I Timautes 2:1-7

Nqe cim:

“Rau qhov yeej muaj tib tug Vajtswv xwb, thiab muaj tib tug nyob nruab nrab ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg.” (I Timautes 2:5)

Lus nug sawvdaws xav:

–       Tomqab uas qhia thov pab sawvdaws thiab pab tej nomtswv lawm, Timthawj Paulus qhia ntxiv licas?

–       Vim li cas nws qhia meej tias muaj tib tug Vajtswv xwb, thiab muaj tib tug nyob nruab nrab xwb?

–       Peb yuav tsum pab cov uas tseem tsis tau paub Vajtswv nkag siab txog yam dabtsi?

Tom qab qhia tias yuav tsum thov Vajtswv pab sawvdaws thiab tej nomtswv, Timthawj Paulus qhia tias: Vajtswv xav kom tej neeg sawvdaws nyias dim nyias lub txim thiab xav kom lawv paub qhov tseeb. Vajtswv haivneeg yuav tsum muaj siab hlub thiab thov Vajtswv pab rau cov uas tseem tsis tau txais kev cawm dim, vim qhov ntawd haum Vajtswv lub siab nyiam. Tsis tas li ntawd xwb, Vajtswv tseem xav kom txhua tus tibneeg “paub qhov tseeb” kom lawv lub siab mos nyoos txais yuav txojkev cawmdim uas Vajtswv pub (nqe 1-4).

Txij thaum poob rau kev txhaum, tibneeg twb xav tau ntau txojkev thiab pehawm ntau tus vajtswv kom tau kev cawm dim, tiamsis Vajtswv Txojlus qhia meej tias: “Rau qhov yeej muaj tib tug Vajtswv xwb, thiab muaj tib tug nyob nruab nrab ua kom neeg thiab Vajtswv sib cuag tau. Tus ntawd yog Yexus Khetos tus uas los yug ua neeg” (nqe 5). Tus Timthawj Petus kuj tau tshajtawm muaj zog sis hauv tsev hais plaub hais tias: “Tsis muaj leejtwg cawm tau peb dim peb lub txim, tsuas yog Yexus tib leeg xwb thiaj cawm tau; tsis muaj dua lwm tus uas Vajtswv tso los cawm peb neeg ntiajteb kom peb dim peb lub txim” (Tes Haujlwm 4:12 ). Tsis tas li ntawd xwb, tsuas muaj tib tug nyob nruab nrab ntawm Vajtswv thiab neeg uas yog Tswv Yexus Khetos. Lo lus “Tus Nyob Nruab Nrab” hais txog tus uas ua kom sib haum. Vim tibneeg ua txhaum, kev txhaum thiaj ua rau tibneeg raug cais ntawm Vajtswv. Tswv Yexus yog Vajtswv uas los yug ua neeg, Nws yog Vajtswv thiab yog tibneeg, yog li tsuas yog Tswv Yexus tibleeg thiaj yog tus nyob nruab nrab ua kom tibneeg thiab Vajtswv sib haum tau los ntawm Nws txojkev tuag saum tus ntoo khaublig ua nqi txhiv tibneeg sawvdaws.

Hnub thaud, Vajtswv siv Timthawj Paulus “ua ib tug timthawj thiab ua xibhwb qhia Vajtswv Txojlus” los tshaj tawm qhov tseeb rau lwm haivneeg thiab coj lawv los ntseeg Vajtswv (nqe 7). Hnub no, peb txhua tus kuj raug hu los tshajtawm Txojmoo Zoo rau lub ntiajteb uas yuav raug kev puastsuaj (Mathais 28:19-20; Malakaus 16:15 ). Peb yuav tsum “thov Vajtswv pab sawvdaws thiab ua Vajtswv tsaug, thov Vajtswv pab cov vajntxwv thiab cov nomtswv” (nqe 1-2). Nrog rau qhov ntawd, peb yuav tsum pab sawvdaws kom lawv paub ntseeg Vajtswv tib leeg xwb, thiab nkag siab qhov tseeb hais txog txojkev cawmdim hauv Tswv Yexus Khetos. Nws yog tus Nyob Nruab Nrab uas tau muab Nws cov ntshav los ntxuav tibneeg tej kev txhaum. Yog ib tug phoojywg tsuas los cuag Vajtswv vim tej kev xav xwb, ces yuav nyuaj rau nws sawv ruaj. Tsuas yog thaum los cuag Vajtswv nrog txoj kev ntseeg tseeb thiab muaj kev nkag siab meej ces thiaj yuav  muab siab npuab tus Tswv thiab Pawg Ntseeg, ces nws txoj kev ntseeg thiaj yuav loj hlob zuj zus tuaj.

Thov Vajtswv,

Tus Tswv, thov zam txim rau nyuam yaus vim tsis tau tas siab ua tim khawv qhia koj zaj rau lwm tus. Thov koj pab nyuam yaus muaj lub siab taij thov Koj thiab tas siab qhia Koj zaj uas yog qhov tseeb ntawm kev cawm dim rau txhua tus. Nyuam yaus tuav Yexus Khetos lub npe thov Amees.

Ib tsoom cov mloog uas hmov thiab tshua,

Peb puas pab cov tsis tau ntseeg paub qhov tseeb thiab muaj kev ntseeg lawm tau?

Nyeem Vajluskub hauv peb lub xyoo: Yelemis 41

Kênh Youtube BHKTHN:

https://www.youtube.com/c/bhkthn

The post Kev Ntseeg thiab Paub Qhov Tseeb – 22/11/2025 appeared first on Hội Thánh Tin Lành Việt Nam.