Lestin fjallar í dag um ævintýrlegan feril Britney Spears sem gefur í dag út plötuna Glory. Áhugavert lífshlaup þessarar 34ra ára poppstjörnu verður rakið, en óhætt er að segja að hún hafi svo sannarlega lifað tímana tvenna. Einnig verður fjallað um kvikmyndina Clockwork Orange eftir Stanley Kubrick, en myndin var frumsýnd árið 1971, gerð eftir samnefndri skáldsögu eftir breska rithöfundinn Anthony Burgess, frá árinu 1962. Myndin þótti djörf á sínum tíma og hafði mikil áhrif, rætt verður við Friðrik Þór Friðriksson leikstjóra og Jóhann Bjarna Kolbeinsson fréttamann um CLockwork Orange, sem sýnd verður í Bíó-Paradís í kvöld. Lestin þýtur einnig af stað með Margréti Rósu Dóru- og Harrysdóttur innanborðs, en hún er bassaleikari hljómsveitarinnar Kælunnar miklu sem gaf út samnefnda breiðskífu hjá grísku útgáfunni Fabrika Rec í upphafi sumars. Margrét segir Atla Bollasyni frá frelsandi mætti tónlistarinnar og þjáningunni sem fylgir sérkennileika tilvistarinnar.