這集阿愷之聲Podcast「空中泡茶間」單元實在非常緊張，這是本節目開台四年來邀請著上大跤（大咖）的來賓，咱歡迎臺灣前總統陳水扁！

2006年阿愷讀高中一年級，彼年的歷史課本頭一遍出現整學期的「臺灣史」，這年是阿扁做總統的第六年，也是教育部實施九五暫綱的頭一年。總算，臺灣的歷史不再是對中國史拆出來，咱總算有機會瞭解家己的故事，這件代誌對我這个世代的人影響誠大，毋管是後來的318學生運動，甚至是恁所收聽的這个全臺語Podcast阿愷之聲。

咱先轉去2000年的臺灣政壇，面對朝小野大、保守勢力為主的阿扁總統，當年是按怎推動本土化政策？講著阿愷相當致意（在意）的臺語，為啥阿扁總統的臺語演講遮爾厲害？伊會按怎看臺語文化的未來？

面對細漢時就非常尊敬的政治家，這集節目台長實在有夠激動，節目最後，阿愷甚至有機會和阿扁總統合唱2004年「手牽手護台灣」的主題曲，由陳明章作詞作曲的「伊是咱的寶貝」，哎！實在非常圓滿，感謝這一切的發生！

► 節目重點

• 彼當年面對朝小野大，按怎推動本土化政策？
• 透過新課綱，彼當陣臺灣需要啥款的本土認同？
• 為啥阿扁總統用臺語演講遮呢厲害？
• 按怎看臺語文化的未來？
• 阿扁總統予文化工作者的一句話？

► 特別感謝｜陳君宥提供相片、江羿賢和李孟佑牽成訪問
► 節目音樂｜鹿港新聲閣
► 贊助節目｜ https://voiceofakai.oen.tw