咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。

用台語來表現，ǹg望ta̍k家聽liáu會感覺趣味。



[Podcast]



SoundOn

https://bit.ly/ChKaL_SO



Spotify

https://spoti.fi/48jD2tI



KKBOX Podcast

https://bit.ly/ChKaL_KK



Apple Podcast

https://apple.co/3HZyfD3



YouTube Podcast

https://bit.ly/ChKaL_YT





[社交平台 Siā-kau Pêⁿ-tâi]



YouTube

https://bit.ly/ChKaL_YT



Facebook

https://bit.ly/ChKaL_FB



Instagram

https://www.instagram.com/chokangalang/



X (Twitter)

https://twitter.com/chokangalang



方格子

https://vocus.cc/salon/cho-kang-a-lang



以下內容是漢羅kah pe̍h-ōe-jī原稿，有需要歡迎ta̍k-ke來參考。



【漢羅版】



歡迎收聽台語講怪奇，咱今á日beh講--ê是神祕ê大石頭建築，mā有人ka hō做巨石文明。



Tī全世界chiâⁿ chē所在，無kâng ê民族，攏有用大石頭起建築物ê文化。



Chit寡建築物，in ê路用有廟寺，有墓，有金字塔，mā有1寡到chit-má，攏無法度確定是beh做啥物用途ê遺跡。



Chit內底上有名ê 1 ê，是英國ê巨石陣，幾十塊ê巨石排列做圓形，有4千年ê歷史，一般是ioh講，he是彼tang陣teh做祭拜儀式ê所在，m̄-koh mā無法度確定。



埃及ê Khufu金字塔，相信ta̍k-ê攏bat聽--過，che是tī 4500年前完成ê建築物，伊使用230萬塊ê大石頭ka疊--起-來，ta̍k粒石頭上無攏有2噸半，金字塔起好了後，是全世界上koân ê建築物，一直到700年前，chit ê記錄chiah去hông超--過。



法國有1 ê Carnac巨石林，chia ê巨石有超過3千塊以上，m̄知是照啥理路，閣排kah整齊整齊，歷史超過5千年，起造ê年代比金字塔閣khah久，其中有1寡古早時ê墓，m̄-koh chiah大phiàn ê遺跡，是為tio̍h啥物目的起--ê，kāng款無人知影。



照咱現此時對古早人ê認bat，四五千年前ê人類，大部分猶teh用石頭做ê工具，上好ê工具，極加to̍h是青銅，in nah有才調來處理chiah大塊ê石頭？



而且in一定是有足強ê意志a̍h是需求，chiah會動員hiah-nī-á chē人ê來舞chit寡代誌。



咱tú-chiah講--ê hit寡遺跡，伊工程ê規模，to̍h算是用現代ê技術，凡勢to舞bē出--來，真chē專家to̍h teh想，teh hia ioh講，幾千年前in是án怎做--ê？



