Il chant dals utschels ha diversas funcziuns biologicas: el serva per sa dar d'enconuscher, ils mastgels sa segireschan uschia lur reviers e las femnas audan immediat sch'il chantadur è in indigen u betg.

Tut tenor utschè è il syrinx, l'organ ch'els dovran per furmar tuns, equipà cun musculs differents. Interessantamain ha il corv in organ da vusch ch'è pli cumplex che quel d'in papagagl.
Il biolog Flurin Filli preschenta il chant da differents utschels sco era la musica da cumponists sco Händel, Poglietti u Beethoven ch'han surtut elements dal chant d'utschels per lur ovras musicalas.


Dal 2007 enfin il 2016 ha RTR emess emna per emna lemissiun FORUM. Persunas dal fatg or dal champ da la scienza han preschentà, declerà ed analisà fenomens, svilups e dumondas da la vita e da la societad. Pliras da questas analisas ed invistas èn restadas actualas, uschia che nus repetin durant la stad ina selecziun or dals var 500 Forums. Il Forum d'oz è vegnì emess per l'emprima giada il zercladur 2015.