II Hơ’mon 34:8-13

“Lu bơngai thơ̆ noh jang đĭ jơhngơ̆m” (II Hơ’mon 34:12 a)

Nơ̆r jet tơchĕng pơwao:

–               Đơ̆ng rŏng kơ hơmet rơgoh lu rup yang lăm dêh Pơtao Jôsia pơtrơp jang tơdrong kiơ?

–               Yua kơ đơ̆ng tơdrong kiơ jang hơmet ming hnam akŭm đei yua?

–               ‘Bai pơhrăm ‘nâu pơtrŭt bơ̆n bơ̆jang kơ Kră Yang hăm jơhngơ̆m thoi yơ?

Đơ̆ng rŏng kơ chơchă Kră Yang lăm sơnăm mă mơjĭt tơdrâu, Pơtao Jôsia jang hŭt lê̆ đĭ rup yang jơ̆p anih Juđa păng Isơrael. Ưh kơ đei ‘bôh bơ̆n kơdih jang tôm mah kơ Kră Yang, kơplah ‘bar jĭt tơdrâu sơnăm, pơtao jang pơdơ̆ng ming hnam Kră Yang tơ Jêrusalem. Kơplah ‘bôh hnam akŭm đei pơdơ̆ng ming pơlei lăm pêng hrĕng sơnăm đĭ hiah răm, achăng tŭk lơ sơnăm bơih, lăm jơhnơr pơtao ‘bă Manase, thoi noh pơtao Jôsia adrin pơdơ̆ng ming wă kơ kon pơlei wih akŭm kơkuh kơ Kră Yang mă trŏ hloh (II Hơ’mon 34:1-7). Anih kơkuh kư̆m ‘lơ̆ng rŏ, ưang anăn Kră Yang, kon pơlei đei jơhngơ̆m pơyơ̆r jơhngơ̆m pran păng jên tơmam ưh kơ sĭ lu bơngai Juđa gah gơal đĕch ôh pơgơ̆r, mălei lu kon pơlei gah yă nơ̆m mă oei arih, ưh kơ đei rôp pơm bơnă đơ̆ng rŏng kơ dêh Samari đe pơrăm, kư̆m dai  pơgơ̆r. Yua kơ đơ̆ng tơdrong hơmet rơgoh tŭk lê̆ lu rup yang đơ̆ng pơtao Jôsia na kon pơlei lăm char pôm jơhngơ̆m pơdơ̆ng ming hnam Kră Yang ‘Bok Kei-Dei. Lu bơngai Lêwi hiơ̆k sơng iŏk jên tơmam, chĕp iŏk, đơ̆ng noh Saphan păng ‘bar bơngai năm pơjao kơ ‘bok soi tơm Hilkia chĕp jên đơ̆ng kon pơlei pơyơ̆r kơ Kră Yang. Lu sư pơjao jên noh kơ lu bơngai wei lăng tơdrong jang lăm hnam Kră Yang lu sư apah thơ̆ wă pơm hơmet ming hnam Kră Yang.

Tơdrong jang hơmet ming hnam Kră Yang đei pơjing tơproh ‘lơ̆ng yua kơ lu thơ̆ jang đĭ jơhngơ̆m, wă khan lu sư jang tơnăp dêh, tơpăt tơpă, păng lu bơngai Lêwi wei lăng tơdrong jang tơnăp dêh (trong 12-13). Rim ‘nu bơngai lăm dêh Juđê, đơ̆ng pơtao truh tơ kon pơlei, ‘bok soi bơngai Lêwi.v.v… Lu bơngai thơ̆ jang pơtrơp kiơ̆ kơ gơh hơgei lu sư na lu kon pơlei pơyơ̆r jên tơmam, bơngai Lêwi wei lăng, lu sư jang đĭ jơhngơ̆m, tơnăp pơyơ̆r jơhngơ̆m pran wă hơmet ming hnam Kră Yang. Lu sư băt kơdih ‘nâu ưh kơ sĭ tơdrong jang bơngai bu ôh, mălei ‘nâu tơdrong jang hnam akŭm lu kon Kră Yang, đei pơjing tơproh ‘lơ̆ng tơ’bôh minh jơhngơ̆m đon tơpă.

Tơdrong jang Kră Yang dang ei, mă gĭt kăl noh man pơjing hnam akŭm, kư̆m dai kăl kơ pơyơ̆r jơhngơ̆m pran đơ̆ng kon pơlei Kră Yang bơ̆n jang kiơ̆ kơ bơngai mă đơ̆ng Kră Yang rơih dan. Mă bu bu athei pŭ iŏk hơdai bơ̆jang kiơ̆ kơ bơ̆n gơh jang tơdrong kiơ đơ̆ng Kră Yang ăn kơ bơ̆n păng gĭt kăl hloh bơ̆n athei jang kơ Kră Yang hăm đĭ jơhngơ̆m, tơnăp. Rim ‘nu kơ lu bơ̆n athei tơchĕng thoi pơtao Jôsia, ‘bôh tơdrong gĭt lăm hnam Kră Yang, ưh kơ đei pơdơh lăm tơdrong jang, mălei sư adrin wă ba lơ tơdrong ‘lơ̆ng lăm hnam Kră Yang, apinh Kră Yang ăn kơ bơ̆n đĭ jơhngơ̆m pơyơ̆r păng pơjing tơiung hnam Kră Yang rai ‘lơ̆ng hloh na ưang anăn Kră Yang.

Ơ Kră Yang, apinh Ih tơgŭm inh băt hiơ̆k tơdrong jang lăm hnam Ih wă kơ lu nhôn minh jơhngơ̆m đon, pơyơ̆r đĭ jơhngơ̆m păng hơdai băl bơ̆jang kơ Kră Yang hăm đĭ jơhngơ̆m, tơnăp, yua anăn Kră Yang Yêsu Krist, Amen.

Lu bơ̆n ‘bôh tơdrong kăl ayơ lăm hnam akŭm mă bơ̆n oei kơkuh, lu bơ̆n pơm kiơ kơplah ‘bôh tơdrong kăl noh?

Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 44

Kênh Youtube BHKTHN:

https://www.youtube.com/c/bhkthn

The post Đĭ Jơhngơ̆m Jang Hơmet Hnam Kră Yang – 25/11/2025 appeared first on Hội Thánh Tin Lành Việt Nam.