其實mā m̄是現代人ài替in操煩，只是想--tio̍h to m̄甘願，lín chit寡古早人竟然有才調起che有--ê無--ê！



Hèⁿ ā，tio̍h算講阮無hiah gâu搬石頭，上無阮mā ài知影lín是有啥物撇步--ā！



江湖一點訣，講--破to̍h無價值，咱chit-má to̍h來教ta̍k-ê án怎搬石頭，頭1 ê是英國巨石陣，thàn落雪ê時陣，用冰車來拖to̍h好！



超過9米，30噸以上ê大石頭，閣是寒--人冷ki-ki，若無sè-jī腰會閃--tio̍h ŏ͘！



當然mā m̄是1 ê人家己拖--ā，100 ê人做夥拖，閣加100隻Husky。



我算--1-ē，30噸，to̍h是3萬公斤，按呢人hâm狗做夥算，平均1 ê ài拖150公斤neh！



100 ê人若無法--伊，叫所有ê人來搬，庄頭庄尾厝邊隔壁攏總來交陪，順sòa練身體。



Eh，你是當做別人攏閒閒無代誌--o͘h！



寒--人無法度作穡--ah，無是beh規工bih tī厝--ni̍h看電視nih，ài加減á運動--lah！



運動ê方式chiâⁿ chē--ā，古早人m̄是定定去kâng佔地盤，搶食物，閣刣人兼放火。



你用講--ê to̍h khah簡單，he出--去是ài hâm人拚性命neh，猶是搬石頭khah健康--lah！



起造巨石陣ê理由是為tio̍h健康，che我真正m̄ bat聽--過，拖大石頭真thiám neh。



若siuⁿ thiám，拖kah半路to̍h ka擲tī hia，明年chiah閣轉來拖to̍h好--ā，橫直mā無人會偷the̍h。



石頭to̍h bē-tàng食，偷the̍h he beh創啥，ah m̄-koh你慢慢á舞，工程m̄ to̍h ài拖chiâⁿ久。



A̍h無teh趕時間--ā，若無，閣會tàng外包hō͘專業--ê，聖誕老阿伯。



Eh！牽kah tùi hia去，先bàng講hit ê時代聖誕老阿伯根本to猶bē出世，我問--你，你kám有收過聖誕老人送--你ê禮物？



無neh，kám是我無夠乖？



M̄是你無夠乖，是你老--ā-lah！



Ái-iò͘，講kah按呢，我本底是想講，聖誕老人ê冰車，載hiah chē禮物tī天頂飛，搬1下石頭小khóa-á代誌，我若有hit台會tàng飛ê冰車，石頭我家己搬mā會使--ā。



