咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。

用台語來表現，ǹg望ta̍k家聽liáu會感覺趣味。



[Podcast]



SoundOn

https://bit.ly/ChKaL_SO



Spotify

https://spoti.fi/48jD2tI



KKBOX Podcast

https://bit.ly/ChKaL_KK



Apple Podcast

https://apple.co/3HZyfD3



YouTube Podcast

https://bit.ly/ChKaL_YT





[社交平台 Siā-kau Pêⁿ-tâi]



YouTube

https://bit.ly/ChKaL_YT



Facebook

https://bit.ly/ChKaL_FB



Instagram

https://www.instagram.com/chokangalang/



X (Twitter)

https://twitter.com/chokangalang



方格子

https://vocus.cc/salon/cho-kang-a-lang



以下內容是漢羅kah pe̍h-ōe-jī原稿，有需要歡迎ta̍k-ke來參考。



【漢羅版】



歡迎收聽「台語講怪奇」。



今á日beh kā ta̍k家紹介--ê，是天頂來--ê Sumer文明！



Sumer人ê英語是Sumerians，che是別人kā in hō ê名，in稱呼家己是烏頭人，因為in ê頭鬃是烏--ê，kah我kāng款，水噹噹。



Hńg，你頭毛已經白--ah neh，你有染--過，叫是我m̄知o͘h！



你頭毛chiah白--leh，你連目睭to白--ê，白目！



烏頭毛ê人種真chōe，kám有需要強調che？



In是beh強調講，烏頭人是外來--ê，in ê生張to̍h是kah在地人無kāng款。



人攏mā是beh強調講，我在地--ê，nah會有人teh強調講我外來--ê，是驚人chhōe伊問路nih！



Hèⁿ ā，奇怪hoⁿh，差不多teh 6500年前，Sumer文明to̍h親像香菇，po̍k--1-ē，雄雄出現tī人類ê歷史內底。



M̆？文明應該是慢慢á發展--起-來-ê，是án-nóa會講是雄雄出現？



你ài知影，現代ê Iraq南部hit片土地，是1 ê真歹生存ê所在。



Hia to̍h攏沙漠，規片攏全沙，欠水，本底to̍h khah歹生活。



雖罔是án-ne，m̄-koh teh古早時代，mā是有人tòa tī hia，一直到有1工，1陣外來ê人，來到hit ê所在。



「Eh！Lín來chia是beh創啥？阮chia ê水無夠lim ŏ͘！」



「Hăⁿ？水怎樣會無夠lim？Ah m̄是2條溪hiah大條？」



「你目睭青暝o͘h，kám無看tio̍h hit 2條溪，tī hiah遠ê所在，我ta̍k工kōaⁿ水to̍h kōaⁿ kah thèⁿ腿。」



Hit陣外來--ê，你看我，我看你，to̍h開始笑講：



「Hăⁿ？Kōaⁿ水？Nah會hiah戇？」



Chit時，to̍h看tio̍h hit陣烏頭人，家私chhoân好to̍h開始teh hia舞。



水庫--lah，運河--lah，khin-khin-khiang-khiang to̍h攏kā lín起好--ah，閣有kah噴泉--leh！



Nah有chiah簡單，無人kā in教，in to̍h會曉起水庫？



Hèⁿ ā，in ê智識，技術，攏是chhoân便便，規組chah--來-ê，我tăⁿ開始chiah會講，in ê文明是雄雄出現--ê。



Ah m̄ to̍h親像咱進前講--ê hit齣，印度ê死亡崙古城kāng款，1 ê現代化ê城市chhāi tī hia，m̄知tó位來--ê。



To̍h差不多是chit ê意思。



是講，in ê技術，是tī tó位學--ê？In chiah厲害，進前tòa ê所在，mā應該發展了chiâⁿ好--ā！



M̄知 neh，in進前是tòa tī tó位？是án怎beh離開故鄉，走來到chia，攏無人知影，橫直烏頭人to̍h開始tī chia建設，人類上早ê城市、學校，to̍h是in起--ê。



