咱chit ê節目是用台語來kā ta̍k家介紹chit ê世界上，chiâⁿ chōe奇奇怪怪ê代誌。

用台語來表現，ǹg望ta̍k家聽liáu會感覺趣味。



[Podcast]



SoundOn

https://bit.ly/ChKaL_SO



Spotify

https://spoti.fi/48jD2tI



KKBOX Podcast

https://bit.ly/ChKaL_KK



Apple Podcast

https://apple.co/3HZyfD3



YouTube Podcast

https://bit.ly/ChKaL_YT





[社交平台 Siā-kau Pêⁿ-tâi]



YouTube

https://bit.ly/ChKaL_YT



Facebook

https://bit.ly/ChKaL_FB



Instagram

https://www.instagram.com/chokangalang/



X (Twitter)

https://twitter.com/chokangalang



方格子

https://vocus.cc/salon/cho-kang-a-lang



以下內容是漢羅kah pe̍h-ōe-jī原稿，有需要歡迎ta̍k-ke來參考。



【漢羅版】



歡迎收聽「台語講怪奇」。



Tī 1922年，teh印度MohenjoDaro chit ê所在，發現1 ê古城，因為chit ê城，起teh水邊á ê山崙頂頭，人ka hō做死亡崙古城。



古城四界攏有，印度chit ê死亡崙古城kám有khah怪奇？



有o͘h！Chit ê古城上有名--ê，to̍h是真chē人懷疑講，khah早tī chia發生過核子戰爭。



古早時戰來戰去，che定定有--ê-lah，m̄-koh，你講核子戰爭，che kám有啥證據，你是m̄通烏白講ŏ͘！



Che m̄是我烏白講，che是聽人講--ê-lah！



Ŏ͘？別人是án怎講--ê？



Tī印度，有1 ê 3500年前，流傳--落-來ê故事，內底是teh講1場古早時代所發生ê戰爭。



所擺是3500年前ê戰爭。



M̄是--lah，當初講故事ê人mā是聽人講--ê，戰爭是閣khah久進前，差不多4600年前所發生ê代誌。



Hăⁿ？Hiah久進前發生ê事件，kah核子戰爭有啥關係？



聽講in 2 pêng teh相戰ê時陣，m̄-nā有giâ刀ê軍隊，閣有teh天頂飛ê UFO，tī hiah射飛彈。



啥物？Hit ê時陣to̍h有飛彈？



Hèⁿ ā，in 2 pêng ê boss攏駛UFO，teh天頂射來射去，pin-pin-piàng-piàng，閣有1台UFO，飛去3 ê城市頂頭，原子彈ka結--lòe，pòng，大爆炸！



Ái-iò͘，che nah是戰爭chiàn-cheng？聽--起-來根本to̍h是大屠殺--mah！



He爆炸ê光，親像日頭hiah-nī鑿目，城內ê人攏總死了了，khah遠ê所在，hit寡兵á，身軀攏to̍h火，裝備趕緊thǹg--落-來，隨時to̍h跳--落-去水內底浸。



Kah hiah奇，hit ê時代to̍h有UFO，閣有原子彈，che真正有夠怪奇，你m̄-tio̍h講ho͘khah詳細--leh？



有趣味hōⁿ，我專工去chhōe hit ê故事出來看，發現1件閣khah怪奇ê代誌！



Hăⁿ？緊講緊講。



Hit ê故事內底，根本to無寫tio̍h啥物tī天頂teh飛ê戰車--lah，飛彈--lah，原子彈hit寡物件。



Eh！你頭tú-á講chiah久，攏是teh烏白chòaⁿ o͘h？你無彩我ê時間！



Eh eh，m̄是--lah，我頭起先tio̍h有講，che是聽人講--ê，聽人講--ê無teh負責--ê-lah！



Chit寡有--ê無--ê是聽siáng講--ê？叫伊出來負責！



Chit件代誌，上早是瑞士1 ê足有名ê tio̍h獎ê作家講--ê，伊tī 1968年出1本冊，內面寫講，古早古早，有真chē無法度解說ê代誌，攏是外星人舞--ê。



