II Xwmtxheej 34:8-13

Nqe cim:

“Cov neeg uas kho lub Tuamtsev ncaj ncees heev.” (II Xwmtxheej 34:12 a)

Lus nug sawvdaws xav:

–       Tom qab uas rhuav tshem tej mlom hauv lub tebchaws lawm, Vajntxwv Yauxiyas tseem ua dabtsi ntxiv?

–       Vim li cas txoj haujlwm kho lub Tuamtsev thiaj tiav zoo?

–       Zaj kawm no qhuab ntuas peb yuav tsum ua haujlwm rau Vajtswv los ntawm lub siab ntsws zoo li cas?

Vajntxwv Yauxiyas pib nrhiav tus Tswv thaum muaj 16 xyoo, thaum muaj 20 xyoo, pib rhuav tshem kev pe dab pe mlom thoob plaws tebchaws Yudas thiab Yixalayees. Nws yeej tsis xav tias nws twb ua txaus lawm, yog li thaum muaj 26 xyoo nws pib kho lub Tuamtsev hauv Yeluxalees. Thaum saib pom lub Tuamtsev uas twb ua tiav peb puas xyoo dhau los twb puas tsuaj thiab raug tso tseg ntau xyoo, tshwjxeeb thaum Vajntxwv Manaxes kav. Yog li Vajntxwv Yauxiyas thiaj txiav txim siab rov txhim kho kom cov pejxeem muaj chaw zoo los pehawm Vajtswv kom tsimnyog (II Xwmtxheej 34:1-7), kom zoo phim, ua rau Vajtswv tau koob meej.

Cov pejxeem hauv lub tebchaws txaus siab hlo fij dag zog thiab nyiaj txiag. Tsis yog tsuas muaj cov Yudas nyob sab qab teb fij xwb, tiamsis cov pejxeem nyob sab qaum teb uas tsis raug ntes mus ua cev qhev tomqab lub nroog Xamalis raug poob kuj fij thiab. Vim Vajntxwv Yauxiyas rhuav tshem kev pe dab pe mlom lawm, thiaj ua rau cov pejxeem koom siab los txhim kho lub Tuamtsev. Cov Levis feem xyuam yog sau nyiaj, khaws cia hauv lub txhab; tomqab ntawd tej nyiaj tau Safas thiab ob leeg ntxiv nqa mus rau tus Povthawj Hlob Hilekiyas, kom muab rau cov thawjcoj siv them nyiaj rau cov neeg ua haujlwm thiab yuav cov khoom los txhim kho.

Tes haujlwm txhim kho dua lub Tuamtsev tiav tau zoo vim cov neeg ua haujlwm ua los ntawm lub siab dawb paug, muaj kev ncaj ncees, thiab cov neeg Levis saib xyuas haujlwm kuj tso siab tau (nqe 12-13). Txhua hom neeg hauv tebchaws Yudas, txij li Vajntxwv mus txog rau tus teev ntawv, cov Povthawj, cov Levi, cov kws ua tsev, thiab cov pejxeem fij nyiaj, cov Levis saibxyuas haujlwm,… Lawv txhua tus puavleej ua kawg siab kawg ntsws, ncaj ncees fij dag zog, nyiaj txiag los txhim kho lub Tuamtsev. Lawv pom tias qhov no tsis yog ib tug twg txoj haujlwm, tiamsis yog txhua tus uas yog Vajtswv haivneeg txoj haujlwm, yuav tsum ua raws txheej txheem, muaj saib xyuas, muaj qabhau qhia tshwm kev sib koom siab kawg nkaus.

Tus Tswv tes haujlwm niaj hnub nimno, tshwj xeeb tshaj yog kev txhim kho lub Tuamtsev, kuj cheemtsum kev koom tes ntawm txhua tus ntseeg, raws li kev saib xyuas ntawm cov neeg uas tau Vajtswv xaiv. Txhua tus yuav tsum muaj feem xyuam koom tes ua tus Tswv haujlwm raws li nyias txoj koob hmoov, nyias lub peevxwm uas Vajtswv pub thiab qhov tseemceeb yog ua tus Tswv tes haujlwm kawg siab ntsws thiab ncaj ncees. Peb txhua tus yuav tsum muaj lub siab zoo ib yam li Vajntxwv Yauxiyas, pom kev cheemtsum ntawm Vajtswv lub Tuamtsev, tsis txhob tso siab tias peb twb ua txaus lawm, tiamsis niaj hnub siv zog ua kom zoo heev ntxiv rau tus Tswv lub Tuamtsev. Thov Vajtswv pub kom peb txhua tus muaj lub siab dawb siab dav fij txhua yam thiab koom tes txhim kho lub Tuamtsev kom Nws lub Npe tau koob meej.

Thov Vajtswv,

Tus Tswv, thov pab kom nyuam yaus to taub txog nyuam yaus lub luag haujlwm hauv Koj lub Tsev kom nyuam yaus niaj hnub koom siab nrog sawvdaws, fij tag nrho txhua yam thiab koom siab ua Koj tes haujlwm los ntawm lub siab dawb paug thiab ncaj ncees. Nyuam yaus tuav Yexus Khetos lub npe thov, Amees.

Ib tsoom cov mloog uas hmov thiab tshua,

Peb xam pom kev cheemtsum twg hauv lub Tuamtsev uas peb tabtom pehawm? Peb yuav ua dabtsi thaum pom tej kev cheemtsum ntawd?

Nyeem Vajluskub hauv peb lub xyoo Yelemis 44

Kênh Youtube BHKTHN:

https://www.youtube.com/c/bhkthn

The post Tas Siab Kho Tus Tswv Lub Tuamtsev – 25/11/2025 appeared first on Hội Thánh Tin Lành Việt Nam.