講tio̍h學校，我會記eh khah早tī學校bat學--過，Sumer人，mā有發明in家己ê文字，算是人類社會，上早ê 1款文字。



無錯，而且有挖tio̍h真chē，in hit ê時代ê文字。



Che我知影，因為in ê文字，是刻tī黏土枋頂頭，he bōe àu--去，會當保存到chit-má。



Hit當陣，in to̍h是the̍h 1支尖尖ê工具，kā文字刻tĕ黏土枋頂頭，kā hit塊枋á khǹg邊--á ho͘ ta，枋á to̍h會變kah tēng-kho̍k-kho̍k，成本kē，製作閣簡單。



M̄-koh chit ê方式欠點mā真chōe！



Ŏ͘？啥物欠點？



若tú-tio̍h落雨天，to̍h bōe-tàng kah人簽約，若無黏土枋m̄-nā bōe ta，凡勢規塊chŏaⁿ溶--去。



Hò͘，你nah會chiah戇，bē曉用火烘o͘h！



你chiah戇--leh，烘烘--leh，規塊燒燙燙，是beh án怎the̍h？



你teh邊--á小等--1-ē to̍h好--ā，論真講無等伊ta，mā是bē使--ā。



Hit ê時陣若行tī街á頭，m̄ tio̍h攏會看tio̍h 1陣人khiā teh路邊，tī hia kho̍k-kho̍k-á等。



小等--1-下是會án怎，生理kám有做hiah大？



你頭á講，有挖tio̍h chiâⁿ chōe in留--落-來ê文字，án-ne應該對烏頭人ê研究真有幫贊hōⁿ！



幫贊是有--lah，猶m̄-koh，黏土枋記錄ê內容，足chē物件，準講看有mā無路用。



看有，對in ê歷史to̍h有khah chōe ê認bat，nah會講無路用！



因為真chē文字，開時間去解讀，結果寫--ê是，菜頭1條25，豬肉1斤150，chit款日常生活ê物件。



Ah m̄ tio̍h bōe-su發票kāng款！



Hèⁿ ā，khah細塊ê黏土枋，親像咱chit-má ê信用卡hiah大niâ，用teh記錄交易ê資料，足成發票無錯。



Án-ne ài收ho͘好，若無，tio̍h 1千萬，結果摔歹--去to̍h無thang換--ā。



閣有chiâⁿ chē teh記錄，寫講今年種田收成jōa chē，in囝chit擺考試第幾名，chit寡li-li-khok-khok ê代誌，攏保存到taⁿ。