Tio̍h獎ê作家？伊是tio̍h啥物獎？



伊the̍h tio̍h 1991年，笑詼Nobel賞。



莫怪伊會tio̍h chit ê獎。



好，咱轉來講今á日ê主題，印度ê死亡崙古城。



Ĕ？Tio̍h hoⁿh，聽tio̍h UFO，soah差1點á bē記chit咱今á日ê主題。



Chit ê遺跡是teh 1922年發現--ê，伊規劃kah kán-ná棋盤--leh，城市內底ê交通真利便。



Án-ne應該是先kā城市規劃好chiah起--ê，m̄-chiah有法度kā路起做棋盤形。



Chit ê城市ê建築足先進，兩層樓ê厝，ta̍k間攏有馬桶，閣有規劃代先ê下水道系統。



幾千年前neh，竟然有下水道ê設計！



而且chit ê城市規模足大，專家研究，當時應該差不多有4萬人tòa tī chia。



想bē到印度人ê祖先chiah-nī-á厲害！



是m̄是印度人ê祖先，che to̍h歹講--à，因為挖--出-來ê物件，頂頭ê文字kah印度文無kâng，無人看有。



所擺hit ê文明已經滅亡--ah？是án怎無--去-ê，4萬人neh，上無mā應該有留1寡線索hông研究。



若講tio̍h古早文明ê滅亡，一般咱想--tio̍h-ê，攏是hit幾ê理由，天災--lah，戰爭--lah！



無的確是外星人kā in接--轉-去！



Mài未曾未to̍h先牽去外星人hia，外星人mā是蓋無辜，我本底是beh接講，凡勢是破病死了了--ah。



M̄是外星人án-ne to̍h無趣味--ā，好--lah，好--lah，無是tó 1款你講看māi？



咱拄chiah有講--tio̍h，chit ê城市起teh水邊á，經過專家ê研究，khah早in bat hō͘水淹幾nā擺，有人講in擋bōe牢，搬走--ah！



M̄-koh水若退，to̍h會使轉去--ā，無，chiah-nī-á大ê城市，規ê放ho͘去，m̄是足phah-sńg。



Hèⁿ--ā，hit ê時代，你是beh搬去tó位，chiah有法度ta̍k間厝攏有便所通khû！



便所kám是重點？



Eh！便所蓋重要neh，he是咱已經慣勢--ah，無感覺，你若搬去無便所ê所在tòa，你to̍h知--lah！



想想--leh，án-ne講mā是tio̍h--lah！叫我搬去無便所ê所在tòa，我chiah無ài。



而且便所mā m̄是凊彩起tio̍h好，teh起進前tio̍h ài先挖下水道chiah會使neh，he大工程o͘h！



Ĕ？下水道？M̀，Kám會是in當初淹水ê時，大水流入去下水道，滿--khài，soah規ê he攏浮--起-來。



臭1 ē soah無人敢tòa！



心理創傷meh！



其實hoⁿh，當初teh挖死亡崙古城ê過程，閣有挖tio̍h 40外副ê死人骨頭，有ê規陣死teh路中央，有ê死tī厝內。



是臭--死-ê a̍h是去hō͘水淹死--ê？



拜託--eh，臭死--ê是看會出來--o͘h！



Nah會看bē出--來？你看伊ê手是m̄是掩tĕ鼻孔hia--a。



Ah若1肢手掩teh嘴--eh，另外1肢手khǹg teh腹肚hia，你kám會講伊是笑死--ê？



啥？閣有挖tio̍h笑死--ê！



無--lah！



Án-ne hit寡人to̍h是hō͘水淹死--ê-mah！



我認為m̄是，若是做大水淹死--ê，應該會chia 1-ê hia 1-ê án-ne，若真正水siuⁿ大，規ê沖了了，mā bōe講規陣死teh路中央chiahtio̍h--ā。



有道理，而且in規陣倒tī hia，to̍h是講事件發生了後，攏無人轉來整理，若是4萬人沖了了，無可能留he幾ê，án-ne，kám會是戰爭ê關係？



戰爭是1種講法，因為死亡崙古城滅亡ê時陣，拄好是Á-lī-àn人四界發動戰爭ê年代。



所以--à，in真有可能是去hō͘ Á-lī-àn人phah--死-ê！



Ah m̄-koh tòa 4萬人ê所在，若是戰爭，應該會死chiâⁿchē人--ā，chhun--ê人--leh？連骨頭tio̍h揣無--ō͘，閣再講，in文明發展hiah-nī-á懸，beh kah人相戰kám會輸？



