Las abitants ed ils abitants da Cavaione, in pitschen vitg muntagnard sur Brusio en il Puschlav, sa definivan baud sco Austriacs, baud sco Talians e tut tenor sco Svizzers. Cavaione vala sco ultim vitg ch'è daventà pir avant 150 onns part da la Confederaziun.

Oriundamain era Cavaione in'acla da Tirano. Cun l'ir dal temp èn persunas sa chasadas si qua sur onn, 700 meters sur il fund da la val, terra da nagin cun abitantas ed abitants senza naziunalitad che na pajavan ni taglia ni prestavan servetsch militar. Però il 1874 èsi lura stà bel e finì cun la libertad ed er quels da Cavaione èn daventads burgaisas e burgais svizzers. Il Parlament federal ha dentant stuì conceder in credit spezial, per che la vischnanca da Brusio acceptia ils povers vischins da Cavaione.

La Marella sa metta als fastizs da questa istorgia e sa dumonda: co è quai stà pussaivel che nagin sa sentiva responsabel per la glieud a Cavaione? Nus visitain quest pitschen vitg cun sia gronda istorgia. Avant 150 onns vivevan anc var 100 persunas a Cavaione, oz è il vitg per gronda part abandunà ed i dat mo anc nov persunas che vivan qua sur onn.