你連禮物to̍h the̍h無，閣teh siàu想人ê冰車，食khah bái--eh-lah。



Hò͘，chhōe外包mā bē使，ah無你khah巧，石頭你來搬看māi講。



好，按呢我來起金字塔，石頭1粒2噸半，超過200萬塊，挖1條運河，用船來載to̍h好。



Ĕ？Chit招聽--起-來bē-bái neh，免搬kah hiah-nī thiám。



Nî-lô-hô，本底to̍h是每1冬，tī固定時間攏會做大水，溪邊ê田攏淹淹--去，無法度種田，閒閒無代誌做，to̍h ta̍k-ke來sńg石頭--ā。



Sńg石頭，練身體閣兼sńg水，比拚性命搶地盤閣khah健康hōⁿ。



Hèⁿ，beh放火mā放bē --起-來-ā。



怎樣放bē --起-來？



To̍h teh淹水--ah，是beh án怎放火？



是講，金字塔內底上重ê石頭，超過100噸lio͘h，he是án怎搬--ê？



你想講超過100噸to̍h chiâⁿ厲害m̄？我kā你講，古早ê埃及人，閣有挖1塊方尖碑，長度有42米，重量超過1千噸。



Eh，1千噸kah 2噸半差足chē neh，he是beh án怎搬？



而且，in teh挖ê時陣，koh順sòa ka磨kah平平。



先做si-á-geh kám有差？



當然mā有差，意思to̍h是講，我teh挖ê時，to̍h已經想好ài án怎搬--ah，而且我確定teh搬ê時陣，絕對bē去ho͘ kha̍p--tio̍h。



Ŏ͘，是按呢o͘h，ah是beh按怎搬，你m̄ to̍h緊講。



He簡單--lah，chhōe外包--ê，叫外星人來tàu搬to̍h好--ah。



Eh，kám會使按呢偷食步？叫外星人來鬥相共，m̄是面對問題ê方式--lah。



你閣敢講，頭tú-á到底是siáng講beh外包hō͘聖誕老阿伯？



好--lah好--lah，若無chit táu to̍h算無輸無贏。



咱tú-chiah講--ê chit 2 ê，to̍h是thàn無法度種田ê時陣，來舞chit寡工程。



凡勢是beh用chit ê方式，hō͘參與ê百姓有通食飽，而且ta̍k工工課做kah足thiám，chiah bē想講beh造反。



To̍h是驚人食飽siuⁿ閒，a̍h是食bē飽會想beh亂，想1寡齣頭來hō͘ in舞，算是1種統治ê手段。



咱一般攏會想講，文明kap科技是一直teh進步--ê，m̄-koh，mā有可能因為天災a̍h是戰爭，人死了了，khah早ê技術無法度koh傳--落-來。



所擺，古早人做會到ê代誌，後--來顛倒soah愈來愈退步，到chit-má，看tio̍h hit寡古早時代ê巨石建築，to̍h會去想講kám會是外星人舞--ê。



古早時有1 ê羅馬帝國，足厲害，羅馬人ê建築技術chiâⁿ進步，我相信ta̍k-ê攏bat聽--過。



In m̄-nā四界去搶人ê地盤，閣會吸收在地人ê智慧kap技術，hō͘ in ê文明愈來愈進步。



In ùi希臘人hit pêng，學tio̍h製作吊車ê技術，in閣開時間去研究，發展，tī 2千年前，羅馬人to̍h會tàng用吊車搬幾十噸ê大石頭--ā。



講tio̍h羅馬人ê建築，ta̍k-ke頭1 ê想--tio̍h-ê，應該to̍h是羅馬競技場。



因為tī hia拍ê電影足有名，閣有電視劇，chit時通人知。



窮實tī Lî-pa-lūn，閣有1 ê世界有名ê Baalbek遺跡，che是2千外年前，羅馬人起ê神廟。



He是1 ê足有名ê世界文化遺產。



Hit ê神廟ê柱á，有7層樓hiah koân，疊tī柱á頂頭ê大石頭，1塊to̍h差不多有60噸。



2千年前ê吊車，to̍h chiah-nī-á厲害o͘h！



Hèⁿ ā，hit塊石頭頂面有8 ê孔，專家認為to̍h是in使用吊車ê證據。



若1台吊車用1 ê孔，60噸，按呢算--起-來，in使用ê吊車，1台會tàng搬7噸半。



8台吊車同齊作業，che已經chiâⁿ厲害--ā，不而過，閣khah驚--人ê是，廟寺底層，地基用ê大石頭，長度有22米hiah長，重量上無mā有800噸，你是beh án怎搬？



用100台吊車來處理kám bē使？



He石頭長度有22米neh，你1 pêng to̍h ài khǹg 50台ê吊車，吊車kám有hiah細台？



Eh，tio̍h hoⁿh，m̄是用khah chē吊車to̍h khah好neh，ah若無，in是án怎搬--ê？



我問--你，若是叫你去搬hit支柱á，你會án怎搬？



圓形ê柱á，我想--1-ē，ah，土腳鋪ho͘平，用liàn--ê to̍h好。



巧ŏ͘，按呢若是800噸ê石頭，你beh án怎搬？



He to̍h m̄是圓形--ê，無法度用liàn--ê，kám是ài chhōe外包--ê？



Bàng閣想聖誕老阿伯--ah！伊若m̄是圓--ê，to̍h bē-tàng用lìn--ê，按呢你ka變做圓--ê，m̄ to̍h好--ah！



Ĕ？四角形--ê，按呢，我tī伊四ê面攏ka裝1 ê架á，將伊變做圓型--ê，to̍h會tàng用liàn--ê，根本to m̄免吊車--mah！



Hèⁿ ā，吊車用來kā石頭吊ho͘ koân to̍h好，免用吊車搬，chit ê方式聽--起-來蓋合理hoⁿh！



Chit ê理論我會tàng接受。



M̄-koh，mā是有人堅持，m̄相信羅馬人有才調搬hiah大粒ê石頭，to̍h teh ioh講，頂頭ê廟是羅馬人起--ê，不過ē層ê大石頭，是5千年前，甚至是1萬年前ê古早文明chhāi tī hia--ê。



羅馬人做bē到，顛倒5千年前ê人to̍h做會到，che koh是啥物理路？



我想應該是hoⁿh，to̍h算是烏白講，只要你講了有趣味，to̍h有人會kā你捧場，你若講了siuⁿ正經，顛倒無人beh聽。



有道理ŏ͘，我若提出1 ê理論講，chit ê世界上無外星人，聽--起-來to̍h無啥趣味，m̄-koh我若是烏白chòaⁿ，講in án怎閣án怎，我認為chit ê世界上，一定有外星人，按呢to̍h會有chiâⁿ chē人來kā我chhi̍h讚。



Hèⁿ ā，若是tú tio̍h啥物古早時代ê代誌，現此時無法度解說--ê，先賴hō͘外星人to̍h tio̍h--ā。



雖罔是按呢講，不過，chit寡巨石文明確實mā是有真chē怪奇，可比講，Turkey有1 ê Gô-bé-khí-lí石陣，chit-má ê專家確定，hit ê遺跡，超過1萬2千年。



Hăⁿ？1萬2千年？Ah m̄ to̍h kah Atlantis kāng 1 ê時期？



Hit ê遺跡ê規模mā是足譀古，而且你ài知影，彼tang陣ê人類，猶閣bē曉種田，in食ê物件to̍h是去phah獵，挽果子，nah有才調飼1大陣人，閒閒無代誌去搬石頭？

Eh，che聽--起-來真正有夠怪奇，你閣sòa lŏe講，我想beh聽。



Ta̍k-ke若是有趣味想beh聽，ài會記lih kā阮注文，tàu相報，我是A-chin in ang。



我是Ko͘-chiáu。



感謝ta̍k-ê收聽，咱後回再會ŏ͘！





【Pe̍h-ōe-jī pán】



Hoan-gêng siu-thiaⁿ Tâi-gí Kóng Koài-kî, lán kin-á-ji̍t beh kóng--ê sī sîn-pì ê tōa chio̍h-thâu kiàn-tio̍k, mā ū lâng ka hō-chò Kī-se̍k-bûn-bêng.



