II Xwmtxheej 34:3-7

Nqe cim:

“Yog li ntawd cov phoojywg uas kuv hlub, nej tsis txhob mus nrog luag pe dab pe mlom.” (I Kauleethaus 10:14 )

Lus nug sawvdaws xav:

–       Xyoo kaum ob ua vajntxwv, Yauxiyas pib ua dabtsi?

–       Nws ua tej ntawd li cas?

–       Niaj hnub nimno, peb yuav tsum rhuav tshem tej dab tej mlom twg?

Tom qab uas Vajntxwv Yauxiyas “pib pehawm nws yawgkoob uas yog Vajntxwv Daviv tus Vajtswv” plaub lub xyoos, thaum nws muaj nees nkaum xyoo, nws pib “muab tej chaw teev dab, tej mlom pojniam Aselas thiab lwm yam rhuav povtseg huv tibsi.” Nws rhuav tshem tej mlom, tej qhov chaw teev dab, thiab tej cuab yeej siv pe mlom Aselas thiab Npa-as povtseg (nqe 3-4), nws kuj rhuav tshem cov Xidoos tus mlom pojniam Atates, cov Mau-am tus mlom Khemaus thiab cov Amoos tus mlom Maulej povtseg huv tibsi (II Vajntxwv 23:13 ). Vajntxwv muab tej mlom ntoo thiab mlom pob zeb rhuav pov tseg, muab zom ua hmoov thiab muab nphoo rau ntawm cov neeg uas pe tus mlom ntawd tej ntxa. Nws rhuav tej chaw teev dab nyob saum tej roob siab, rhuav tej thaj neeb, tej ncej neeb; muab tej povthawj uas pe cov mlom ntawd cov pob txha hlawv rau saum tej thaj ntawd kom qias, tsis pub siv los pe mlom ntxiv lawm. Nws tseem ntiab cov Yudas uas txawj saib yaig thiab saib tes tawm mus thiab tshem tej thaj xwmkab, tej mlom, thiab txhua yam cuabyeej uas siv teev dab tawm hauv lub nroog Yeluxalees thiab thoob plaws lub tebchaws Yudas mus povtseg (II Vajntxwv 23:24 ).

Vajntxwv mus “ua li ntawd rau xeem Manaxes, xeem Efalayees thiab xeem Xime-oos txhua lub nroog mus txog ntua pem xeem Nathalis”, uas yog cov nroog nyob sab qaum teb, ces nws rov qab los rau hauv Yeluxalees. Vim thaum ntawd cov Yixalayees sab qaum teb twb raug cov Axilias txeeb tau thiab raug ntes mus ua cev qhev lawm. Thiab lub sijhawm ntawd, tebchaws Axilias tsis muaj zog lawm, yog li Vajntxwv Yauxiyas thiaj li tshem tau kev pe dab pe mlom tawm ntawm tej cheeb tsam ntawd mus.

Kev nrhiav Vajtswv ntawm Vajntxwv Yauxiyas tsis yog tsuas nyob hauv lub siab xav xwb, tiamsis kuj pom hauv nws tes haujlwm rhuav tshem tej kev pe dab pe mlom, coj cov pejxeem rov los pehawm Vajtswv. Cov ntseeg Yexus lub neej kuj yuav tsum yog lub neej uas nrhiav Vajtswv, tsis yog tsuas nrhiav hauv nruab siab xwb, tiam sis kuj yuav tsum ua tes haujlwm tshem txhua yam mlom tawm hauv peb lub neej mus. Raws li cov ntseeg Yexus, mlom yog tej yam uas peb cia siab rau es tsis yog cia siab rau Vajtswv. Yog tias nyob Vajntxwv Yauxiyas tiam muaj tej mlom, tej thaj neeb, thiab kev pe dab pe mlom ntau heev uas cov vajntxwv yav dhau los tseg cia, ces niaj hnub nimno kuj muaj ntau yam thiab ntau hom mlom tib yam. Cov mlom niaj hnub nimno muaj ntau yam tshiab. Tej zaum yuav yog kev ntseeg cuav, nyiaj txiag, meejmom, kev vam meej, kev zoo nkauj, lossis tej yam uas peb ntseeg tias yuav coj kev zoo siab thiab kev txaus siab los hloov Vajtswv qhov chaw. Tej ntawd tej zaum yuav yog xovtooj, khoom siv, lossis tej yam uas peb nyiam heev uas siv sijhawm rau tej ntawd ntau dua li siv nrog Vajtswv,… Peb yuav tsum ceev faj vim txhua tiam yeej muaj ntau yam mlom thiab muaj ntau hom, nrhiav kev ntxias peb tsis txhob pehawm Vajtswv raws li qhov tseeb qhov yog.

Thov Vajtswv pab kom peb cia siab rau Nws thiab muaj kev txiav txim siab tshem tawm txhua yam mlom hauv peb lub neej. Cia li txiav txim siab rhuav, tshem, zom tej mlom hauv siab pov tseg kom tej ntawd tsis muaj chaw nyob ntxiv thiab tsis tau pehawm ntxiv hauv peb lub neej.

Thov Vajtswv,

Tus Tswv, thov pub kom nyuam yaus pom tej yam uas twb dhau los ua mlom nyob hauv nyuam yaus lub siab thiab lub neej. Thov Koj zam txim rau nyuam yaus, thiab thov Koj pub zog txaus kom nyuam yaus tshem tau tej ntawd mus tag ib txhis. Nyuam yaus cog lus tias tsuas pehawm Koj xwb thiab hlub Koj tshaj txhua yam. Nyuam yaus tuav Yexus Khetos lub npe thov, Amees.

Ib tsoom cov mloog uas hmov thiab tshua,

Peb tseem tshuav tej mlom twg yuav tsum raug tshuav tshem?

Nyeem Vajluskub hauv peb lub xyoo: Yelemis 43

Kênh Youtube BHKTHN:

https://www.youtube.com/c/bhkthn

The post Tso Tseg Kev Pe Dab Pe Mlom – 24/11/2025 appeared first on Hội Thánh Tin Lành Việt Nam.