若連骨頭to̍h揣無，án-ne mā無可能是破病死--ê，若有真chē人破病，死kah bē赴埋，一定會挖tio̍h真chē骨頭chiah tio̍h。



Hèⁿ--à，in滅亡ê因端，過四千外年，已經揣無證據--ah，後--來tī hit ê所在活動ê人，對chit ê古城ê代誌，完全無任何ê記錄。



Ŏa-à，in人緣chiah-nī bái nih，攏無朋友通kā in祭拜--o͘h！



To̍h是án-ne，完全死無人知neh，閣有1件足奇怪ê代誌，當初teh挖chit ê古城ê時陣，挖tio̍h足chē玻璃。



Kám講hit ê時代to̍h發明玻璃--ā？



M̄是，hia ah無挖tio̍h啥玻璃罐á，m̄-koh hit kho͘圍á，規土腳攏是碎糊糊ê玻璃，甚至連壁頂mā有，in to̍h kā he玻璃，送去實驗室研究。



Kám有研究出啥物怪奇ê代誌 ？



Hò͘，一研究--lòe，驚死人，he玻璃竟然是普通ê土砂，經過1400度燒--過，然後溫度雄雄降--lòe，chiah會變做hit款玻璃。



Ái-iò͘，1400度，是發生啥物代誌，燒kah按呢生？



後--來inchiah發見講，he竟然是1 ê爆炸ê現場。



Chiah拄好，咱進前chiah講到王恭廠大爆炸，chit回又閣是爆炸！



Chit ê爆炸，無輸王恭廠hit ê，ùi爆炸ê中心tùi外圍算--出-去，1000公尺以內，所有ê厝攏總無--去。



驚--死，che爆炸ê規模chiah-nī-á大，規ê城市to̍h因為án-ne無去，mā講ē得過--lah！



發現chit ê遺跡到taⁿ已經超過100冬--a，100冬前ê專家，完全想無che是啥物狀況！



Kám會是去hō͘火流星kiat--tio̍h？



哪有一日到暗teh火流星，無hiah拄好--lah，chit件代誌一直到幾十冬了後，科技發展--起-來，有人kā in當初挖--tio̍h ê骨頭the̍h去化驗，竟然驗出有輻射留teh頂頭ŏ͘！



Hăⁿ--à，莫怪會有人主張講，古早時發生過核子戰爭。



He to̍h是hit當陣拄好是冷戰時期，ta̍k-ke足驚會發生核子戰爭，m̄ chiah會想tio̍h beh去驗看māi。



是講，超過4000年--ah，kám閣驗會出輻射？



我a̍h知，有ê人講有，有ê人講無，我想應該是無--lah！



你nah ē-tàng確定？



若有輻射，kám有可能開放hō͘人去hia chhit-thô。



Hia閣有開放--o͘h？Án-ne若有人beh去印度chhit-thô，ē-tàng去hit ê所在行行看看--leh hoⁿh！



Chit-má若去印度是看bōe-tio̍h--eh-lah！



Hăⁿ？你又閣teh kă騙？



M̄是--lah，發見古城ê hit ê所在，後--來因為Pakistan獨立建國，to̍h變做Pakistan ê領土。



Ŏ͘，是án-ne o͘h，我想講你閣teh kā我騙！



無--lah，我nah會敢kā你騙，nā準講是kā你騙，橫直he攏mā是聽人講--ê，我是無teh負責--ê ŏ͘！



無負責閣敢講kah chiah大聲！



Án-ne感謝ta̍k家今á日來收聽「台語講怪奇」，我是Niau-tāu，我是Chiá-siông，咱後回再會ŏ͘！





【Pe̍h-ōe-jī pán】



Hoan-gêng siu-thiaⁿ “Tâi-gí Kóng Koài-kî”.



Tī 1922 nî, teh Ìn-tō͘ MohenjoDaro chit ê só͘-chāi, hoat-hiān 1 ê kó͘-siâⁿ, in-ūi chit ê siâⁿ, khí teh chúi-piⁿ-á ê soaⁿ-lūn téng-thâu, lâng ka hō-chò “Sí-bông-lūn Kó͘-siâⁿ”.



Kó͘-siâⁿ sì-kè lóng ū, Ìn-tō͘ chit ê Sí-bông-lūn Kó͘-siâⁿ kám ū khah koài-kî?



