Phau Ntawv Nkauj 95:1-7

Nqe cim:

“Peb cia li los cuag nws, ua nws tsaug thiab hu nkauj zoo siab qhuas nws.”

(Phau Ntawv Nkauj 95:2)

Lus nug rau sawvdaws xav:

–       Tus sau Ntawv Nkauj 95 nqua hu cov nyeem ua dabtsi?

–       Nws piav txog Vajtswv yog Tus zoo li cas thiab peb yog dabtsi?

–       Peb pehawm Vajtswv nrog rau lub siab thiab tus cwjpwm li cas?

Ntawv Nkauj 95 qhia meej txog qhov tseemceeb ntawm tus cwjpwm qhia tshwm lub siab paub ua Vajtswv tsaug thaum peb hu nkauj pehawm Nws. Tus sau Ntawv Nkauj nqua hu cov nyeem cia li hu nkauj zoo siab qhuas Vajtswv thiab ua Nws tsaug (nqe 1-2), ntawm tus cwjpwm txo hwjchim (nqe 6).  Cov ntseeg muaj ntau yam tsimnyog los hu nkauj qhuas yus tus Vajtswv. Vajtswv tsimnyog tau txais kev qhuas los ntawm txoj kev xyiv fab hlo thiab kawg siab ntsws. Txawm yog muaj qee lub sijhawm peb qhuas Vajtswv hauv kev nyuaj siab uas xav tsis thoob los txhob muab txoj kev nyuaj siab ntawd ua qhov tseemceeb. Tiamsis cia li zoo siab vim Vajtswv pub koob hmoov rau peb hla dhau tej kev nyuaj siab ntawd thiab zoo siab hauv txhua lub sijhawm.

Tus sau Ntawv Nkauj qhia paub: “Rau qhov tus TSWV yog Vajtswv tus uas muaj hwjchim loj, nws yog tus Vajntxwv uas muaj hwjchim loj tshaj lwm tus vajtswv” (nqe 3). Peb zoo siab vim Vajtswv pub txoj koob hmoov rau peb tau qhuas Tus Tswv ntawm txhua tus tswv. Vaajtswv muaj hwjchim, txhua yam yog Nws tug ntawd yog qhov vimchiv uas tsimnyog peb qhuas thiab pehawm Vajtswv ntawm lub siab ua Nws tsaug. Peb txoj kev pehawm Vajtswv yuav tsum muaj lub siab ua Nws tsaug. Paub Vajtswv Tus loj kawg nkaus thiab paub ua Vajtswv tsaug rau ntau yam uas Nws tau pub rau peb yuav pab peb pehawm Vajtswv yog rau qhov tseeb thiab haum Nws siab (Yauhas 4:23 ).

Tus sau Ntawv Nkauj rov hais meej txog Vajtswv Tus loj kawg nkaus dhau los ntawm Nws lub hwjchim tsim ib puas tsav yam. Txij hauv tej hav qis mus rau saum tej roob siab, ntawm hiav txwv mus rau saum thaj av qhuav, puavleej yog Vajtswv txhais tes tsim los (nqe 4-5). Nws yog tus Tswv tswj tagnrho lub qab ntuj khwb no, hauv ntawd muaj peb tib neeg. Tus uas sau Ntawv Nkauj 95 piv hais tias, “peb yog cov neeg uas nws tsomkwm, peb yog pab yaj uas nws pub zaub rau noj” (nqe 7). Yog li ntawd, peb yuav tsum pehawm Vajtswv ntawm lub siab txo hwjchim vim Nws yog tus uas tsim peb los (nqe 6). Niaj hnub nim no coob tug tsis nco yus feem xyuam lawd, mus pe tej vajtswv uas neeg txhais tes puab, tsis pehawm Tus Tswv uas tsim yus. Vajtswv cov menyuam yuav tsum nco ntsoov, kev pehawm yog feem xyuam uas txhua tus yuav tsum tau ua rau Tus uas tsim yus los.

Phau Ntawv Nkauj 95 ntuas peb txog Vajtswv lub hwjchim uas loj kawg nkaus tshaj txhua yam. Dhau qhov ntawd txhawb peb pehawm Vajtswv ntawm lub siab txo hwjchim thiab ua Nws tsaug. Peb yuav tsum pehawm Vajtswv dhau ntawm txhua tes haujlwm hauv peb lub neej txhua hnub, tsis tsuas yog hauv kev mus pehawm tom tuamtsev xwb.  kev pabcuam hauv pawg ntseeg xwb. Peb yuav tsum nco ntsoov ua Vajtswv tsaug rau Nws txoj kev cawmdim thiab pehawm Nws kawg siab kawg ntsws.

Thov Vajtswv,

Vajtswv, thov zam txim rau nyuam yaus, vim muaj ntau zaus nyuam yaus pehawm tsis paub ua Koj tsaug. Thov pab nyuam yaus nco ntsoov hais tias Koj yog Tus loj Tus zoo kawg nkaus kom nyuam yaus pehawm Koj kawg siab kawg ntsws ntawm lub siab paub ua Koj tsaug. Nyuam yaus tuav Tswv Yexus Khetos lub npe thov, Amees.

Ib tsoom mloog uas hmov tshua

Peb puas tabtom muaj lub neej pehawm Vajtswv thiab paub ua Nws tsaug?

Nyeem Vajluskub hauv peb lub xyoos: Yelemis 20

Kênh Youtube BHKTHN:

https://www.youtube.com/c/bhkthn

The post Pehawm Ntawm Lub Siab Ua Tsaug – 1/11/2025 appeared first on Hội Thánh Tin Lành Việt Nam.