Phung Lêwi mâo bruă klam mă prăk, pioh prăk; leh anăn prăk mâo pô čih hră Y-Saphan hŏng dua čô mkăn ba kơ Khua ngă yang prŏng Y-Hilkia jao kơ phung khua kiă kriê mưn kơ phung mă bruă leh anăn blei mnơ̆ng pioh rŭ mdơ̆ng.

Bruă lŏ mkra Sang yang dưi ngă jăk siam kyua phung rŭ mkra mă leh bruă hŏng klei jih ai tiê, jing sĭt suôr, kpă ênô, leh anăn phung Lêwi gĭt gai bruă tŭ dưn (êlan 12-13). Grăp čô hlăm ala ƀuôn mnuih Yuđa, mơ̆ng mtao truh kơ phung čih hră, khua ngă yang, mnuih Lêwi…phung rŭ mkra đru mguôp hlue si klei thâo pô, mnuih ƀuôn sang đru mguôp ngăn prăk, phung Lêwi đru kriê dlăng. Grăp čô bi leh hŏng jih ai tiê, sĭt suôr, mguôp ai tiê pô čiăng lŏ mkra Sang yang. Diñu thâo săng anei amâo djŏ jing bruă hjăn hlei pô ôh, ƀiădah jing jih jang phung ƀuôn sang Aê Diê, bi êdah hŏng klei dăp djŏ êlan, mâo êpul, bi êdah klei sa ai jih hnơ̆ng.

Bruă Aê Diê hruê anei, boh nik bruă mkŏ mjing Sang yang, ăt brei mâo klei đru mguôp ai tiê mơ̆ng jih jang phung ƀuôn sang Aê Diê, ti gŭ klei gĭt gai phung Khua Yang tiŏ nao. Grăp čô brei mâo bruă klam đru mguôp mă bruă kơ Aê Diê tui hlue si klei thâo, klei Aê Diê brei kơ pô, leh anăn yuôm bhăn jing brei drei mă bruă Aê Diê hŏng jih ai tiê, sĭt suôr. Grăp čô drei brei mâo ai tiê msĕ si Mtao Jôsia, ƀuh klei čiăng mjêč mơ̆ng Sang Aê Diê, amâo mdei ôh kơ ya klei pô ngă leh, ƀiădah brei gĭr nanao čiăng ba klei jăk siam hĭn kơ Sang Yang Aê Diê. Akâo kơ Aê Diê đru drei jih ai tiê myơr leh anăn hrăm mbĭt mkŏ mjing Sang Aê Diê jăk siam čiăng Anăn Ih mâo klei guh kơang.

Drei ƀuh ya klei čiăng mjêč mơ̆ng sang Aê Diê pô dôk kkuh mpŭ? Ya klei drei ngă tơdah ƀuh klei čiăng anăn?

Wah lač: Ơ Khua Yang, akâo kơ Ih đru kâo thâo săng bruă klam kâo hlăm Sang Aê Diê čiăng kơ kâo mâo sa ai, jih ai tiê myơr leh anăn hrăm mbĭt mă bruă Ih hŏng jih ai tiê, sĭt suôr. Kâo wah lač hlăm Anăn Khua Yang Yêsu Krist, Amen.

Dlăng Klei Aê Diê Blŭ hlăm tlâo thŭn: Y-Yêrêmi 44

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Kênh Youtube BHKTHN:

https://www.youtube.com/c/bhkthn

The post Sĭt Suôr Lŏ Mkra Sang Aê Diê – 25/11/2025 appeared first on Hội Thánh Tin Lành Việt Nam.