Ū o͘h! Chit ê kó͘-siâⁿ siōng ū-miâ--ê, to̍h sī chin chē lâng hoâi-gî kóng, khah chá tī chia hoat-seng kòe he̍k-chú chiàn-cheng.



Kó͘-chá-sî chiàn lâi chiàn khì, che tiāⁿ-tiāⁿ ū--ê-lah. m̄-koh, lí kóng he̍k-chú chiàn-cheng, che kám ū siáⁿ chèng-kù, lí sī m̄-thang o͘-pe̍h-kóng ŏ͘!



Che m̄-sī góa o͘-pe̍h-kóng, che sī thiaⁿ lâng kóng--ê-lah!



Ŏ͘? Pa̍t-lâng sī án-chóaⁿ kóng--ê?



Tī Ìn-tō͘, ū 1 ê 3500 nî chêng, liû-thoân--lo̍h-lâi ê kò͘-sū, lāi-té sī teh kóng 1 tiûⁿ kó͘-chá sî-tāi só͘ hoat-seng ê chiàn-cheng.



Só͘-pái sī 3500 nî chêng ê chiàn-cheng.



M̄-sī--lah, tong-chho͘ kóng kò͘-sū ê lâng mā sī thiaⁿ lâng kóng--ê, chiàn-cheng sī koh khah kú chìn-chêng, chha-put-to 4600 nî chêng só͘ hoat-seng ê tāi-chì.



Hăⁿ? Hiah kú chìn-chêng hoat-seng ê sū-kiāⁿ, kah he̍k-chú chiàn-cheng ū siáⁿ koan-hē?



Thiaⁿ-kóng in 2 pêng teh sio-chiàn ê sî-chūn, m̄-nā ū giâ-to ê kun-tūi, koh ū teh thiⁿ-téng poe ê UFO, tī hia siā hui-tôaⁿ.



Siáⁿ-mih? Hit ê sî-chūn to̍h ū hui-tôaⁿ?



Hèⁿ ā, in 2 pêng ê boss lóng sái UFO, teh thiⁿ-téng siā lâi siā khì, pin-pin-piàng-piàng, koh ū 1 tâi UFO, poe khì 3 ê siâⁿ-chhī téng-thâu, goân-chú-tôaⁿ ka kiat--lòe, pòng, tōa po̍k-chà!



Ái-iò͘, che nah sī chiàn-cheng? Thiaⁿ--khí-lâi kin-pún to̍h sī tōa-tô͘-sat--mah!



He po̍k-chà ê kng, chhin-chhiūⁿ ji̍t-thâu hiah-nī chha̍k-ba̍k, siâⁿ-lāi ê lâng lóng-chóng sí-liáu-liáu, khah hn̄g ê só͘-chāi, hit kóa peng-á, seng-khu lóng to̍h-hóe, chong-pī kóaⁿ-kín thǹg--lo̍h-lâi, sûi-sî to̍h thiàu--lo̍h-khì chúi lāi-té chìm.



Kah hiah kî, hit ê sî-tāi to̍h ū UFO, koh ū goân-chú-tôaⁿ, che chin-chiàⁿ ū-kàu koài-kî, lí m̄-tio̍h kóng ho͘ khah siông-sè--leh?



Ū chhù-bī hōⁿ, góa choan-kang khì chhōe hit ê kò͘-sū chhut-lâi khòaⁿ, hoat-hiān 1 kiāⁿ koh khah koài-kî ê tāi-chì!



Hăⁿ? Kín kóng kín kóng.



Hit ê kò͘-sū lāi-tóe, kin-pún to bô siá tio̍h siáⁿ-mih tī thiⁿ-téng teh poe ê chiàn-chhia--lah, hui-tôaⁿ--lah, goân-chú-tôaⁿ hit kóa mi̍h-kiāⁿ.



Eh! Lí thâu-tú-á kóng chiah kú, lóng sī teh o͘-pe̍h chòaⁿ o͘h? Lí bô-chhái góa ê sî-kan!



Eh eh, m̄-sī--lah, góa thâu-khí-seng tio̍h ū kóng, che sī thiaⁿ lâng kóng--ê, thiaⁿ lâng kóng--ê bô teh hū-chek--ê-lah!



Chit kóa ū--ê bô--ê sī thiaⁿ siáng kóng--ê? Kiò i chhut-lâi hū-chek!



Chit kiāⁿ tāi