Tī choân sè-kài chiâⁿ chē só͘-chāi, bô kâng ê bîn-cho̍k, lóng ū iōng tōa chio̍h-thâu khí kiàn-tio̍k-bu̍t ê bûn-hòa.



Chit kóa kiàn-tio̍k-bu̍t, in ê lō͘-iōng ū biō-sī, ū bōng, ū kim-jī-thah, mā ū 1 kóa kàu chit-má, lóng bô-hoat-tō͘ khak-tēng sī beh chò siáⁿ-mih iōng-tô͘ ê ûi-chek.



Chit lāi-té siōng ū-miâ ê 1 ê, sī Eng-kok ê Kī-se̍k-tīn, kúi cha̍p tè ê kī-chio̍h pâi-lia̍t chò îⁿ-hêng, ū 4 chheng nî ê le̍k-sú, it-poaⁿ sī ioh kóng, he sī hit-tang-chūn teh chò chè-pài gî-sek ê só͘-chāi, m̄-koh mā bô-hoat-tō͘ khak-tēng.



Ai-ki̍p ê Khufu kim-jī-thah, siong-sìn ta̍k-ê lóng bat thiaⁿ--kòe, che sī tī 4500 nî chêng oân-sêng ê kiàn-tio̍k-bu̍t, i sú-iōng 230 bān tè ê tōa chio̍h-thâu ka tha̍h--khí-lâi, ta̍k lia̍p chio̍h-thâu siōng-bô lóng ū 2 tòng pòaⁿ, kim-jī-thah khí hó liáu-āu, sī choân-sè-kài siōng koân ê kiàn-tio̍k-bu̍t, it-ti̍t kàu 700 nî chêng, chit ê kì-lo̍k chiah khì hông chhiau--kòe.



Hoat-kok ū 1 ê Carnac Kī-se̍k-lîm, chia ê kī-chio̍h ū chhiau-kòe 3 chheng tè í-siōng, m̄-chai sī chiàu sáⁿ lí-lō͘, koh pâi kah chéng-chê chéng-chê, le̍k-sú chhiau-kòe 5 chheng nî, khí-chō ê nî-tāi pí kim-jī-thah koh khah kú, kî-tiong ū 1 kóa kó͘-chá-sî ê bōng, m̄-koh chiah tōa phiàn ê ûi-chek, sī ūi-tio̍h siáⁿ-mih bo̍k-tek khí--ê, kāng-khoán bô-lâng chai-iáⁿ.



Chiàu lán hiān-chhú-sî tùi kó͘-chá-lâng ê jīn-bat, 4, 5 chheng nî chêng ê jîn-lūi, tōa-pō͘-hūn iáu teh iōng chio̍h-thâu chò ê kang-kū, siōng hó ê kang-kū ke̍k-ke to̍h sī chheⁿ-tâng, in nah ū châi-tiāu lâi chhú-lí chiah tōa tè ê chio̍h-thâu?



Jî-chhiáⁿ in it-tēng sī ū chiok kiông ê ì-chì a̍h-sī su-kiû, chiah ē tōng-oân hiah-nī-á chē ê lâng lâi bú chit kóa tāi-chì.



Lán tú-chiah kóng--ê hit kóa ûi-chek, i kang-têng ê kui-bô͘, to̍h sǹg sī iōng hiān-tāi ê ki-su̍t, hoān-sè to bú bē chhut--lâi, chin chē choan-ka to̍h teh siūⁿ, teh hia ioh kóng, kúi-chheng-nî chêng in sī án-chóaⁿ chò--ê?



Kî-si̍t mā m̄-sī hiān-tāi-lâng ài thè in chhau-hoân, chí-sī siūⁿ--tio̍h to m̄ kam-goān, lín chit kóa kó͘-chá-lâng kèng-jiân ū châi-tiāu khí che ū--ê bô--ê!



Hèⁿ ā, tio̍h sǹg kóng gún bô hiah gâu poaⁿ chio̍h-thâu, siōng-bô gún mā ài chai-iáⁿ lín sī ū siáⁿ-mih phiat-pō͘--ā!



Kang-ô͘ chi̍t tiám koat, kóng--phòa to̍h bô kè-ta̍t, lán chit-má to̍h lâi kà