Án-ne講--起-來，in m̄ to̍h ta̍k-ê人攏bat字。



Eh！你閣翻頭ka想看māi，in ê文字若是chiah-nī-á普遍，百姓平常時to̍h the̍h來teh記錄生活，應該bē烏白寫hoⁿh！



你是beh強調講，in寫ê文字，是會當相信--ê？



Hèⁿ，我to̍h是chit ê意思。



你敢知，khah早專家bat發現1 ê文件，寫講in有1陣人，開刀kā病人目睭內有問題ê物件the̍h--出-來，hō͘伊閣會當看--tio̍h。



Hăⁿ？是真--ê a̍h是假--ê，siuⁿ hàm--lah！



真--ê ō͘，頂koân to̍h án-ne寫，害hit寡專家chhoah 1 tiô。



M̀，若準講chit件代誌是假--ê，án-ne應該閣有別項，會當證明in定定teh烏白寫ê物件--ā。



To̍h是無--mah，親像啥物外交文件，法律條文，攏有挖--tio̍h。



He攏是日常生活用會tio̍h--ê，bōe使烏白寫。



上重要--ê是，閣有挖tio̍h，kah烏頭人ê歷史，有關係ê文字！



好！In ùi佗位來--ê？是án怎chiah-nī-á厲害？Kám有寫？



Che m̄知neh，凡勢有寫，只是猶未挖--出-來。



M̄-koh，有挖tio̍h 1 ê chiâⁿ重要ê文件，記錄in ê國王，叫做啥物名，統治jōa chē年。



政治--lah，統治者--lah，確實蓋重要，一定ài寫--落-來。



我kā你講，hit份文件有jōa重要你知--無，chit-má攏總挖tio̍h 16份kāng款--ê neh！



Kám會是考試ê時陣，ta̍k-ke攏偷看kāng 1 ê同學ê答案？



1 ê人身軀邊，是beh án怎坐15 ê？Hit寡khó͘-pih是beh予tòa tī無kāng所在ê人，攏會當瞭解in ê歷史。



所擺是teh無kāng城市遺跡挖--tio̍h-ê！



怪奇ê代誌to̍h tī chia，伊頂頭寫講，第1 ê國王，是天頂來--ê！



Hó͘--ò͘！外星人！



閣有，頂頭寫講，頭起先有8 ê國王，1 ê紲1 ê，統治ê時間超過24萬年。



Ĕ？我有問題！



我知--lah，你頭殼有問題m̄！



M̄是--lah，我是beh問講，Sumer文明m̄是chiah 6千年？In 24萬年是teh tó位統治--ê？



M̀，chit ê問題chiâⁿ好，不而過che考試bē考，黏土枋頂頭無寫--ê，攏無重要。



Ah，臭彈--lah！



你感覺聽--起-來蓋臭彈，我會當了解，不過，he路尾有幾ê國王ê名，tī別ê民族ê歷史內面，真正有記--落-來。



24萬年，平均1 ê國王統治3萬年，閣是天頂來--ê，án-ne一定是外星人。



真chē人相信外星人chit ê講法，teh烏頭人ê記錄，有講tio̍h咱chit ê太陽系，有1粒惑星，叫做Ni-pí-luh。



Lim啤酒。



M̄是lim啤酒，是Ni-pí-luh，chit粒星se̍h太陽1 liàn ài 3600年。



Án-ne咱一般人是無法度thang看，m̄-koh Sumer人ê國王會當看幾nā擺。



烏頭人講，神明to̍h是ùi Ni-pí-luh來--ê，神明teh 45萬年前，創造人類。



若是外星人舞--ê，án-ne伊一定有目的。



有人推論講，外星人創造人類，是beh來替in挖金á。



Hăⁿ-à，咱人類ê祖先，hō͘外星人當做奴才o͘h！



Eh！神明叫你做代誌，你kám敢講無ài？



Heh heh，m̄敢，抑m̄-koh外星人ài金á beh創啥，beh the̍h去開o͘h！



金á m̄-nā是投資niâ，用tī工業方面，mā是足有價值ê物件neh！



Bōe seⁿ-sian，bōe hu--去，確實有伊ê價值，不而過，外星人kám無啥物設備，會當家己挖，to̍h閣飼hiah chōe人去替in挖。



我a̍h知，凡勢in to̍h khah無閒，叫奴才去替in挖，chhāi 1 ê國王tī hia管理to̍h好。



1 ê國王ài統治幾nā萬年，想--起-來mā是蓋辛苦。



Ká-ná hō͘人判無期--leh！



後--來-leh？



後--來to̍h做大水--ah，人類險hō͘水淹kah無--去，凡勢連國王to hông chhiâng-chhiâng--去。



Án-ne活--落-來ê人類tio̍h自由--ah！



你食khah bái--leh，liam-mi閣派新ê國王來--ah！



Hăⁿ--à？僥倖o͘h，人類ê祖先chiah-nī-á歹命！



做大水chit ê傳說，上早to̍h是ùi Sumer人chia出--來-ê，1點鐘60分，1 ê圓箍á 360度，攏是烏頭人發明--ê。



Ah m̄是1陣挖金á ê奴才，bat chiah chōe是beh創啥？



Chiah通知影幾點聽好下班--ā！



閣有1 ê趣味ê現象，本底1 ê國王攏統治幾若萬年，tī做大水了後，soah變做千外年，百外年，幾十年，無親像進前hiah長歲壽--ā。



予大水淹1-ē，長歲壽ê功能soah歹--去。



若講khah古早時ê國王是神，án-ne後--來ê國王to̍h慢慢á變做kah一般人kāng款。



若m̄是神明，to̍h無人驚--ā，無teh ka信táu。



自án-ne，Sumer ê王朝tī 4千外年前，因為戰爭，滅亡--ah！



古早時因為戰爭滅亡，che定定有--ê-lah，換作現代mā是kāng款--ā。



講tio̍h戰爭hoⁿh，我閣想tio̍h 1件代誌，當初發生Iraq戰爭ê時陣，美軍佔領烏頭人留--落-來ê Ur古城，足chē人講in chhōe tio̍h 1 ê門，會當kā人傳去別粒星球。



