II Xwmtxheej 34:14-21

Nqe cim:

“Thaum sawvdaws tuaj ua ke pehawm kuv, yuav tsum muaj neeg nyeem kuv phau Kevcai rau sawvdaws mloog. Koj yuav tsum niaj hnub niaj hmo kawm thiab ua raws li tej lus ntawd, koj tes haujlwm thiaj yuav tiav thiab vammeej” (Yausuas 1:8)

Lus nug sawvdaws xav:

–       Tus Povthawj Hilekiyas nrhiav pom dabtsi hauv lub Tuamtsev?

–       Vajntxwv Yauxiyas muaj tus cwjpwm li cas thaum thawj zaug hnov nyeem Phau Ntawv Kevcai?

–       Peb yuav ua li cas thaum Vajtswv Txojlus ceebtoom peb txog peb tej kev ua txhaum?

Tus Povthawj Hilekiyas nrhiav tau tus Tswv Phau Ntawv Kevcai uas tau ploj mus ntev lawm hauv lub Tuamtsev. Nws muab phau ntawv ntawd rau tus teev ntawv Safas, thiab Safas thiaj nyeem rau vajntxwv mloog. Ntawd yog thawj zaug uas Vajntxwv Yauxiyas tau hnov Vajtswv Txojlus. Thaum vajntxwv hnov cov lus hauv Phau Ntawv Kevcai tas, nws thiaj dua rhe nws lub tsho thiab nyuaj siab heev. Nws ntshai kawg thaum xam pom hais tias “peb cov yawgkoob tsis mloog tus TSWV tej lus thiab tsis ua raws li tej lus uas sau rau hauv phau ntawv no kom yuav tsum tau ua.” Vajntxwv xa ib pab neeg tsib leeg mus nug tus Tswv txog cov lus hauv Phau Ntawv kom paub meej txog Vajtswv lub siab nyiam rau nws thiab rau cov pejxeem (nqe 21).

Qhov uas nrhiav tau Phau Ntawv ntawd tsis yog ib qho xwm txheej cia li tshwmsim, tiamsis yog raws li Vajtswv lub siab nyiam. Nws xav kom vajntxwv thiab cov pejxeem hnov Nws Txojlus, kom lawv tau qhuab ntuas thiab kawm raws li Nws Txojcai. Vajntxwv cov yawg koob thiab cov pejxeem tau tsis mloog “Vajtswv tej lus” (II Xwmtxheej 33:8). Lawv tsis quavntsej ceev txuag Vajtswv Txoj Kevcai thiab muab ua ploj lawm. Qhov ntawd ua rau lawv poob rau hauv kev pe dab pe mlom, “ua txhaum loj tshaj tej kev txhaum uas lwm haivneeg uas tus TSWV muab ntiab tawm hauv lub tebchaws ua ntej nws haivneeg los nyob lawm thiab” (II Xwmtxheej 33:9), thiab lub tebchaws muaj puv npo tej chaw pe dab pe mlom. Vim hnov Vajtswv Txojlus nyeem thiab vim vajntxwv muaj siab xav paub meej txog yam uas nws tau hnov, Vajntxwv Yauxiyas thiaj pom qhov uas nws cov yawg koob tau ua txhaum loj heev thiab pom tej kev puas tsuaj loj uas lawv cov kev txhaum coj los. Vim hnov nyeem Phau Kevcai, thiab vim muaj lub siab xav paub meej txog tej yam nws hnov, Vajntxwv Yauxiyas thiaj to taub txog tej kev txhaum loj uas nws cov yawg koob tau ua thiab pom tej teebmeem txaus ntshai tshwmsim los vim lawv tej kev txhaum.

Niaj hnub nimno, yog tsis muaj Vajtswv Txojlus, tibneeg yuav tsis paub tias lawv yog neeg txhaum uas cheemtsum txojkev cawm dim hauv Tswv Yexus Khetos. Thaum tus ntseeg nyeem Vajtswv Txojlus, lawv yuav tau Vaj Ntsujplig ceeb toom, taw qhia, thiab kho kom taug kev ncaj ncees (II Timautes 3:16 ). Yog peb tsis nyeem thiab kawm Vajtswv Txojlus, ces yuav tsis muaj zaub mov yug peb sab ntsujplig, yuav tsis pom peb qhov yuam kev, thiab peb yuav tiv tsis dhau kev dag ntxias thiab kov tsis yeej kev txhaum. Vajtswv cov menyuam tiam no muaj ntau txoj haukev los nyeem Vajtswv Txojlus dhau ntawm kev nyeem phau ntawv luam tawm, hauv internet, lossis hauv xovtooj… Tsis txhob muaj leej twg cia phau Vajluskub ploj hauv peb lub tsev mus! Vajtswv xav kom peb niaj hnub nyeem, kawm, thiab xav txog Nws Txojlus nruab hnub thiab hmo ntuj (Yausuas 1:8), thiab ua tej yam haum Vajtswv siab zoo li Vajntxwv Yauxiyas yav thaum ub. Yog peb tsis nyeem Vajtswv Txojlus, peb yuav ua li cas paub thiab ua raws li Nws Txojlus qhia?

Thov Vajtswv,

Tus Tswv, thov Koj zam txim rau nyuam yaus txojkev tub nkeeg thiab tsis mob siab nyeem Vajluskub, lossis tsuas nyeem hla dhau xwb. Thov Koj pub kom nyuam yaus niaj hnub mob siab nyeem thiab kawm Koj Txojlus, thiab ua raws li Koj qhia, kom nyuam yaus lub neej tau txais Koj txoj koob hmoov. Nyuam yaus tuav Yexus Khetos lub npe thov, Amees.

Ib tsoom cov mloog uas hmov thiab tshua,

Peb puas tau tso tseg qhov kev kawm Vajtswv Txojlus tsis tu ncua, lossis tsuas nyeem hla dhau xwb? Cia li tig rov los lees txim thiab kawm Vajtswv Txojlus tiag tiag.

Nyeem Vajluskub hauv peb lub xyoo: Yelemis 45-46

Kênh Youtube BHKTHN:

https://www.youtube.com/c/bhkthn

The post Rov Nrhiav Pom Phau Kevcai – 26/11/2025 appeared first on Hội Thánh Tin Lành Việt Nam.