L'oratori da Nadal da Johann Sebastian Bach è in'ovra en sis parts per soli, chor maschadà ed orchester. Las singulas parts èn vegnidas preschentadas per l'emprima giada dal chor da Thomaner a Leipzig tranter Nadal 1734 e Buania 1735.

L'oratori da Nadal da Johann Sebastian Bach tutga tar ses oratoris ils pli populars ed è ina da sias cumposiziuns spiritualas las pli enconuschentas. L'ovra cumpiglia sis cantatas che tematiseschan ils dis tranter Nadal e Buania (Festa dals Trais sontgs retgs), ella raquinta pia l'istorgia davent da la naschientscha da Jesus Cristus, sur l'annunzia entras ils anghels, la visita dals pasturs fin il di ch'ils Trais Sontgs Retgs (Casper, Meltger e Baltasar) visitan il Bambin en la stalla a Bethlehem.