閣teh臭彈--ā，古城tī hia幾若千年，有好物á早to̍h hông搬了了--ah。



無 ŏ͘，1百冬前ê研究，chiah tī hit ê遺跡，發現1頂國王teh戴ê頭盔，頂頭竟然是鍍金--ê。



鍍金？Án-ne m̄-to̍h ài有電，拜託--eh，幾千年前neh！



Hèⁿ--ā，所擺人chiah會講，戰爭chiah開始，美國to̍h趕緊派軍隊去佔hit ê所在。Chhōe看有啥物好空--ê-無！



He聽--起-來tio̍h是烏白講--ê，tī沙漠內底，無位通bih，親像古城hit款khah koân ê所在，一定是先佔先贏--ê，khah早我做兵ê時陣hoⁿh。



好！Tòng--khài！Mài閣講你做兵ê時陣！



Eh！M̄是，你聽我講--1-ē-lah！



我是Niau-tāu，咱後回再會ŏ͘！



你聽我講--lah！我是Chiá-siông，eh，等--1-ē！





【Pe̍h-ōe-jī pán】



Hoan-gêng siu-thiaⁿ “Tâi-gí Kóng Koài-kî”.



Kin-á-ji̍t beh kā ta̍k-ke siāu-kài--ê, sī thiⁿ-téng lâi--ê Sumer bûn-bêng!



Sumer lâng ê Eng-gí sī Sumerians, che sī pa̍t-lâng kā in hō ê miâ, in chheng-ho͘ ka-tī sī O͘-thâu-lâng, in-ūi in ê thâu-chang sī o͘--ê, kah góa kāng-khoán, súi-tang-tang.



Hńg, lí thâu-mo͘ í-keng pe̍h--ah neh, lí ū ní--kòe, kiò sī góa m̄-chai o͘h!



Lí ê thâu-mo͘ chiah pe̍h--leh, lí liân ba̍k-chiu to pe̍h--ê, pe̍h-ba̍k!



O͘-thâu-mo͘ ê jîn-chéng chin chōe, kám ū su-iàu kiông-tiāu che?



In sī beh kiông-tiāu kóng, O͘-thâu-lâng sī gōa-lâi--ê, in ê seⁿ-tiuⁿ to̍h sī kah chāi-tē-lâng bô kāng-khoán.



Lâng lóng mā sī beh kiông-tiāu kóng, góa chāi-tē--ê, nah ē ū lâng teh kiông-tiāu kóng góa gōa-lâi--ê, sī kiaⁿ lâng chhōe i mn̄g-lō͘ nih!



Hèⁿ ā, kî-koài hoⁿh, chha-put-to teh 6500 nî chêng, Sumer bûn-bêng to̍h chhin-chhiūⁿ hiuⁿ-ko͘, po̍k--1-ē, hiông-hiông chhut-hiān tī jîn-lūi ê le̍k-sú lāi-té.



M̆? Bûn-bêng èng-kai sī bān-bān-á hoat-tián--khí-lâi-ê, sī án-nóa ē kóng sī hiông-hiông chhut-hiān?



Lí ài chai-iáⁿ, hiān-tāi ê Iraq lâm-pō͘ hit phiàn thó͘-tē, sī 1 ê chin pháiⁿ seng-chûn ê só͘-chāi.



Hia to̍h lóng soa-bo̍k, kui phiàn lóng choân soa, khiàm-chúi, pún-tóe to̍h khah pháiⁿ seng-oa̍h.



Sui-bóng sī án-ne, m̄-koh teh kó͘-chá sî-tāi, mā sī ū lâng tòa tī hia, it-ti̍t kàu ū 1 kang, 1 tīn gōa-lâi ê lâng, lâi kàu hit ê só͘-chāi.



“Eh! Lín lâi chia sī beh chhòng-siáⁿ? Gún chia ê chúi bô-kàu lim ŏ͘!”



“Hăⁿ? Chúi chóaⁿ-iūⁿ ē bô-kàu lim? Ah m̄-sī 2 tiâu khe hiah tōa tiâu?”



“Lí ba̍k-chiu chheⁿ-mê o͘h, kám bô khòaⁿ tio̍h hit 2 tiâu khoe, tī hiah hn̄g ê só͘-chāi, góa ta̍