Ina savur ferma en il nas la primavaira – quai n'èn betg mo las pradas che flureschan, mabain era la puschina e la grascha ch’ins dovra per engraschar las pradas. Era sche la savur n’è betg adina empernaivla, è quai impurtant per il pastg e per las flurs. Il «Minisguard» ha visità la famiglia Winzap a Falera per guardar tge ch’è la differenza tranter la grascha e la puschina e co ch’ins las reparta sin il prà.

Pertge dovra il prà puschina e grascha e cura metter ella?
Per ch’il prà possia crescher, dovra el differentas chaussas: sulegl, aua e gas or da l’aria. Ma per ch’il pastg e las flurs creschian anc pli fitg, dovran els nutriment supplementar. E quel datti en la puschina ed en la grascha. Quest nutriment survegn il prà la primavaira e l’atun. Ma uschè simpel n’èsi betg declerà. Cura exact ch’il prà survegn tge nutriment è in’istorgia per sasezza – che ti vegns a savair cun guardar il «Minisguard».