Klei Aê Diê Blŭ: II Klei Yăl Dliê 34:14-21

Êlan kliăng: “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng ngă tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt” (Y-Yôsuê 1:8)

Klei êmuh ksiêm mĭn: Ya mta Khua ngă yang Y-Hilkia ƀuh hlăm Sang yang? Si knuih Mtao Jôsia leh tal êlâo dlăng hdruôm hră klei bhiăn? Si drei ngă tơdah mâo Klei Aê Diê Blŭ ƀuah mkra kơ klei soh pô?

Khua ngă yang Y-Hilkia ƀuh hlăm sang yang hdruôm hră Klei Bhiăn Aê Diê luč sui leh. Ñu jao hdruôm hră anăn kơ pô čih hră Y-Saphan, leh anăn Y-Saphan răk mtam kơ mtao hmư̆. Anei jing gưl tal êlâo Mtao Jôsia tuôm hmư̆ Klei Aê Diê Blŭ. Leh hmư̆ klei čih hlăm Hdruôm hră Klei Bhiăn, mtao kơhiêk ao pô, bi êdah klei ênguôt hnĭng jih hnơ̆ng. Mtao huĭ hyưt thâo kral “phung aê drei amâo djă pioh ôh klei Yêhôwa blŭ, čiăng ngă tui si jih jang klei čih leh hlăm hdruôm hră anei.” Mtao tiŏ nao sa êpul mâo êma pluh čô mnuih nao akâo kơ Yêhôwa kơ klei čih leh hlăm hdruôm hră čiăng thâo săng lu hĭn kơ klei Khua Yang brei kơ mtao leh anăn kơ jih jang phung ƀuôn sang (êlan 21).

Bruă ƀuh sa hdruôm hră amâo djŏ kyua klei čŏng ƀuh ôh ƀiădah jing klei Aê Diê čiăng. Ñu čiăng kơ mtao leh anăn phung ƀuôn sang hmư̆ Klei Aê Diê blŭ čiăng mâo klei ƀuah mkra, bi hriăm kyua klei bhiăn Ñu. Phung aê mtao leh anăn phung ƀuôn sang, amâo “kriê pioh, hlue ngă klei bhiăn” (II Klei Yăl Dliê 33:8). Diñu amâo mđing kriê pioh ôh klei bhiăn Aê Diê leh anăn brei luč hĕ. Klei anăn ngă kơ diñu lĕ hlăm klei kkuh kơ rup yang, “ngă klei jhat lu hĭn kơ phung găp djuê Yêhôwa bi rai leh” (II Klei Yăl Dliê 33:9), leh anăn hlăm krĭng bŏ hŏng sang ngă yang, kkuh kơ rup yang. Kyua hmư̆ hdruôm hră Klei Bhiăn, leh anăn kyua mtao mâo ai tiê čiăng thâo êlam ya klei pô hmư̆ leh kyua anăn Mtao Jôsia thâo klei soh kjham snăk mơ̆ng aê pô leh anăn boh jhat kjham snăk mơ̆ng klei soh diñu ngă leh.

Hruê anei, tơdah amâo mâo Klei Aê Diê Blŭ, arăng amâo thâo kral ôh kơ drei pô jing phung soh čiăng mâo klei bi mtlaih mơ̆ng Yang Krist. Tơdah phung đăo dlăng Klei Aê Diê Blŭ srăng mâo klei ƀuah mkra, mtô, bi hriăm čiăng êbat hlăm klei kpă ênô (II Y-Timôthê 3:16 ). Tơdah amâo dlăng leh anăn hriăm Klei Aê Diê Blŭ snăn amâo srăng dưi rông ba ôh hlăm klei hdĭp myang, tơdah amâo ƀuh ôh klei soh, amâo dưi ôh hŏng klei mplư leh anăn dưi hĭn hŏng klei soh. Phung ƀuôn sang Aê Diê ară anei mâo lu hdră čiăng hriăm Klei Aê Diê Blŭ hŏng hră kđăm mkra, hlăm internet, wăt hlăm đĭng blŭ… Đăm ôh hlei pô brei Klei Aê Diê Blŭ luč hĕ hlăm sang pô mtam! Aê Diê čiăng kơ drei dlăng nanao, hriăm leh anăn ksiêm hriăm Klei Aê Diê Blŭ hruê leh anăn mlam (Y-Yôsuê 1:8), leh anăn mâo klei bi mơak Aê Diê msĕ si Mtao Jôsia êlâo dih. Tơdah amâo dlăng leh anăn hriăm Klei Aê Diê Blŭ snăn si drei thâo ngă leh anăn gưt hlue si Klei Aê Diê Blŭ mtô!

Drei lui mơ̆ bruă hriăm Klei Aê Diê Blŭ nanao amâodah knŏng dlăng amâo nik? Brei kmhal leh anăn lŏ wĭt dlăng, hriăm Klei Aê Diê Blŭ hŏng klei djŏ.

Wah lač: Ơ Khua Yang, akâo kơ Ih pap brei kơ klei awăt kâo, alah hriăm Klei Aê Diê Blŭ amâodah knŏng dlăng Klei Aê Diê Blŭ hŏng klei ngơi mang. Akâo kơ Ih đru kâo sĭt suôr dlăng leh anăn hriăm Klei Aê Diê Blŭ, ăt hlue ngă Klei Aê Diê Blŭ mtô čiăng klei hdĭp kâo mâo klei jăk mơak. Kâo wah lač hlăm Anăn Khua Yang Yêsu Krist, Amen.

Dlăng Klei Aê Diê Blŭ hlăm tlâo thŭn: Y-Yêrêmi 45-46

Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.

Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com

Kênh Youtube BHKTHN:

https://www.youtube.com/c/bhkthn

The post Hdruôm Hră Lŏ Thâo Ƀuh – 26/11/2025 appeared first on Hội Thánh Tin Lành Việt Nam.